Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqovun rəhbərlik etdiyi nümayəndə heyəti noyabrın 5-6-da Koreya Respublikasının paytaxtı Seulda keçirilən Asiya Siyasi Partiyaları Beynəlxalq Konfransının (ICAPP) 13-cü Baş Assambleyasında iştirak edib.
AZƏRTAC xəbər verir ki, 36 ölkədən 83 siyasi partiyanın nümayəndələrinin qatıldığı tədbir “Dəyişən dünyada etimadın bərpası” mövzusuna həsr olunub. Açılış mərasimində Koreya Respublikasının Prezidenti Li Ce Myunun tədbir iştirakçılarına videomüraciəti təqdim olunub, “Mincu” (Demokratik) Partiyasının rəhbəri Kim Min-seok, Xalqın Gücü Partiyasının rəhbəri Canq Donq-hyeok, ICAPP Daimi Komitəsinin sədri Çunq Eu-yonq və Milli Assambleyanın sədri Ço Ceonqsik çıxış ediblər.
Baş Assambleyada siyasi partiyalar arasında dialoqun inkişafı, qarşılıqlı etimadın möhkəmləndirilməsi, dayanıqlı sülh və sabitliyin təşviqi, süni intellektin imkanlarından istifadə və iqlim dəyişikliyi ilə mübarizə məsələləri müzakirə edilib.
Birinci plenar sessiyada çıxış edən Tahir Budaqov Azərbaycanın ərazi bütövlüyünü bərpa etməsinin regionda sülh və əməkdaşlıq üçün yaratdığı yeni imkanlardan, Qarabağ və Şərqi Zəngəzurda aparılan quruculuq işlərindən, innovasiyaların tətbiqi və ətraf mühitin mühafizəsi sahəsində görülən tədbirlərdən bəhs edib. O, həmçinin YAP-ın təşkilatçılığı ilə Şuşada keçirilən beynəlxalq konfransların siyasi dialoqun və partiyalararası əməkdaşlığın inkişafındakı əhəmiyyətini vurğulayıb.
Qeyd edək ki, Tahir Budaqov Azərbaycan, Banqladeş, Çin, Malayziya və Vyetnam nümayəndələri ilə birlikdə 13-cü Baş Assambleyanın Büro sədrinin müavini seçilib.
Noyabrın 6-da Baş Assambleya çərçivəsində keçirilən ICAPP Media Forumunun 8-ci iclasında çıxış edən Milli Məclisin deputatı, “İki sahil” qəzetinin baş redaktoru Vüqar Rəhimzadə süni intellektin jurnalistikaya təsiri, dezinformasiyaya qarşı mübarizə və etibarlı informasiya mühitinin qorunmasının əhəmiyyətindən danışıb.
Bağlanış sessiyasında plenar sessiyaların və ICAPP Media Forumunun 8-ci iclasının nəticələrinə dair hesabatlar təqdim olunub, Seul Bəyanatı qəbul edilib. 14-cü Baş Assambleyaya 2028-ci ildə ev sahibliyi edəcək Vyetnam Kommunist Partiyasının nümayəndələrinə təşkilatın bayrağı və sədr çəkici təqdim olunub.
314444444 - Copyjpg_1793831795.jpg)
