Azərbaycan bundan sonra da Qərbin bəlli dairələrinin niyyətlərini ürəklərində qoyacaq
Avropa İttifaqı (Aİ) Avropa Şurası Nazirlər Komitəsinin 11 sentyabr tarixli iclası zamanı İşgəncənin və Qeyri-insani yaxud Ləyaqəti Alçaldan Rəftar və ya Cəzanın Qarşısının Alınması üzrə Komitənin 3 iyul tarixli ictimai bəyanatına istinad edərək Azərbaycanla bağlı qərəzli çıxış edib. Aİ-nın bu addımı COP29 ərəfəsində olan respublikamıza qarşı Qərbin qarayaxma kampaniyasının tərkib hissəsidir.
Ölkəmizin uğurları Qərbin yuxusunu qaçırıb
Əslində, Azərbaycanın uğurları Qərbin yuxusunu çoxdan qaçırıb. Belə ki, nailiyyətlərimiz, inkişafımız həmişə Qərb dövlətlərinin və siyasi dairələrinin qısqanclığına səbəb olub. Hələ Vətən müharibəsinə qədər Qərbdə mənzillənmiş təşkilatların, o cümlədən qeyri-hökumət qurumlarının ölkəmizə qarşı məkrli fəaliyyətlərini izləmişik. Erməni lobbisinin, dünya erməniliyinin maraqlarına xidmət edən həmin təşkilatların işi-gücü ölkəmizə qarşı qarayaxma kampaniyasının aparılmasından ibarət olub. Onlar bu məqsədlə Azərbaycan üçün adi kağız parçası qədər dəyəri olmayan sənədlər qəbul etməkdən tutmuş qərəzli hesabatların hazırlanmasına, mətbuatda yazıların dərcinə qədər məkrli fəaliyyət həyata keçiriblər. Azərbaycana qarşı bu riyakarlıq xüsusən beynəlxalq tədbirlər ərəfəsində daha çox özünü göstərib.
Vətən müharibəsində ölkəmizin qələbəsini və torpaqlarımızın işğaldan azad olunmasını, o cümlədən ərazilərimizdə erməni separatizminə son qoyulmasını həzm edə bilməyən antiazərbaycançı şəbəkə öz məkrli fəaliyyətini hazırda yeni fazaya yüksəldib. Yenə də ölkəmizə qarşı çirkin kampaniyalar aparır, "qara piar"la məşğul olur, Azərbaycanın demokratik imicinə zərbə vurmaq niyyəti ilə obyektivlikdən uzaq fikirlər səsləndirir, qərəzli çıxışlar edirlər. Aİ-nın Azərbaycanla bağlı qərəzli çıxışı da bu qəbildəndir.
Aİ Fransada baş verənlərə hələ də münasibət bildirməyib
Azərbaycan Xarici İşlər Nazirliyindən məsələ ilə bağlı medianın sualına cavab olaraq bildirilib ki, Avropa İttifaqının bu ictimai bəyanata istinadən qərəzli açıqlamalar verməsi qəbuledilməzdir və bu qarayaxma kampaniyasını qətiyyətlə rədd edirik. "Ölkəmizə qarşı bu kimi əsassız bəyanatlarla çıxış etmək əvəzinə qarşı tərəfin Aİ üzv dövlətlərində insan hüquqlarının pozulması hallarına diqqət yetirməsini tövsiyə edirik. Aİ tərəfi Fransada "sarı gödəkçələr" aksiyasında etirazçıların öldürülməsi, Fransanın neokolonial siyasəti nəticəsində dənizaşırı ərazilərdə yerli əhaliyə qarşı işgəncələr, Aİ strukturlarında rüşvətxorluq və korrupsiya hallarının yayılması, islamofobiya və müsəlmanlara qarşı hücum faktlarını hələ də araşdırmayıb və bu problemlərə adekvat münasibət bildirməyib", - deyə cavabda qeyd olunub.
Aİ ölkələrində insan hüquqlarının pozulmasına dair kifayət qədər problemlərin olduğu, dinc nümayişçilərin polisin qəddar zorakılığı ilə üzləşməsi, insanların üzərinə itlərin saldırılması, onların həbsə atılması bütün dünyaya məlumdur. Məsələnin digər diqqətçəkən tərəfi isə odur ki, Aİ ölkələrində baş verən bu cür hadisələrlə bağlı nə hüquq müdafiəçiləri danışır, nə də hakimiyyət dairələri. Guya demokratiya yolunda olduqlarını iddia edən Aİ ölkələrində islamofobiyanın, antisemitizmin qarşısının alınması üçün də praktik olaraq heç bir addım atılmır. Avropada insan hüquqlarına hörmətin hansı səviyyədə olduğunu bu qitədə dərinləşən islamofobiyadan, ayrı-seçkilikdən, miqrantların başlarına açılan oyunlardan da görmək olar. Miqrantların hüquqlarının pozulması öz gözündə tiri görməyən Avropa İttifaqının reallıqlarıdır.
