Görüşdə rayon icra hakimiyyətinin başçısı Rəşad Tağıyev çıxış edərək Azərbaycanda tarixən formalaşmış tolerantlıq ənənələrindən, milli-mənəvi dəyərlərə hörmət və müxtəlif xalqların dinc yanaşı yaşamasından danışmışdır.
Qeyd edilmişdir ki, bu gün Azərbaycan etnik və dini müxtəlifliyin qorunduğu, multikultural dəyərlərin dövlət siyasəti səviyyəsində təşviq olunduğu ölkədir: “Təməli Ulu Öndər Heydər Əliyev tərəfindən qoyulmuş bu siyasəti Prezident İlham Əliyev uğurla davam etdirir. Dövlət başçısının rəhbərliyi ilə Azərbaycan multikulturalizm və dinlərarası dialoqun təşviqi sahəsində beynəlxalq miqyasda nümunəvi mövqe qazanmışdır. Bu istiqamətdə Heydər Əliyev Fondunun prezidenti, Birinci vitse-prezident Mehriban xanım Əliyevanın mədəni irsin qorunması, müxtəlif xalqların tarixi və dini abidələrinin bərpası, humanitar və mədəniyyətlərarası əlaqələrin inkişafı sahəsində həyata keçirdiyi layihələr xüsusi vurğulanmalıdır”.
Həmçinin bildirilmişdir ki, zəngin tarixi və çoxmədəniyyətli mühiti ilə seçilən Şəmkir də müxtəlif etnik mənsubiyyətə malik insanların məkanıdır. Son məlumatlara əsasən, hazırda Şəmkirdə 15-ə yaxın müxtəlif xalqların nümayəndələri yaşayır. Onların arasında ahıska türkləri, ruslar, polyaklar, ukraynalılar, belaruslar, tatarlar, kürdlər və gürcülər var. Rayonda milli və dini müxtəlifliyə hörmət, ictimai həmrəyliyin möhkəmləndirilməsi, bütün sakinlərin rayonun sosial-mədəni həyatında fəal iştirakının dəstəklənməsi daim diqqət mərkəzində saxlanılır. Milli mənsubiyyətindən asılı olmayaraq hər bir vətəndaşın hüquq və azadlıqları qorunur, cəmiyyətdə bərabərhüquqlu iştirakları təmin edilir.
Sonra söz azsaylı xalqların nümayəndələrinə verilmişdir. Onlar çıxışlarında fikir və təkliflərini səsləndirmiş, ölkəmizdə milli-mədəni müxtəlifliyin qorunmasına, tolerantlıq mühitinin möhkəmləndirilməsinə, eləcə də onlara göstərilən diqqət və qayğıya görə minnətdarlıqlarını bildirmişlər.
Sabir ƏLİYEV,
“Azərbaycan”