Misirli nazir Raniyə əl-Maşat çıxışında Misir-Azərbaycan əlaqələrinin dərin köklərə malik olduğunu, ölkələr arasında dinamik və uzunmüddətli tərəfdaşlığın mövcudluğunu qeyd edib. Bildirib ki, ölkəsində Azərbaycan investisiyalarının, eləcə də ticarət mübadiləsinin həcminin artmasında maraqlıdır. Misirdə müxtəlif sahələrdə, xüsusilə turizm, xidmətlər, sənaye, tikinti, rabitə, kənd təsərrüfatı, İKT sahələrində 35 şirkət fəaliyyət göstərsə də, bu, Misirlə Azərbaycan arasındakı əlaqələrin həcminə uyğun deyil, özəl sektordakı imkanlardan istifadə edilməlidir.
AZƏRTAC xəbər verir ki, bunu Qahirədə Misirin planlaşdırma, iqtisadi inkişaf və beynəlxalq əməkdaşlıq naziri xanım Raniyə əl-Maşat Azərbaycanın rəqəmsal inkişaf və nəqliyyat naziri Rəşad Nəbiyevin iştirakı ilə keçirilən Azərbaycan-Misir Biznes Forumunda çıxışında bildirib. Forum Azərbaycan Respublikası ilə Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın altıncı iclası çərçivəsində baş tutub.
Misirli nazir əlavə edib ki, ölkəsi Azərbaycanla sənaye və texnologiya, xüsusilə də avtomobil sənayesi, toxuculuq, sement istehsalı, tibbi avadanlıqların hazırlanması sahələrində əməkdaşlığı genişləndirmək istəyir. Qeyd olunub ki, Misir yüksək istehsal imkanları olan sektorlarda əməkdaşlığa keçidi gücləndirən strateji tərəfdaşlıqları genişləndirmək istəyir.
Misir iqtisadiyyatının hazırkı vəziyyətindən danışan Raniyə əl-Maşat ötən maliyyə ilində 4,4 faiz inkişaf göstəricilərinə nail olunduğunu diqqətə çatdırıb.
Misirin planlaşdırma, iqtisadi inkişaf və beynəlxalq əməkdaşlıq naziri müştərək komissiyaların ölkələr arasında iqtisadiyyat, ticarət və investisiya sahələrində imkanların yollarının üzə çıxarılması və inkişafında beynəlxalq əməkdaşlıq mexanizmlərindən biri olduğunu qeyd edib. Misirdə münbit investisiya mühitinin formalaşdığını bildirən nazir Süveyş kanalı İqtisadi Zonası və digər investisiya və iqtisadi imkanlar haqqında danışıb.
Misirli nazir ölkəsi ilə Azərbaycan arasında tərəfdaşlığın dərinləşəcəyinə inamını ifadə edib.
Qeyd edək ki, bu gün, həmçinin Misirin planlaşdırma, iqtisadi inkişaf və beynəlxalq əməkdaşlıq naziri xanım Raniyə əl-Maşatın və Azərbaycanın rəqəmsal inkişaf və nəqliyyat naziri Rəşad Nəbiyevin həmsədrliyi ilə Azərbaycan Respublikası ilə Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın altıncı iclası keçirilib.
Ölkəmizi iclasda nazir Rəşad Nəbiyevin sədrliyi ilə geniş nümayəndə heyəti təmsil edib. Nümayəndə heyətinə iqtisadiyyat, gənclər və idman, mədəniyyət nazirlərinin müavinləri, eləcə də Xarici İşlər Nazirliyinin, AZPROMO-nun, Dövlət Turizm Agentliyinin, Ələt Azad İqtisadi Zonasının, Qida Təhlükəsizliyi Agentliyinin, Elm və Təhsil, Energetika və Kənd Təsərrüfatı Nazirliklərinin, KOBİA-nın, TƏBİB-in və SOCAR Trading-in məsul şəxsləri daxildir. Azərbaycanın Misirdəki səfiri Elxan Poluxov tədbirdə iştirak edib.
Səfər çərçivəsində Azərbaycanın rəqəmsal inkişaf və nəqliyyat naziri Rəşad Nəbiyevin ikitərəfli görüşləri planlaşdırılır.
Qeyd edək ki, Müştərək Komissiya 1994-cü il aprelin 7-də Qahirədə imzalanmış “Azərbaycan Respublikası Hökuməti və Misir Ərəb Respublikası Hökuməti arasında iqtisadi və elmi-texniki əməkdaşlıq haqqında Saziş”ə əsasən yaradılıb. Müştərək Komissiyanın beşinci iclası 2022-ci il fevralın 25-də Bakıda keçirilib.
