Şirvandakı Şəhidlər xiyabanında ölkəmizin ərazi bütövlüyünün müdafiəsi uğrunda gedən döyüşlərdə həlak olmuş Əliyev Elçin Əliqardaş oğlunun anım gününə həsr olunmuş tədbir keçirilib.
Tədbirdə şəhər icra hakimiyyətinin başçısı İlqar Abbasov, YAP Şirvan şəhər təşkilatının sədri Zahir Qəhrəmanov, SHXÇDX-nin Şirvan şəhər şöbəsinin rəisi vəzifəsini icra edən Ənvər Zərbəliyev, müəssisə və təşkilatların rəhbərləri və əməkdaşları, şəhid ailələrinin üzvləri, müharibə iştirakçıları və ictimaiyyət nümayəndələri iştirak ediblər.
Şəhidin məzarı ziyarət ediləndən sonra çıxış edən şəhər icra hakimiyyətinin başçısı İlqar Abbasov ölkəmizin ərazi bütövlüyünün müdafiəsi uğrunda canlarından keçən igid övladların şücaətindən söz açaraq bildirib ki, onların Vətənə sədaqəti və torpaqlarımızın müdafiəsi uğrunda göstərdikləri rəşadət xalqımızın yaddaşında daim yaşayacaq, xatirələri hər zaman ehtiramla yad olunacaq. ŞİH-in 44 günlük Vətən müharibəsində əldə olunan tarixi Qələbənin şəhidlərimizin misilsiz fədakarlığının və xalqımızın sarsılmaz birliyinin nəticəsi olduğunu qeyd edib. O, həmçinin Prezident İlham Əliyevin və Birinci vitse-prezident hörmətli Mehriban xanım Əliyevanın rəhbərliyi ilə şəhid ailələrinə və müharibə iştirakçılarına göstərilən diqqət və qayğıdan danışıb. Şirvan şəhərində də şəhid ailələri və müharibə iştirakçılarına xüsusi həssaslıqla yanaşıldığını, onların müraciət və problemlərinin həlli istiqamətində zəruri tədbirlərin həyata keçirildiyini diqqətə çatdırıb.
Çıxışlar zamanı ölkəmizin suverenliyi və ərazi bütövlüyü uğrunda canlarından keçən şəhidlərin Vətən qarşısındakı xidmətləri ehtiramla yad edilib, 44 günlük Vətən müharibəsində Azərbaycan Ordusunun qazandığı tarixi Zəfərin əhəmiyyəti vurğulanıb, şəhidlərin əziz xatirəsinin yaşadılması və onların Vətənə sədaqət nümunəsinin gələcək nəsillərə çatdırılmasının hər kəsin mənəvi borcu olduğu qeyd edilib.
Sonra Şəhidlər xiyabanında dəfn olunan digər şəhidlərin məzarları ziyarət edilib, məzarları üzərinə gül dəstələri düzülüb.
Şəhid ailələrinin üzvləri göstərilən diqqət və qayğıya görə minnətdarlıqlarını ifadə ediblər.
Şəhid Elçin Əliyev ölkəmizin ərazi bütövlüyünün müdafiəsi zamanı xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiyinə görə ölümündən sonra 3-cü dərəcəli "Vətənə xidmətə görə" ordeni, “Vətən uğrunda” medalı ilə təltif edilib.
Seyran CAVADOV,
“Azərbaycan”