Bakıda keçirilən “Müasir Kənd Təsərrüfatı Əməkdaşlığı: Davamlı İnkişafın Təməli və Ərzaq Təhlükəsizliyinin Qarantı Kimi” adlı konfransda kənd təsərrüfatı naziri Məcnun Məmmədov sektorda mövcud vəziyyət və gələcək inkişaf perspektivləri barədə danışıb.
Nazir bildirib ki, hazırda kənd təsərrüfatı Azərbaycanın ümumi daxili məhsulunun (ÜDM) təxminən 5–6 faizini təşkil edir, lakin məşğulluğun 25 faizdən çoxu bu sektorda cəmlənib. “Bu baxımdan biz anlayırıq ki, kənd təsərrüfatı həm mühüm iqtisadi, həm də çox vacib sosial rol oynayır. Məhz buna görə də Azərbaycanda kənd təsərrüfatının inkişafı üçün həyata keçirdiyimiz siyasətin hazırlanmasına və formalaşdırılmasına bu prizmadan yanaşmalıyıq”, – deyə nazir vurğulayıb.
Məcnun Məmmədov kənd təsərrüfatı sektorunda iqlim dəyişikliyi ilə bağlı problemlərin olduğunu qeyd edib və əlavə edib ki, regiondakı, xüsusilə Körfəz və Ukrayna bölgələrindəki təhlükəsizlik çağırışları da yeni risklər yaradır.
Su qıtlığı məsələsinə toxunan nazir bildirib ki, ölkənin su ehtiyatlarının 70 faizi xaricdən asılıdır. Bu problemin həlli üçün bir sıra tədbirlər görülür: “İlk növbədə, su anbarlarının yaradılması və su toplama sistemlərinin qurulması istiqamətində işlər aparılır. Kiçik, orta və ya böyük ölçülü olmasından asılı olmayaraq, hökumət hazırda ölkə üzrə genişmiqyaslı layihələr həyata keçirir. Suyun düzgün idarə olunması üçün isə açıq torpaq kanalları ilə daşınmadan beton kanallara və hətta qapalı boru kəmərlərinə keçid vacibdir”, – nazir əlavə edib.
Məcnun Məmmədovun sözlərinə görə, bu tədbirlər kənd təsərrüfatında məhsuldarlığın artırılması və ərzaq təhlükəsizliyinin təmin olunmasında mühüm rol oynayacaq.
Züleyxa ƏLİYEVA,
“Azərbaycan
