Ermənistanda siyasi müstəvidə yaşanan gərginlik sosial-iqtisadi müstəviyə də transfer edərək keçmiş hərbi xunta ilə Nikol Paşinyan iqtidarı arasında münasibətlərin daha da gərginləşməsi ilə xarakterizə edilməkdədir. Məlumdur ki, müharibədəki məğlubiyyət, xüsusilə anti-Rusiya mövqeyi baş nazirin ölkə daxilində mövqelərini sarsıdıb. Bu səbəbdən də erməni siyasi qüvvələri daxilində fəal müzakirələr davam etməkdədir. Başda Robert Koçaryan olmaqla keçmiş hərbi xuntanın əsl niyyəti ölkədə qasırğa kimi cərəyan edən siyasi böhrandan yararlanmaqdır.
Erməni ictimai xadim Voskan Sarkisyan sosial şəbəkə hesabında yazıb ki, Nikol Paşinyan və partiyası hakimiyyətdə olduğu müddətdə Ermənistanın gələcəyi olmayacaq, bu ölkədə heç bir siyasi bahar açılmayacaq. Onun sözlərinə görə, Ermənistan hakimiyyətinin nümayəndələri özlərini bankı oğurlayan soyğunçular kimi aparırlar, qısa zamanda mümkün qədər çox soymağa çalışırlar: "Onlar erməni xalqının çoxəsrlik tarixinin qara dəliyidir, bu qədər ziyan vurmuş və bundan sonra da vuracaq pis küləkdir. Paşinyan və partiyasının gücü məzmun baxımından tükənib, onların uzaqlaşmasından sonra Ermənistanda əsl bahar açılacaq".
Ermənistanın "Past" nəşri yazıb ki, Nikol Paşinyanın son vaxtlar Ermənistan parlamentində "qarışıq" nizamsız çıxışları və özündən çıxmaları, bir çoxlarının fikrincə, hətta onun tipi üçün də bir qədər qeyri-adi olub. Nəşr qeyd edib ki, üstəlik, diplomatik mənbələr onun xaricdə, xüsusən də Rusiya prezidentinin iqamətgahında və Xarici İşlər Nazirliyində davranışının unikal "meydana" çevrildiyini bildirir: "Əldə etdiyimiz məlumata görə, Paşinyanın bu dərəcədə məyus olmasının bir neçə səbəbi var və bunların kökləri var. Həm Qərb, həm də Rusiya üçün hazır, tükənmiş fiqur olduğunu mükəmməl başa düşməsi ilə yanaşı, Paşinyan xüsusilə Gümrü seçkilərinin nəticələrinə və ağsaqqallar şurasının ilk iclasında heç bir problem olmadan şəhər başçısı seçilməsinə görə çox ciddi sarsıntı keçirir.
Digər tərəfdən, əldə etdiyimiz məlumata görə, Paşinyan bu yaxınlarda amerikalıların keçirdiyi və nəticələri onu dəhşətli dərəcədə narahat edən sorğudan "qapalı məlumatlar" alıb. Belə çıxır ki, Gümrü və Şirabad seçkilərindən əvvəl keçirilən sorğularda onun reytinqi 11-12 faiz arasında dəyişirdisə, indi 9 faizə yaxındır".
Bu arada Rusiyanın paytaxtı Moskvada Erməni İş Adamları Assosiasiyasının təşkil etdiyi biznes-forumda Erməni İş Adamları Assosiasiyasının və "Taşir" Şirkətlər Qrupunun prezidenti Samvel Karapetyan deyib ki, Avrasiya İqtisadi Birliyindən (AİB) çıxmaq və Avropa İttifaqına doğru hərəkət etmək cəhdləri ciddi iqtisadi nəticələrə səbəb ola bilər. Aparılan müşahidələrə, xüsusən də həmin müşahidələrin iqtisadi komponentinə məhəl qoymamaq mümkün olmayan hallardan biridir: "Rusiyadakı erməni iş adamları nəinki biznesdə öz mövqelərini möhkəmləndirirlər, həm də yeni iş yerləri yaratmaqla, iqtisadiyyatın əsas sektorlarına investisiya qoymaqla, Ermənistanla Rusiya arasında ticarət-iqtisadi əlaqələrin inkişafına kömək etməklə, Ermənistanı fəal şəkildə dəstəkləyirlər". Onun sözlərinə görə, bütün çağırışlara baxmayaraq, erməni biznes icması Ermənistanın iqtisadi sabitliyi və əhalinin rifahının etibarlı sütunu olaraq qalır.
Bəs Karapetyan nə barədə xəbərdarlıq edir? Ermənistan AİB-dən çıxsa, qiymətlərin və tədarükü tənzimləyən vahid mexanizmlər fəaliyyətini dayandıracaq ki, bu da qazın, neft məhsullarının, elektrik enerjisinin qiymətinin qalxması deməkdir. Başqa sözlə, Ermənistanın bütün iqtisadiyyatına ciddi zərbə dəyə bilər ki, bu da ayrı-ayrı sahələrin iflic olmasına və ölkənin iqtisadi sisteminin sabitliyinin pozulmasına səbəb olacaq.
Hər halda proseslərin gedişi Ermənistanı qarşıdakı dövr ərzində daha çətin günlərin və qarşıdurmaların gözlədiyini göstərir.
Elçin CƏFƏROV,
"Azərbaycan"
