Prezident İlham Əliyevin sərəncamı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cü illər üçün Dövlət Proqramı"nda qarşıya qoyulan vəzifələrin icrasını təmin etmək məqsədilə bölgələrdə zəruri tədbirlər həyata keçirilir, əmək ehtiyatları səfərbər edilir, görüləcək işlər müəyyənləşdirilir.
Bu günlər ölkənin bütün bölgələrində olduğu kimi, Tərtərdə də diqqətçəkən canlanma hiss olunur. Tərtər havası təmiz, suyu saf, torpağı münbit, ən başlıcası isə, sakinləri əməksevər, zəhmətə, torpağa bağlı insanlardır. Ermənistan silahlı qüvvələrinin işğalçılıq niyyətlərinə qarşı mübarizədə əsl qəhramanlıq nümunəsi göstərərək düşmənə bir qarış torpaq da güzəşt etməmiş tərtərlilər bu gün əmək meydanında xarüqələr göstərir, ölkə iqtisadiyyatının güclənməsinə sanballı töhfələr verirlər. Təsadüfi deyil ki, Ermənistan faşistlərinin Tərtərə raket və artilleriya mərmilərini dolu kimi yağdırdığı ağır və gərgin günlər Prezident, Silahlı Qüvvələrin Ali Baş Komandanı İlham Əliyev dəfələrlə bölgəyə səfər etmiş, tərtərlilərin fədakarlığını əsl qəhrəmanlıq kimi qiymətləndirmişdir.
Qarabağ iqtisadi rayonuna daxil olan Tərtər coğrafi mövqeyi və strateji əhəmiyyət baxımından ölkənin vacib bölgələrindən biri kimi tanınır. Yüksək məhsuldarlığa malik torpaqları burada kənd təsərrüfatını dinamik inkişaf etdirmək üçün geniş imkan verir. Pambıqçılıq və taxılçılıq aqrar sektorun əsas sahələridir. Heyvandarlıq və baramaçılıq da inkişaf edən sahələrdəndir. Son illər həmçinin rayonda intensiv bağçılığa diqqət nəzərəçarpacaq dərəcədə artıb.
30 illik işğal dövrünün ağrı-acısı şanlı zəfərlə başa çatdıqdan sonra müharibə dövrünün cəbhə bölgəsi kimi tanınan Tərtərdə abadlıq-quruculuq, əkin-biçin işləri səngimək bilmir. Üstəlik, "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nda qarşıya qoyulan vəzifələr Tərtər kəndlisinin fəaliyyətinə yeni istiqamətlər verib, yeni hədəflər müəyyən edib. Tərtər Rayon İcra Hakimiyyətinin başçısı Müstəqim Məmmədovla bu yöndə söhbətimiz yetərincə maraqlı və aktual oldu:
- Çox qürurvericidir ki, dövlətimizin qüdrəti ildən-ilə artmaqdadır. Regionun lider dövlətinə çevrilmiş Azərbaycan bu gün dünya birliyində söz sahibidir. Zəfərimizin baş memarı olan Prezident İlham Əliyev indi dinc quruculuq dövrünün yeni istiqamətlərini müəyyən edib, ölkəmizin iqtisadi qüdrətini artıracaq, əhalinin güzəranını daha da yüksəldəcək, kənd yerlərində faydalı məşğulluğu təmin edəcək yeni hədəfləri gündəmə gətirib. Məlumdur ki, Prezidentin sərəncamı ilə təsdiq olunmuş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nda qarşıdakı 5 il ərzində həyata keçiriləcək tədbirlər öz əksini tapıb. Bu vəzifələrə uyğun olaraq biz də aqrar rayon olaraq tədbirlər planı hazırlamışıq. İstər üzücü müharibə illərində, istərsə də müharibədən sonrakı dinc quruculuq dövründə tərtərlilər dövlətin, Prezident İlham Əliyevin qayğı və diqqətindən güc alıblar, onun doğma və isti nəfəsini, güclü əlini hər zaman kürəklərində hiss ediblər. Dövlət proqramı qarşıya yeni hədəflər qoyub. Tərtər kəndlisi isə yeni hədəflər üçün səfərbərdir. Zamanın sınaqlarından həmişə uğurla çıxan tərtərlilər qarşıdakı 5 ilin hər gününə, hər ayına zəfər möhürü vurmaq əzimindədirlər.
İndi Tərtər rayonunda təsərrüfat işlərinin qızğın çağıdır. Havaların əlverişsiz keçməsinə baxmayaraq, fermerlər zəmilərin məhsulunu tez və itkisiz yığıb tədarük etməyə çalışırlar. Məhsulu biçilən zəmilərin hər hektar üzrə orta məhsuldarlığı hələlik 41,5 sentnerdir. Qabaqcıl fermer təsərrüfatlarında isə bu göstərici 55-60 sentnerə çatıb.
