Bütün türk dünyası Qarabağın incisi Şuşanı özünün qürur, fəxarət ünvanı sayır. Azərbaycanın Vətən müharibəsində əldə etdiyi şanlı qələbəni öz zəfərləri kimi dəyərləndirən qardaş xalqların nümayəndələrinin də xalqımızla bərabər milli qürur və birlik coşqusu yaşamaları hamımızın xatirindədir.
Prezident İlham Əliyevin siyasi iradəsi və əzmi sayəsində ölkəmizin qazandığı bu parlaq qələbə türk xalqlarının da taleyində bilavasitə mühüm rol oynayıb, türk birliyinin, həmrəyliyinin daha da güclənməsinə mühüm töhfə verib.
Azərbaycan Prezidentinin şəxsi səyləri nəticəsində bu gün türk birliyi ən yüksək əməkdaşlıq zirvəsinə qalxıb. Elə bu baxımdan türk dövlətləri dünyada baş verən bütün qlobal siyasi proseslərə, təbii böhranlara qarşı güclü birliklə sinə gərirlər.
Xüsusi vurğulayaq ki, Türk Dövlətləri Təşkilatına üzv olan ölkələrin başçılarının Türk Dünyasının Ali Ordeninin Azərbaycan Prezidenti İlham Əliyevə verilməsi ilə bağlı qərarları da məhz bu ümumi mənafelərə xidmət edən reallıqlar nəzərə alınaraq qəbul edilib.
Mədəni birlik
Türkdilli ölkələr siyasi, iqtisadi sahələrdə olduğu kimi, mədəni sahədə də güclərini birləşdiriblər. Qeyd edək ki, işğaldan azad olunan Qarabağ və Şərqi Zəngəzurun mədəni irsinin bərpa olunması istiqamətində türkdilli ölkələr daim Azərbaycana dəstəklərini göstərirlər. Bu qardaşlıq dəstəyinin daha bir nümunəsi isə Şuşa şəhərinin 2023-cü il üçün türk dünyasının mədəniyyət paytaxtı seçilməsidir.
Bu barədə qərar ötən il Beynəlxalq Türk Mədəniyyəti Təşkilatına (TÜRKSOY) üzv ölkələrin Mədəniyyət Nazirlərinin Daimi Şurasının Türkiyənin Bursa şəhərində keçirilən iclasında qəbul olunub.
Təşkilatın yeni Baş katibi Sultanbay Raev jurnalistlərə ilk açıqlamasında əminliklə bildirib ki, 2023-cü ildə türk dünyasının mədəniyyət paytaxtı seçilən Şuşa şəhərinin bütün dünyada geniş tanıtdırılması və sevdirilməsi üçün strateji mədəniyyət layihələri həyata keçiriləcək.
Ümummilli Lider Heydər Əliyevin 100 illik yubileyinə töhfə
Baş nazir Əli Əsədov "Şuşa şəhərinin 2023-cü il üçün "Türk dünyasının mədəniyyət paytaxtı" elan edilməsi ilə bağlı Tədbirlər Planı"nın təsdiq edilməsi haqqında sərəncam imzalayıb. Sərəncama əsasən, tədbirlər planında nəzərdə tutulmuş tədbirlərin həyata keçirilməsi üzrə əlaqələndirici orqan Mədəniyyət Nazirliyi müəyyən edilib.
Tədbirlər planında "Şuşa - Türk dünyasının mədəniyyət paytaxtı 2023" ilinin rəsmi açılışının mart, "Xarıbülbül" VI Beynəlxalq Folklor Festivalının keçirilməsi isə may ayına planlaşdırılıb. Cari il ərzində "Şuşa - Türk dünyasının mədəniyyət paytaxtı" ili ilə bağlı internet resurslarının və xatirə materiallarının hazırlanması: - "Şuşa - Türk dünyasının mədəniyyət paytaxtı 2023" ili ilə əlaqədar poçt markalarının və xatirə nişanının, Şuşa şəhərinin elektron xəritəsinin və mobil tətbiqinin hazırlanması, "Türk dünyasının mədəniyyət paytaxtı - Şuşa" portalının yaradılması da nəzərdə tutulub.
