Lerik
Mədəniyyət Mərkəzində keçirilən konfransda rayon icra hakimiyyətinin başçısı Əkbər Abbasov, Lənkəran-Astara Regional Təhsil İdarəsinin müdiri Bəhruz Mehdiyev, təhsil işçiləri, ictimaiyyət nümayəndələri iştirak ediblər.
Ümummilli Lider Heydər Əliyevin abidəsinin ziyarəti ilə başlayan konfransda şəhidlərin xatirəsi birdəqiqəlik sükutla yad edilib və Azərbaycan Respublikasının Dövlət Himni səsləndirilib.
RİH-in başçısı Əkbər Abbasov çıxışında yeni tədris ilinin başlanması münasibətilə təhsil işçilərini təbrik edib və onlara fəaliyyətlərində uğurlar arzulayıb. Təhsil sahəsində görülən işlərdən söhbət açaraq müəllim və təhsil işçilərinin fəaliyyətini yüksək qiymətləndirib. Lənkəran-Astara Regional Təhsil İdarəsinin müdiri Bəhruz Mehdiyev isə ötən tədris ilinin nəticələrindən danışıb, tədrisin keyfiyyətinin artırılması, təhsil müəssisələrinin fəaliyyətində səmərəliliyin yüksəldilməsi ilə bağlı qarşıda duran vəzifələri diqqətə çatdırıb.
Sonra Regional Təhsil İdarəsinin məsləhətçisi Hicran İbrahimov 2025-2026-cı tədris ilinin yekunlarına dair hesabat təqdim edib. Hesabatda rayonun ümumi və məktəbəqədər təhsil müəssisələrinin fəaliyyəti, imtahanların nəticələri, əvvəlki illərlə müqayisəli göstəricilər, əldə olunan nailiyyətlər, eləcə də mövcud çətinliklər və onların səbəbləri təhlil edilib.
Konfransda yeni tədris ilində nəticələrin yüksəldilməsi, məktəbdaxili qiymətləndirmənin səmərəli təşkili, şagirdlərlə məqsədyönlü işin gücləndirilməsi, müəllimlərin peşəkar inkişafının dəstəklənməsi, məktəb idarəetməsinin təkmilləşdirilməsi əsas fəaliyyət istiqamətləri kimi diqqətə çatdırılıb, təhsil müəssisələrinin rəhbərlərinə müvafiq tövsiyələr verilib.
Yardımlı
Rayon icra hakimiyyətinin başçısı Ayaz Əsgərov, Lənkəran-Astara Regional Təhsil İdarəsinin sektor müdiri Namiq Aslanov, rayon üzrə Təhsil sektorunun müdiri Kamal Təhməzov və təhsil işçilərinin iştirak etdikləri konfrans Ümummilli Lider Heydər Əliyevin abidəsinin ziyarəti ilə başlayıb.
Şəhidlərin xatirəsi sükutla yad edildikdən və Dövlət Himni səsləndirildikdən sonra Namiq Aslanov çıxış edib. O, ötən tədris ilinin nəticələrindən danışıb, tədrisin keyfiyyətinin artırılması, nəticələrin sistemli təhlili, müəllimlərin peşəkar inkişafının dəstəklənməsi və təhsil müəssisələrinin fəaliyyətində səmərəliliyin yüksəldilməsi ilə bağlı əsas istiqamətləri diqqətə çatdırıb.
Kamal Təhməzovun 2025-2026-cı tədris ilinin yekunlarına dair təqdim etdiyi hesabatda rayonun ümumtəhsil və məktəbəqədər təhsil müəssisələrinin fəaliyyəti, şagirdlərin qiymətləndirmə və buraxılış imtahanlarının nəticələri, əvvəlki illərlə müqayisəli göstəricilər, əldə olunan nailiyyətlər, eləcə də mövcud çətinliklər və onların səbəbləri ətraflı təhlil edilib.
Konfransda IV və VI siniflər üzrə keçirilmiş monitorinqlərin nəticələri, eləcə də IX və XI siniflər üzrə buraxılış imtahanlarının göstəriciləri əvvəlki illərlə müqayisəli şəkildə təhlil edilib, əldə olunan nəticələrin inkişaf dinamikası və qarşıda duran hədəflər müəyyənləşdirilib.
Yeni tədris ilində təhsil nəticələrinin yüksəldilməsi, məktəbdaxili qiymətləndirmənin səmərəli təşkili, şagirdlərlə məqsədyönlü işin gücləndirilməsi, müəllimlərin peşəkar inkişafının dəstəklənməsi və məktəb idarəetməsinin təkmilləşdirilməsi əsas fəaliyyət istiqamətləri kimi diqqətə çatdırılıb.
Konfrans qarşıda duran vəzifələr və yeni tədris ilinin əsas hədəfləri ətrafında fikir mübadiləsi ilə yekunlaşıb.
Seyran CAVADOV,
"Azərbaycan"