Rayonda pambıqçılığın inkişafına böyük önəm verilir. Torpaq mülkiyyətçiləri strateji məhsul olan pambığın bolluğunda maraqlıdırlar. Təsərrüfatlarda pambıq əkinlərinin genişləndirilməsi kəndlərdə əhalinin faydalı məşğulluğunu təmin etməklə yanaşı, torpaq mülkiyyətçilərinin ailə büdcəsinə də əhəmiyyətli təsir göstərir. Ölkəyə valyuta gətirən pambıq ixracının artırılmasında maraqlı olan dövlət bu sahənin inkişafı üçün kompleks tədbirlər görür, əhəmiyyətli gücə malik subsidiyalar tətbiq edir. Son 10 ildə Tərtər pambıqçıları böyük nailiyyətlər qazanıblar. Əgər 2016-cı ildə pambıq tarlalarında hər hektarın orta məhsuldarlığı 22,5 sentner idisə, keçən il bu rəqəm 37,6 sentnerə yüksəlib. İndi pambıq tarlalarında becərmə işləri yüksək aqrotexniki qaydalar əsasında davam edir. Bu il rayon üzrə 2117,7 hektarda pambıq əkilib. Rayonda fəaliyyət göstərən "Prime Cotton", "Azərpambıq" və "Elakoton" Məhdud Məsuliyyətli cəmiyyətlərin filialları torpaq mülkiyyətçiləri ilə bağladıqları müqavilələrin şərtlərinə doğru-dürüst əməl edir, pambıqçıların üzləşdikləri çətinliklərin operativ qaydada aradan qaldırılmasınada yardımçı olurlar.
Tərtərdə qabaqcıl pambıqçılardan söz düşəndə Bəyimsarov kəndində Birinci dərəcəli "Əmək" ordenli Fazil Vəliyevin adı hörmətlə çəkilir. Qabaqcıl fermer bu il 45 hektar sahədə pambıq əkib. Qayğı ilə becərilən tarlalar bol məhsuldan xəbər verir. Fazil Vəliyev deyir ki, dövlət proqramının birinci ilinə sanballı töhfə vermək əzmindəyik: "Bu il hər hektardan 55 sentnerdən çox məhsul götürməkdə qərarlıyıq. Bizim torpaqlar çoxverimlidir. Çəkilən zəhmətin, axıdılan alın tərinin əvəzini hər zaman birə min qaytarır".
Mütərəqqi texnologiyaların, qabaqcıl təcrübənin bacarıqla tətbiq edildiyi və qarşılığında fərəhli nəticələrin qazanıldığı fermer təsərrüfatlarından birinə Mirzə Cümşüdov rəhbərlik edir. Rayonun İsmayılbəyli kəndində yerləşən fermer təsərrüfatının üzvləri pambıqçılıq və taxılçılıqla yanaşı, intensiv bağçılığa da böyük önəm verirlər. Müasir standartlara uyğun qurulan bağların ümumi sahəsi 50 hektardır. Onun 31 hektarında nektarin, 15 hektarında gilas, 4 hektarında ərik yetişdirilir. Hazırda bağlarda 50 nəfər çalışır. Məhsuldarlıq qənaətbəxşdir. Ağaclar mütərəqqi damlama üsulu ilə suvarılır.
Xoruzlu kəndində fəaliyyət göstərən "Patron" MMC ölkədə yaxşı tanınır. MMC-nin maliyyə direktoru Emin Məmmədovla maraqlı söhbətimiz oldu. Öyrəndik ki, "Patron" şirkətinin 25-dən çox hazır məhsul çeşidi var. Günəbaxan tumunun emalı və qablaşdırılmasından başqa, şirniyyat, qarğıdalı, "suxarik" kimi çeşidlər də istehsal edilir. Məhsullardakı əsas fərqlilik ondan ibarətdir ki, xüsusi texnologiya dəniz duzu ilə duzlanma üsulunu tətbiq etməyə imkan verir. Bunu ilk dəfə "Patron" şirkəti tətbiq edib. Məhsullar tam gigiyenik qaydalar əsasında istehsal olunur. Şirkətdə çalışan daimi işçilərin sayı 400 nəfərə yaxındır. "Patron" şirkətinin səmərəli fəaliyyəti ölkəmizdə sahibkarlığın inkişafına dövlətin göstərdiyi davamlı qayğı və diqqətin sayəsində mümkün olub.
Son illər Tərtərdə intensiv bağçılıq sahələri sürətlə genişlənir. Yeni yaradılmış "Frutti Aqro" MMC-nin ümumi əkin sahəsi 315 hektardır. Bunun 175 hektarını xurma, 70 hektarını nektarin, 44 hektarını şaftalı, 16 hektarını əncir, 10 hektarını ərik bağları təşkil edir. Müəssisənin 60 nəfər daimi, 200 nəfər mövsümi işçisi var.
Rayonda intensiv bağçılığın inkişafından danışarkən "Aznektarin" və "Tərtər 1" MMC-lər də qeyd olunmalıdır. "Aznektarin" 164, "Tərtər 1" 98 hektarda müxtəlif növ meyvələr yetişdirirlər.
Hər zaman dövlətinə güvənən, Prezident İlham Əliyevin dəstəyindən güc alan tərtərlilər taxıl zəmilərində, pambıq tarlalarında, meyvə bağlarında beləcə nümunə göstərirlər.
Lazım QULİYEV,
"Azərbaycan"
jpeg_1782773312.jpeg)
jpg_1782806998.jpg)
