Suriyanın keçid dövrü Prezidenti Əhməd Əl Şaraa ölkəsinin yenidənqurma, sabitlik, regional və beynəlxalq güclərlə balanslı münasibətlərə əsaslanan xarici siyasət yürütdüyünü bildirib, İsrail ilə gələcək təhlükəsizlik razılaşması və ABŞ sanksiyalarının ləğvindən sonra iqtisadi açılımla bağlı fikirlərini ifadə edib.
AZƏRTAC xəbər verir ki, Suriya lideri “Əl Cəzirə” telekanalına müsahibəsində Dəməşqin strateji mövqeyinin və iqtisadi potensialının devrilmiş rejim tərəfindən onilliklər boyu təcrid olunaraq sarsıldığını bildirib. O əlavə edib ki, ölkənin yeni rəhbərliyi regional və beynəlxalq rolunu bərpa etməyə çalışır.
Əl Şaraa Ağ Evə səfərindən və Vaşinqtonun sanksiyaları ləğv etmək qərarından sonra Suriyanın ABŞ ilə münasibətlərinin yaxşılaşdığını bildirib və bu inkişafı ikitərəfli əlaqələrdə yeni mərhələnin başlanğıcı kimi xarakterizə edib.
O, Suriyanın Avropa ölkələri, Rusiya və Çindən də müsbət cavab aldığını bildirib və əlavə edib ki, Dəməşq yeni siyasi vizyonunu beynəlxalq ictimaiyyətə uğurla çatdırıb.
Rusiyaya gəldikdə, Əl Şaraa bildirib ki, Suriyanın azad edilməsi zamanı təmaslar başlayıb və RF-nin hava bazasında və Tartus dəniz obyektinin bir hissəsində hərbi mövcudluğunu məhdudlaşdırmaq barədə razılığa gəlinib. Bu bazaların gələcəyi ilə bağlı müzakirələr davam edir.
O bildirib ki, Suriya münasibətləri yenidən müəyyənləşdirmək və istiqamətini düzəltməklə yanaşı, Moskva ilə tarixi münasibətlərinin Suriyanın maraqlarına xidmət edən aspektlərini qorumaq niyyətindədir.
Keçid dövrü Prezidenti, həmçinin ticarət, investisiya, təhlükəsizlik əməkdaşlığı və Avropada, xüsusən də Almaniyada böyük suriyalı qaçqın icmalarının mövcudluğu da daxil olmaqla Qərb ölkələri ilə ortaq maraqlara diqqət çəkib.