May-iyun ayları ərzində Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş I Türk Dünyası Mədəniyyət Forumunun təşkili və bu çərçivədə: - Beynəlxalq Türk Akademiyası ilə birgə türk dünyasında ortaq mədəni irsin, tarix-memarlıq abidələrinin qorunması, bərpası və tanıdılmasına həsr olunmuş tədbirin, TÜRKSOY-a üzv ölkələrin UNESCO Milli Komissiyalarının 9-cu Toplantısının, Türk Dünyasının Mədəni Marşrutu layihəsinin təqdimatının, Türk dünyası mədəniyyət paytaxtlarının Şuşa şəbəkəsinin yaradılması və ilk görüşünün, TÜRKSOY Muzeylər Birliyinin toplantısının keçirilməsi nəzərdə tutulub.
"Qorqud Ata Türk Dünyası"
İyunda Şuşa şəhərində beynəlxalq uşaq yaradıcılıq festivalının, sentyabrda türk dünyası diaspor gənclərinin görüşünün, oktyabrda TÜRKSOY Mədəniyyət Nazirlərinin Daimi Şurasının növbəti iclasının keçirilməsi və mədəni tədbirlərin təşkili: - "Four seasons of Shusha" layihəsi çərçivəsində ilin dörd fəslində xarici fotoqraflar tərəfindən Şuşada lentə alınmış fotolardan ibarət sərginin təşkili, türk dünyası musiqiçilərindən ibarət yığma orkestrin konserti, həmçinin "Qorqud Ata Türk Dünyası" Film Festivalının keçirilməsi nəzərdə tutulub.
İyul-sentyabr ayları ərzində Şuşada türk dünyasının tanınmış şair və yazıçılarının iştirakı ilə ədəbi-bədii tədbirlər baş tutacaq. Məsələn, Vaqif Poeziya Günləri çərçivəsində TÜRKSOY-a üzv ölkələrin şairlərinin görüşü, Mir Möhsün Nəvvab Qarabağinin 190 illiyinə həsr olunmuş sərginin təşkili və "Mir Möhsün Nəvvab Qarabağinin silah kolleksiyası" adlı kitab-kataloqun təqdimatı, "Məclisi-üns" ədəbi məclisinin təşkili həyata keçiriləcək.
Həmçinin il ərzində TÜRKSOY, Beynəlxalq Türk Mədəniyyəti və İrsi Fondu, Beynəlxalq Türk Akademiyası ilə birgə layihələr keçiriləcək.
Cari il ərzində Şuşada TÜRKSOY fotoqraflar və rəssamlar, "Wonderland Şuşa 2023" beynəlxalq skaut, "Şuşa yaradıcılıq emalatxanası" beynəlxalq gənclər düşərgələri təşkil olunacaq.
"Xarıbülbül əfsanəsi"
TÜRKSOY Media Mükafatının (2022-ci ilin yekunlarına dair) təqdimatı, türk dünyası xalqlarının adət və ənənələrini özündə əks etdirən tədbirlərin təşkili: - Türk dünyası xalqlarına məxsus qədim idman növlərinin nümayiş etdirilməsi, türk dünyası xalqlarının kulinariya günlərinin keçirilməsi, türk dünyası dövlətlərinin aktiv və mədəni turizm sahəsində səyahətçi, bloqçu və digər şəxslərin Şuşaya səfərlərinin təşkili, "Şuşa - Türk dünyasının mədəniyyət paytaxtı" ili çərçivəsində beynəlxalq konfrans, elmi seminar və digər tədbirlərin keçirilməsi, "Türk dünyası: ortaq tarixi-mədəni dəyərlər, müasir reallıqlar və gələcəyə baxış", "Əhməd bəy Ağaoğlu və Türk dünyası", "Şuşa Türk dünyası tarixində" mövzusunda beynəlxalq konfranslar, "Orta əsr mənbələrində və müasir dövr tədqiqatlarında Qarabağ və Şuşa" mövzusunda elmi seminar, "Xarıbülbül əfsanəsi" sənədli filminin təqdimatı 2023-cü il ərzində həyata keçiriləcək.
Noyabr-dekabr aylarında isə "Şuşa - Türk dünyasının mədəniyyət paytaxtı 2023" ilinin rəsmi bağlanışı olacaq.
Göründüyü kimi, artıq tarixi yurdumuz Şuşa əzəli şan-şöhrətini də bərpa edib. 2021-ci ildə Prezident İlham Əliyev tərəfindən Azərbaycanın mədəniyyət paytaxtı elan edilən Şuşa bu il də türk dünyasının mədəniyyət paytaxtı kimi mədəni irsinin möhtəşəmliyini dünyaya sərgiləyəcək, türk dünyasını qürurlandıracaq.
Yasəmən MUSAYEVA,
"Azərbaycan"
