Şirkətlər müxtəlif üsullardan istifadə edərək ən səmərəli şəkildə elektrik enerjisi istehsal etməyə çalışırlar. Bu kontekstdə Norveçin “Wind Catching Systems” (WCS) şirkəti çox turbinli dizayn əsasında üzən külək elektrik stansiyası kimi təyin etdiyi “Windcatcher” sistemini inkişaf etdirir. “WCS”-in icraedici direktoru Ole Heggheimin açıqlamasına görə, şirkət ənənəvi 3 qanadlı külək turbinlərindən fərqli olaraq çoxsaylı turbinlərdən ibarət külək divarı hazırlamağı planlaşdırır. O, təxminən 300 metr yüksəklikdə və 350 metr enində olacaq. Bu səbəbdən nəhəng platformada 126 ədəd 1 MW-lıq turbin olacaq.

Məlumata görə, bu kiçik turbinlər, ənənəvi 3 qanadlı turbin dizaynı ilə müqayisədə külək axınının hər kvadrat metri üçün 2.5 dəfə çox enerji tuta bilir. Hər bir qurğu elektrik enerjisini şəbəkəyə ötürən mərkəzi yarımstansiyaya qoşulur. Bu platformanın yaşıl hidrogen istehsalı potensialı da qiymətləndirilir. “WCS” hazırda Norveçin İqlim və Ətraf Mühit Nazirliyinin Enova fondundan 2023-cü ilin fevralında təhvil verilmiş 900 min dollarlıq investisiyanın köməyi ilə “Windcatcher” dizaynının prototipini qurur.

Şirkətin sərmayəçiləri arasında “General Motors” və “GM Ventures” var. Daha səmərəli istehsalla yanaşı, “Windcatcher” sistemi üzən külək enerjisinin dəyərini hər MVt üçün 43-65 dollara endirməyi hədəfləyir. Sabit dizayn əvəzinə üzən dizayndan istifadə etmək sistemin daha dərin sularda quraşdırıla biləcəyi deməkdir. Digər tərəfdən, sistemin nəhəng strukturu dəniz quşları üçün risk yaradır. Şirkət bunun üçün bəzi çəkindirmə sistemləri üzərində işləyir.

Ülkər XASPOLADOVA,

“Azərbaycan”