Mətn, şəkil, audio və hətta video yarada bilən generativ süni intellekt sistemləri getdikcə daha geniş yayılır. Onlar robotlar üçün əməliyyat ardıcıllığı təqdim edə bilirlər. “Google DeepMind”ın təqdim etdiyi “Gemini Robotics” layihəsi də məhz bu prinsip üzərində qurulub. Bu layihə çərçivəsində iki bir-birini tamamlayan model təqdim olunub ki, bunlar robotlara hərəkət etməzdən öncə “düşünmək” imkanı verir.
Robotlar “Gemini Robotics 1.5” və “Gemini Robotics-ER 1.5” modelləri vasitəsilə əvvəlcə tapşırığı “düşünüb”, sonra icra edirlər. Texnologiya generativ süni intellekt sistemlərinə əsaslanır və hər bir konkret tapşırıq üçün uzunmüddətli sazlama tələb edən müasir robotların məhdudiyyətlərini aradan qaldırmağa yönəlib.
Ənənəvi böyük dil modellərinin (LLM) müəyyən məhdudiyyətləri olsa da, simulyasiya edilmiş məntiqi düşüncə mexanizminin tətbiqi onların imkanlarını əhəmiyyətli dərəcədə genişləndirib. “Google DeepMind” komandası hesab edir ki, generativ süni intellekt robot texnologiyasını köklü şəkildə dəyişdirərək onlara universal funksionallıq təmin edə bilər. Müasir sistemlərdən fərqli olaraq, hansı ki, bir dar ixtisaslaşmış tapşırıq üçün aylarla sazlama tələb edir və yeni şəraitə zəif uyğunlaşır, yeni süni intellekt yanaşmaları robotların tanış olmayan mühitlərdə yenidən proqramlaşdırmaya ehtiyac olmadan işləməsinə imkan yaradır.
“Gemini Robotics-ER 1.5” “görmə-dil” (VLM) modeli olub, bədənləşdirilmiş məntiqi düşüncə funksiyasına malikdir. O, vizual və mətn məlumatlarını təhlil edir, tapşırığın addım-addım icra planını formalaşdırır və konteksti dəqiqləşdirmək üçün “Google” axtarışı kimi xarici alətləri qoşa bilir. “Gemini Robotics-ER 1.5” isə “görmə-dil-əməl” (VLA) modelidir. Bu model alınan təlimatları robotun fiziki hərəkətlərinə çevirir, eyni zamanda onları vizual geribildirim və hər addım üzrə öz “düşünmə” prosesinə əsasən tənzimləyir.
Tərtibatçılar yeni modellərin necə işlədiyini əyani şəkildə nümayiş etdiriblər. “Gemini Robotics 1.5” ilə təchiz edilmiş “Apollo” adlı insanabənzər robot səyahət üçün əşyaları yığıb, digər robot “Aloha 2” isə hər iki əlindən istifadə edərək tullantıları çeşidləyib.
Ülkər XASPOADOVA,
“Azərbaycan”