Bu yamyaşıl məkan, daha doğrusu, səliqəli şəkildə salınmış park nə paytaxtımızın hansısa bir guşəsində, nə də bölgələrimizin birindədir. Elə isə bəs haradadır? Dənizdə, dənizin ortasında!
Daha maraqlısı isə budur ki, dənizin ortasındakı hər hansı bir torpaq parçasının üstündə - adada da deyil. Polad estakadalar üstündə - Neft Daşlarındadır.
Neft Daşlarını "Möcüzələr adası" adlandırıblar. Məhz cəm şəklində - möcüzələr. Çünki möcüzəsi bir deyil, beş deyil. Xəzərin qoynunda sulardan baş qaldıran qara daş parçalarının bütün dünyaya dəniz nefti erasının başlanğıc ünvanını nişan verməsi bir möcüzə deyildimi?
"Qara daşlar" sonra adını dəyişib "Yeddi gəmi adası" oldu. Çünki dənizin bu ərazisindəki sərvəti təsdiqləmək və əgər təsdiqlənərsə, üzə çıxarmaq üçün qəhrəman neftçilərə fırtınalardan qorunmaq üçün bir sığınacaq lazım idi. Növbəti möcüzə də bu sığınacaq oldu. Bakının gəmi təmiri zavodlarından istismardan silinmiş yeddi gəmini gətirib burada qeyri-adi bir sığınacaq yaratdılar. Bura onlar üçün həm yaşayış yeri, həm təhlillər, müzakirələr aparmaq üçün "ofis", həm də dənizin dərin qatlarına nüfuz etmək üçün istinad nöqtəsi idi.
Sonralar "Qara daşlar" bol-bol neft verdiyindən ilk adlarının hamısını dəyişərək həmişəlik Neft Daşları oldu.
Neft Daşlarının fatehləri möcüzələr yaradaraq Xəzərin dərin qatlarından yüzlərlə, minlərlə ton "qara qızıl" çıxardılar, milyonlarla kubmetr mavi yanacaq hasil etdilər.
Estakadalar - polad dirəklər üstündə şəhər salmağın özü də möcüzəyə bənzəyən bir həqiqətdir. Bunu da insan ağlı və gücü yaratdı. Bu möcüzəli şəhəri məhz Azərbaycan alimləri, neftçiləri, inşaatçıları qurdular.
Bu günlərdə 75 yaşını qeyd etməyə hazırlaşan Neft Daşlarının çoxdur möcüzəsi! "Möcüzələr adası"nın bir möcüzəsi də bir qarış torpağı belə olmayan məkanda yamyaşıl parkın salınması, hər yanda gül-çiçəyin əkilməsidir.
Bəli, Xəzərin qoynunda polad özüllər üstündə qurulan, illər keçdikcə dalğaları yara-yara böyüyən əfsanəvi dəniz şəhərinin bu gün gözoxşayan yamyaşıl parkı, mərd insanların - qəhrəman neftçilərin, eləcə də buraya gələn qonaqların könlünə rahatlıq gətirən bolluca gül-çiçəyi var. Bu gözəlliyi dəniz şəhərində vertolyotdan enən kimi, gəmidən düşən kimi görürsən… Əgər COP29-a təşrif buyuran qonaqlarımızın yolu buralara düşərsə, 75 ildir dünyanı möcüzələri ilə heyrətləndirən Neft Daşları "yaşıl möcüzə"si ilə də onların böyük marağına səbəb olar.
Flora SADIQLI,
"Azərbaycan"
 Копированиеjpg_1731455878.jpg)
