Azərbaycanın Şanxay Əməkdaşlıq Təşkilatı ilə əlaqələri keyfiyyətcə yeni mərhələyə qədəm qoyub
Ötən illər ərzində böyük inkişaf yolu keçərək milli maraqlarını qətiyyətlə təmin edən Azərbaycan Prezident İlham Əliyevin yürütdüyü müstəqil və uzaqgörən siyasət sayəsində dünyanın hər yerindən görünən, beynəlxalq səviyyədə hər addımı maraq və diqqətlə izlənilən, əksər ölkələrin qarşılıqlı hərtərəfli əlaqələr qurmağa səy göstərdiyi nüfuzlu ölkəyə çevrilib. Bu gün Azərbaycan dünya miqyasında etibarlı tərəfdaş, regional güc mərkəzi və Qlobal Şimal ilə Qlobal Cənub arasında mühüm korpü rolunu oynayır. Avropa və Asiyanın kəsişməsində strateji mövqeyi, yaratdığı nəqliyyat-logistika qovşaqları ölkəmizin beynəlxalq siyasətdəki çəkisini və dövlətimizin başçısının qlobal ehtiramını daha da artırıb.
Prezident İlham Əliyevin Şanxay Əməkdaşlıq Təşkilatının (ŞƏT) Bişkekdə keçirilən 25 illik yubiley Zirvə toplantısında iştirakı və burada keçirdiyi ikitərəfli yüksək səviyyəli görüşlər də bunun bariz göstəricisidir.
Beynəlxalq əməkdaşlıq əlaqələri
Azərbaycanın həyata keçirdiyi düzgün xarici siyasət kursu ona mühüm beynəlxalq əməkdaşlıq əlaqələri qurmağa geniş imkanlar açıb. Ölkəmiz BMT, İslam Əməkdaşlıq Təşkilatı və Türk Dövlətləri Təşkilatı kimi aparıcı qurumların fəal üzvü olmaqla yanaşı, Qoşulmama Hərəkatına uğurla sədrliyi və COP29 kimi qlobal tədbirlərə yüksək səviyyəli evsahibliyi etməsi ilə özünü dünyada etibarlı platforma kimi təsdiqləyib.
Regionda yaratdığı sülh şəraiti ilə, həm də Avrasiya məkanında təhlükəsizlik, sabitlik və iqtisadi inteqrasiyanın möhkəmlənməsinə töhfə verən Azərbaycan müxtəlif beynəlxalq platformalarda öz milli maraqlarını qətiyyətlə qoruyur, eyni zamanda sivilizasiyalararası dialoqun inkişafına şərait yaradır.
Yürüdülən balanslı və çoxşaxəli diplomatiyanın məntiqi nəticəsi kimi, Azərbaycanın Avrasiya regionunun ən nüfuzlu siyasi-iqtisadi bloklarından biri olan Şanxay Əməkdaşlıq Təşkilatı ilə əlaqələrinin də son illərdə keyfiyyətcə yeni mərhələyə qədəm qoyması təəccüblü deyil. Təşkilatın iqtisadi, təhlükəsizlik və nəqliyyat gündəliyi ilə ölkəmizin strateji hədəflərinin üst-üstə düşməsi bu platforma daxilindəki əməkdaşlığı daha da aktuallaşdırır.
Adıçəkilən təşkilatla 2016-cı ildən dialoq tərəfdaşı olan ölkəmiz, 2025-ci il Tiencin Sammitində qəbul edilən qərara əsasən rəsmi olaraq “ŞƏT tərəfdaşı” statusunu alıb. Bu məanada təşkilatın Bişkekdə keçirilən Zirvə toplantısında Prezident İlham Əliyevin iştirakı mühüm əhəmiyyət kəsb etdi. Həmçinin burada keçirdiyi ikitərəfli yüksək səviyyəli görüşlər Azərbaycan diplomatiyasının növbəti böyük uğuru oldu.
Avqustun 31-də Prezident İlham Əliyevin Bişkekdə ŞƏT Zirvə toplantısı çərçivəsində Qazaxıstan Prezidenti Kasım-Jomart Tokayev ilə, İran İslam Respublikasının Prezidenti Məsud Pezeşkian və Ermənistan baş naziri Nikol Paşinyanla görüşü olub. Ölkəmizin rəhbəri həmçinin sentyabrın 1-də Türkiyə Prezidenti Rəcəb Tayyib Ərdoğanla görüşüb.
