Yerli fermerlər bu imkandan maksimum yararlanmağa çalışırlar
Özünün füsunkar və əsrarəngiz təbiəti ilə maraq doğuran Gədəbəy Azərbaycanın sevilib-seçilən rayonlarındandır. Burada dağ yamaclarının zirvəsinə qalxdıqca göz oxşayan mənzərələr adamı valeh edir. Yuxarıdan aşağı tamaşa etdikcə elə bil Gədəbəy ayağının altındadır.
Sanki bu yerlər misilsiz gözəlliklər diyarı, zəngin təbiət muzeyidir. İlboyu zirvəsi qarla örtülü olan dağlar, yamyaşıl sərin yaylaqlar, təkrarolunmaz gözəlliyə malik göllər, gur axan çaylar, eləcə də insan əli ilə salınmış əkin sahələri insana zövq verir.
Gədəbəy Aqrar İnkişaf Mərkəzinin direktoru Asəf Nağıyevlə söhbət edirik. Deyir ki, bu yerlərin insanları çox işgüzardır. Yaz gələndən qış aylarına kimi hamını çöldə görmək olar. Onlar kənd təsərrüfatının mühüm sahəsi olan heyvandarlığın inkişafı üçün əllərindən gələni əsirgəmirlər. Bunun üçün rayonun təbii şəraiti də əlverişlidir. Gədəbəy kimi bölgədə heyvandarlığın inkişaf etdirilməsinə heç bir bəhanə ilə bəraət vermək mümkün deyil. Gədəbəyin yaşıl örpəyə bürünən dağ yamacları, axar dağ çayları əraziyə gözəllik bəxş etməklə yanaşı, heyvandarlığın inkişafı üçün də geniş imkanlar yaradır.
Söhbət zamanı öyrəndik ki, hazırda rayonda 41 min başdan çox qaramal, 210 min başdan çox davar var. Təkcə keçən il rayon diri çəkidə 69 min 984 ton ət, 486 min 340 sentner süd təhvil vermişdir. Son ayların göstəriciləri onu deməyə əsas verir ki, bu il keçənilkindən çox heyvandarlıq məhsulları istehsal olunacaq.
Rayonda heyvanlar əsasən Ceyrançol yaylağında saxlanılır. Bu il havaların yağmurlu keçməsi fermerlərin üzünü güldürür. Ərazi qoyunçuluq üçün vacib olan ot örtüyünə bürünmüşdür. Demək olar ki, yem sarıdan heç bir problem yoxdur. Düzlərə səpələnmiş qoyun-quzulara baxdıqca adamın ürəyi dağa dönür. Burada rayonun 100-dən artıq təsərrüfatı yerləşmişdir. Ən böyük təsərrüfat Fərman Çobanoğluna məxsusdur. Fermer təsərrüfatda 2000 baş heyvan saxlayır. Bundan başqa, fermer Mehman Kamayev 1200, Qəşəm Məmmədov 1800 baş qaramala qulluq edir. Qəşəm Məmmədov ildə hər 100 qoyundan 80 baş bala alır.
Fermerlərlə görüşüb söhbət etdik. Qəşəm Məmmədov dedi ki, qədimdən bu ərazi Azərbaycanın qərb bölgəsində heyvandarlıqla məşğul olan insanların həm qış, həm də yaylaq yeri olub. Ucu-bucağı görünməyən və barlı-bərəkətli bu çöllər öz qoynunda bəslədiyi heyvanlarla az qala bütün regionu ət və süd məhsulları ilə təmin edib. Burada bitən yovşanla bəslənən qoyun-quzu ətinin dadı da bir başqadır.
Onu da dedilər ki, elə bir ciddi çətinlikləri yoxdur. Bu yaxınlarda ölkə qəbul edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" çərçivəsində bəzi mövcud problemlərinin həll ediləcəyinə inanırlar. O problemlərdən biri Çeyrançöldə sovetlər birliyi dövründə çəkilmiş su xəttinin yararsız hala düşməsidir. "Neçə illərdir heyvanları sulamaq üçün su maşınlarından istifadə edirik ki, bu da büdcəmizə xeyli ziyan vurur. Hər dəfə su daşınanda 2-3 heyvan sataraq suyun pulunu ödəyirik. Bandan başqa, bizə yaxın rayonlarda əvvəllər fəaliyyət göstərən heyvan satışı bazarları bağlanıb. Odur ki, heyvanları satmaq üçün uzaq rayonlara aparmalı oluruq ki, bu da xeyli vaxt və pul itkisidir. Yaxşı olardı ki, Gədəbəyin özündə heyvan satışı bazarı yaradılsın", - deyə bildirdilər.
Fermerlər onu da dedilər ki, hər il qoyunlardan qırxılan yunun satışında da problemlərlə üzləşirlər. Yaxşı olardı ki, regionda yun və dəri emalı müəssisəsi fəaliyyət göstərsin. Bundan başqa, şikayətləndilər ki, heyvandarlıq dərmanları keyfiyyətsiz olduğundan təsir göstərmir.
Fermerlər cari ildə ət və süd məhsulları istehsalını artırmağı qarşılarına məqsəd qoymuşlar. Onlar yeni dövlət proqramında nəzərdə tutulmuş tədbirlərin vaxtında yerinə yetirilməsi üçün əllərindən gələni əsigəməyəcəklərinə, bütün imkanlardan maksimum istifadə edəcəklərinə söz veriblər.
Sabir ƏLİYEV,
"Azərbaycan"
