Qaxda “Təbiətdə STEAM – 2” layihəsi həyata keçirilib. Bu, ölkənin bölgələri arasında ilk beynəlxalq süni intellekt təlim proqramıdır.
AZƏRTAC-ın bölgə müxbiri xəbər verir ki, məqsəd müəllimlərin süni intellekt və STEAM sahəsində bilik və bacarıqlarını artırmaq, onları müasir təhsil texnologiyaları ilə tanış etmək və məktəblərdə innovativ tədris yanaşmalarının tətbiqinə dəstək verməkdir. Türkiyənin Manisa şəhərində yerləşən Celal Bayar Universitetin müəllimi və Steam Eyitimcileri Dərnəyinin İdarə Heyətinin sədri Mehmet Nuri Öğütün tədris etdiyi "Süni intellekt və STEAM inteqrasiyası" təliminə ölkənin müxtəlif bölgələrini əhatə edən müəllimlər iştirak ediblər.
Layihə müəllimlər üçün interaktiv təlim və inkişaf proqramıdır. Proqramda ümumilikdə 80-dək müəllim iştirak edib. İştirakçılar 8 komanda şəklində müxtəlif praktik fəaliyyətlərə, atelyelərə, komanda oyunlarına və layihəəsaslı tapşırıqlara cəlb edilib.
Tarix üzrə fəlsəfə doktoru, layihə rəhbəri Elvin Əliyev deyib ki, bu gün süni intellekt həyatımızın bütün sahələrində hiss olunmağa və yer tutmağa başlayıb. Bu mənada belə proqramların öyrənilməsinə təşkilinə böyük ehtiyac var. Bu baxımdan layihənin 2-ci mərhələsi Qaxda təşkil edilib.
O bildirib ki, beynəlxalq təlim proqramının bu mərhələsində 10 yaxın bölgədən müəllimlər iştirak ediblər. Lakin ona qatılmaq, iştirak edərək süni intellektin STEAM-da inteqrasiyasını öyrənmək və təhsildə tətbiq etmək istəyən yüzlərlə müəllim var.
Layihə rəhbəri əlavə edib ki, artıq belə layihələr regionlarda daha çox marağa və diqqətə səbəb olur. Bu da bölgədə çalışan təhsil işçilərinin gələcək fəaliyyətlərini dünya təhsil sisteminə uyğunlaşdırmaq istəyindən xəbər verir: “Düşünürük ki, müəllimlərin əldə etdikləri biliklər, bacarıqlar növbəti tədris illərində onların öz tədrislərinə tətbiqinə köməklik edəcək. Növbəti illərdə tək yay aylarında deyil, həm də digər fəsillərdə də bölgələrdə layihəni davam etdirməyə zərurət yaranıb”.
Üç gün ərzində iştirakçılar “Süni intellektin təhsildə tətbiqi”, “STEAM yanaşmasının dərs prosesinə inteqrasiyası”, “ChatGPT”, “Claude”, “Gemini”, “Canva”, “Suno” və digər AI alətləri ilə praktik iş”, “Prompt mühəndisliyi və effektiv süni intellekt istifadəsi”, “Layihə yazımı və AB/Erasmus+, TR-AZ əməkdaşlıq imkanları”, “Komanda əsaslı öyrənmə və təqdimat bacarıqları”, “Müəllimlər üçün beynəlxalq səviyyəli sertifikatlandırma” mövzularında müzakirə və diskussiyalar aparılıb, bilik və bacarıqlarını yoxlayıb, fərdi və komanda şəklində tapşırıqlar icra ediblər.
Türkiyənin Manisa şəhərində yerləşən Celal Bayar Universitetin müəllimi və STEAM Dərnəyinin İdarə Heyətinin sədri, beynəlxalq dərəcəli təlimçi Mehmet Nuri Öğütün ölkəmizdə bir neçə dəfə təlimlərə qatıldığını, lakin bölgələrdə belə təlimin ilk olduğunu və ucqar bir rayonda təlim proqramına bu qədər böyük maraq olmasını yüksək qiymətləndirib.
O deyib ki, Azərbaycanda elm və təhsilə böyük maraq var. Bu beynəlxalq təlim proqramına müəllimlərin qatılmasını, müzakirə və görüşlərdə aktivliyin yüksək olmasını misal çəkmək olar: “Dünyada səhiyyə, avtomatik, təhsil bir sözlə bütün sahələrdə süni intellektlə bağlı çox böyük yeniliklər, inkişaf baş verir. Müəllimlərə sinifdə süni intellekti necə tətbiq etmələri barədə ətraflı məlumat verilir, tətbiqetmə üsulları izah olunur. Bu əməkdaşlıq, həm də dostluğa çevrilir. Təlimə qatılan müəllimlərlə gələcəkdə onlayn görüşlər davam etdiriləcək”.
Təlim proqramının əsas mövzusu “Süni İntellekt və STEAM İnteqrasiyası” olub. Belə ki, təlim çərçivəsində müəllimlər süni intellekt alətlərinin tədrisdə istifadəsi, STEAM yanaşmasının dərs prosesinə inteqrasiyası, rəqəmsal məzmun hazırlığı, prompt mühəndisliyi və layihə yazımı üzrə praktik biliklər əldə ediblər. Beynəlxalq təlim proqramı yalnız klassik təlim formatı ilə məhdudlaşmayıb. İştirakçılar Qaxın təbiət mühitində həm öyrənib, həm də komanda fəaliyyətləri, yaradıcı tapşırıqlar, süni intellekt atelyeləri, layihə hazırlığı və təqdimatlar vasitəsilə təcrübələrini inkişaf etdiriblər. Təlim proqramının sonunda iştirakçılara beynəlxalq səviyyəli iştirak sertifikatı təqdim olunub. Bundan əlavə, komanda fəaliyyətləri və təqdimatlar əsasında fərqlənən iştirakçılar və komandalar üçün xüsusi mükafatlar verilib.
