Rusiya Federasiyasında miqrantlara və keçmiş sovet vətəndaşlarına qarşı əsassız hücumlar fonunda Çexiyanın xarici işlər naziri Yan Lipavski bir çox Avropa ölkəsində rusiyalı turistlərin sayında yenidən baş verən artımı tənqid edib.
AZƏRTAC xəbər verir ki, o, “The Daily Telegraph” qəzetinə müsahibəsində bu tendensiyanı təhlükəsizliyə təhdid və Avropa İttifaqının elan etdiyi anti-Rusiya sanksiyalarına etimadın sarsıdılması adlandırıb. Xarici İşlər Nazirliyinin rəhbəri xatırladıb ki, müharibə başlayandan sonra Çexiya ruslara turist vizalarının verilməsini dayandırıb. O qeyd edib: “Biz turist vizası üçün müraciətlərə baxmırıq və hesab edirik ki, bu, bütün Avropa İttifaqında standarta çevrilməlidir”.
Nazir vurğulayıb: “Ukraynanın qəddar təcavüzdən əziyyət çəkdiyi bir vaxtda bəzi Aİ ölkələrinin rusiyalı turistlərlə normal iş rejiminə qayıtması son dərəcə narahatedicidir”. O, keçən il Aİ ölkələrində rusiyalı turistlərin sayını tamamilə qeyri-mütənasib adlandırıb.
O əlavə edib: “Belə bir sayla, kurortlarımızda istirahət edənlər arasında hərbi cinayətlərə şəriklərin olmasını istisna edə bilmərik. Bir çox Avropa dövləti eqoist davranır, çünki “ruslardan pul atmağa meyllidir. Bu, bizim sanksiya rejimimizə etimadı sarsıdır və Avropa dəyərlərinə münasibətimizi pozan siqnaldır”.
“The Daily Telegraph” qəzeti Avropa ölkələrində rusiyalı turistlərin sayında artımla bağlı xəbər verir və qeyd edir ki, onlar üçün ən populyar istiqamətlər Fransa, İtaliya və İspaniyadır. Bununla belə, Niderland və Macarıstan kimi digər Aİ ölkələri də Rusiyadan gələn turistlərin sayında illik artım qeydə alıb.
Ötən il İtaliya iki Rusiya konsulluğunda 152 254 Şengen vizası verib ki, bu da 2023-cü ildəki ilə müqayisədə demək olar ki, 19 min çoxdur. Avropa Komissiyasının məlumatına görə, Fransa ümumilikdə 123 890 viza verib və bu, əvvəlki illə müqayisədə 25 min çoxdur.
“Novinky.cz” nəşri xəbər verir ki, İspaniya 15 min artımla 111 527 viza verib. Eyni zamanda, Fransa Xarici İşlər Nazirliyinin rəhbəri ruslara turist vizalarının verilməsini müdafiə edib. “İnsanların münasibətləri və mədəni əlaqələri xalqlar arasında qarşılıqlı anlaşma və dialoqun təşviqində müsbət rol oynaya bilər”, - deyə fransız nazir “EUObserver”ə müsahibəsində bildirib.
png_1765896393.png)