Yüksək səviyyəli görüşlər
Qazaxıstan Prezidenti Kasım-Jomart Tokayev ilə keçirilən görüşdə ölkələrimiz arasında strateji tərəfdaşlıq və müttəfiqlik əlaqələrinin uğurla inkişaf etdiyi qeyd olunub, münasibətlərimizin dərinləşdirilməsində yüksək səviyyədə qarşılıqlı səfərlərin və təmasların önəmi vurğulanıb. Nəqliyyat-logistika məsələləri müzakirə olunub, Orta Dəhlizin əhəmiyyətinə toxunulub, bu istiqamətdə Azərbaycanla Qazaxıstan arasında əməkdaşlığın perspektivlərinə dair fikir mübadiləsi aparılıb.
Dövlətimizin başçısının İran Prezidenti Məsud Pezeşkian ilə görüşü zamanı İran Prezidenti ölkəsinin üzləşdiyi bu çətin vəziyyətdə Prezident İlham Əliyevin mövqeyinin, nümayiş etdirdiyi dəstəyin, verdiyi başsağlığının, həmçinin Azərbaycan tərəfindən göstərilən humanitar yardımın İran dövləti və xalqı tərəfindən çox yüksək qiymətləndirildiyini vurğulayıb.
Əlaqələrimizin inkişaf etdirilməsi üçün çox yaxşı imkanların olduğunu deyən İran Prezidenti Azərbaycanla bütün sahələrdə münasibətləri genişləndirməkdə maraqlı olduqlarını qeyd edib.
Dövlətimizin başçısı da öz növbəsində İranın üzləşdiyi bu şəraitdə Azərbaycanın yardımının qardaşlıq nümunəsi olduğunu vurğulayıb və ölkəmizin İranla bağlı yaranmış vəziyyətin sülh və danışıqlar yolu ilə həllinin tərəfdarı olduğunu bildirib.
Ermənistan Baş naziri Nikol Paşinyanla görüş zamanı liderlər 2025-ci il 8 avqust tarixli Vaşinqton Sülh Zirvə görüşünün, ABŞ Prezidenti Donald Trampın şahidliyi ilə Prezident İlham Əliyevin və Baş nazir Nikol Paşinyanın imzaladıqları Birgə Bəyannamənin, həmçinin “Azərbaycan Respublikası ilə Ermənistan Respublikası arasında sülhün və dövlətlərarası münasibətlərin təsis olunması haqqında Saziş”in razılaşdırılmış mətninin paraflanmasının tarixi əhəmiyyətini vurğulayıblar.
Prezident İlham Əliyev və Baş nazir Nikol Paşinyan birbaşa ikitərəfli təmaslar vasitəsilə davamlı sülhün daha da möhkəmləndirilməsi, dövlətlərarası münasibətlərin normallaşdırılması prosesinin irəlilədilməsi və bağlantıların gücləndirilməsi istiqamətində addımları davam etdirmək barədə razılığa gəliblər.
Sentyabrın 1-də Türkiyə Prezidenti Rəcəb Tayyib Ərdoğanla görüş zamanı Azərbaycan-Türkiyə ikitərəfli münasibətlərinin qardaşlıq və strateji müttəfiqliyə əsaslandığı vurğulanaraq, bütün istiqamətlər üzrə əlaqələrin daha da genişlənməsindən məmnunluq ifadə olunub.
Ölkələrimizin “Bir millət, iki dövlət” prinsipinə uyğun olaraq həm xoş, həm də çətin günlərdə daim bir-birinin yanında olduğu xüsusi qeyd edilib. Eyni zamanda regional sülhün və sabitliyin daha da möhkəmləndirilməsi ilə bağlı fikir mübadiləsi aparılıb.
Bütün bunlar bir daha göstərir ki, Azərbaycanın Şanxay Əməkdaşlıq Təşkilatı kimi nəhəng platformada fəal təmsil olunması sadəcə diplomatik uğur deyil, həm də ölkəmizin milli maraqlarının, iqtisadi və geosiyasi gələcəyinin parlaq təminatıdır.
Ümumiyyətlə, Prezident İlham Əliyevin rəhbərliyi ilə həyata keçirilən bu uzaqgörən xarici siyasət Azərbaycanı təkcə regionda deyil, qlobal arenada söz sahibi olan, hörmət edilən və qərarları ilə hesablaşılan güclü siyasi mərkəzə çevirib. Bu yolda atılan hər bir addım dövlətimizin qüdrətinin və xalqımızın rifahının daha da artmasına xidmət edir.
Yasəmən MUSAYEVA,
“Azərbaycan”