İkili standartların bariz nümunəsi
Avropada insan hüquqlarının pozulması ilə bağlı Aİ tərəfindən heç vaxt narahatlıq ifadə olunmayıb. Fransa isə yalnız öz ərazilərində deyil, müstəmləkə altında saxladığı ərazilərdə də insan hüquqlarını kobud şəkildə pozmaqdadır. Yeni Kaledoniyada, Maohi Nuidə (Fransız Polineziyası) Melaneziya, Korsikada xalqların müstəqil yaşamaq və digər bu qəbildən olan hüquqları tapdalanmaqdadır.
O cümlədən bu yaxınlarda başa çatmış Olimpiya Oyunları Fransanın insan hüquqlarını çox kobud şəkildə pozması ilə yadda qaldı və Avropa təşkilatları bu barədə bir kəlmə belə söyləmədilər.
Fransanın bacısı Ermənistanda da baş verən insan hüquqları pozuntuları ilə bağlı Avropa təşkilatları həmişə susublar. Azərbaycan XİN-in məlumatında deyildiyi kimi Aİ-nin himayədarlıq etdiyi Ermənistanda insanların fundamental hüquq və azadlıqlarının pozulmasına, siyasi təqiblər nəticəsində həbs edilmiş şəxslərin həbsxanalarda həyatlarını itirməsi hallarına, habelə siyasətçilər və onların ailə üzvlərinə qarşı təqiblərə Aİ-nin biganə qalması da ikili standartların bariz nümunəsidir.
Riyakarlıq nümunəsinə çevrilən Şvabe
Antiazərbaycançı şəbəkənin önündə gələn, ölkəmizə qarşı qərəzli münasibəti ilə tanınan Almaniya Parlamentinin üzvü Frank Şvabenin də son zamanlarda "fəallaşması" Azərbaycanın öz uğurlarının sayını artırması və COP29 kimi mötəbər tədbir ərəfəsində olması ilə bağlıdır. Qeyd edək ki, o son çıxışlarının birində Azərbaycanda "siyasi məhbusların" azad olunmasını istəmişdir.
Birincisi, Azərbaycanda siyasi məhbuslar yoxdur və bu, F.Şvabenin özünə də yaxşı məlumdur. F.Şvabenin Azərbaycanı bu məsələ ilə bağlı ittiham etməsi onun sadəcə erməni təəssübkeşliyindən irəli gəlir. Qeyd edək ki, erməni lobbisinin təsiri altında olan, yalnız Qarabağ ermənilərinin hüquqlarından dəm vuran F.Şvabe bir dəfə də olsun Ermənistanın işğalı nəticəsində yüz minlərlə azərbaycanlının məcburi köçkün vəziyyətinə düşməsindən, Qarabağda qondarma rejim və işğalçı Ermənistan tərəfindən törədilmiş dağıntılardan, Azərbaycanın mədəni irsinin dağıdılmasından, azərbaycanlıların qayıdış hüquqlarının 30 il ərzində taptalanmasından bir dəfə də olsun bəhs etməmişdir. Bu fakt özlüyündə onun nə dərəcədə qərəzli və erməni lobbisinin maraqlarına xidmət edən şəxs olduğunu göstərir. Və bu həmin Şvabedir ki, Almaniyanın ictimai kanalı ARD-də Azərbaycan əleyhinə bədii filmin ("Am Abgrund") hazırlanmasında yaxından iştirak edib.
Azərbaycan ictimaiyyəti Şvabe, Okampo və digər onlar kimi erməni maraqlarına xidmət edənlərin ölkəmizə qarşı hücumlarına çox şahidlik edib. COP29 ərəfəsində yenidən fəallaşan bu qaragüruhun niyyəti beynəlxalq ictimaiyyətin qarşısında Azərbaycanı qaralamaqdır. Lakin bu cür riyakarlıqlar heç vaxt Azərbaycana təsir göstərə bilməz və respublikamız bundan sonra da öz uğurları ilə Qərbin bəlli dairələrinin və siyasi dəllallarının məkrli niyyətlərini gözlərində qoyacaq.
Rəşad CƏFƏRLİ,
"Azərbaycan"
