Paytaxtın küçə və prospektlərində yaşıllıqlara diqqət göstərilsə də, qayğıdan kənarda qalan ərazilər, qurumaqda olan yaşıllıqlar də yox deyil. Bu mənzərənin simvolik ifadəsi isə şəhərin tam mərkəzində - Ekologiya və Təbii Sərvətlər Nazirliyinin inzibati binası yaxınlığında - Ələsgər Ələkbərov və Landau küçələrində yaşanır. Burada bir neçə ağac quruyub, bəziləri tamamilə məhv olub, bir qismi isə baxımsızlıqdan solğun və "xəstə" görünür. Ağaclara baxdıqca sanki onların səssiz harayını eşidirsən.
Ekoloji siyasətin müəllifi və icraçısı hesab olunan bir qurumun gözü önündə belə bir mənzərənin hökm sürməsi ictimai etimad və idarəetmənin effektivliyi baxımından haqlı suallar doğurur. Axı hamımızın gözləri önündə susuzluqdan və baxımsızlıqdan bu hala düşən yaşıl canlılara münasibətimiz niyə belədir? Axı biz insanlara oksigen bəxş edən bu varlıqlara niyə bu qədər laqeyidik? Özü də coğrafi baxımdan ağac yetişdirilməsi o qədər də asan olmayan paytaxtda...
Ələsgər Ələkbərov və Landau küçələrində, "KapitalBank"ın Yasamal filialının qarşısında müşahidə olunan mənzərələr - ağacların tədricən quruması və məhv olması şəhər suvarma sistemlərinin effektivsizliyi, suvarma xidmətlərinin yarıtmaz təşkili və monitorinqlərin olmamasından da xəbər verir. Vəziyyət təkcə ekoloji məsələ deyil, o, idarəetmə və vətəndaş məsuliyyəti kontekstində də qiymətləndirilməlidir. Bu məsələlərdə yalnız cavabdeh təşkilatın hərəkətini gözləməməli və ya o idarənin məsuliyyətsizliyini müşahidə etməməliyik. Hər bir vətəndaş, hər bir müəssisə rəhbəri - istər dövlət, istərsə də qeyri-dövlət müəssisələri olsun, ətrafdakı yaşıllıqların qorunması istiqamətində öz töhfəsini verməlidir. O qədər də zaman almayan 3-5 ağacın suvarılmasını hər bir müəssisə əməkdaşı həyata keçirə bilər. Yetər ki, istəyək, bunu özümüzə bir vətəndaşlıq borcu bilək. Çalışdığımız iş yerimizin ətrafında əkilmiş ağaclara qulluq edək, lap elə dibini belləyək, su verək, bunu bir ictimai vərdişə çevirək. Bu həm də bir təşviq, eyni zamanda savabdır. Mərkəzi küçələrdə belə vəziyyətin hökm sürməsi kənar məhəllələrdə və ətraf yaşayış massivlərində vəziyyətin nə qədər acınacaqlı ola biləcəyini təsəvvür etməyə imkan verir. Yaşıllıq nəzarətsiz qaldıqca, şəhər istisi artır, toz və qaz hissəcikləri yığılır, sakinlərin sağlamlığı və gündəlik həyat keyfiyyəti birbaşa mənfi təsirlərlə üzləşir.
Ekologiya və Təbii Sərvətlər Nazirliyi və yerli kommunal xidmət orqanları bu vəziyyətə dərhal müdaxilə etməklə, yuxarıda adları çəkilən küçələrdə və digər ərazilərdə ağacların vəziyyəti ilə bağlı kompleks audit aparmaqla problemi aradan qaldıra bilərlər. Təkcə yeni ağac əkməklə iş bitmir - mövcud ağacların qorunması, davamlı qulluq və müasir suvarma sistemlərinin tətbiqi bu işin əsasını təşkil etməlidir.
Eyni zamanda vətəndaş cəmiyyəti və media da bu prosesdə passiv müşahidəçi olmamalıdır. Ekoloji məsələlər ictimai gündəmin prioritetinə çevrilməli, hər bir ağac şəhər həyatının dəyər göstəricisi kimi qiymətləndirilməlidir. Əgər bu gün şəhərin mərkəzindəki yaşıllıqlar belə baxımsız buraxılırsa, sabah bu laqeydlik daha genişmiqyaslı ekoloji böhrana yol aça bilər.
Göz önündəki ağaclar susur, lakin onların səssiz harayı gələcək üçün ciddi xəbərdarlıqdır.
N.ƏSGƏROVA,
"Azərbaycan"
