Artıq 21 ildir ki, 12 dekabr müasir Azərbaycan tarixinin ən görkəmli dövlət xadimi Heydər Əliyevin anım günü kimi qeyd olunur. Heydər Əliyev sovet Azərbaycanına rəhbərlik etdiyi dönəmdə də, 1982-1987-ci illərdə SSRİ-nin rəhbər şəxslərindən biri olduğu zaman kəsimində də Sovet İttifaqı kimi nəhəng ölkədə, eləcə də dünya miqyasında qəbul edilən, mövqeyi ilə hesablaşılan və xüsusi nüfuz sahibi olan siyasətçi kimi tanınırdı.
Heydər Əliyev fitri istedadı və şəxsi nüfuzu sayəsində yeganə azərbaycanlı idi ki, belə yüksək məqama çatmış və fəaliyyəti ilə Azərbaycanın güvən yerinə və bütün türk dünyasının fəxrinə çevrilmişdi.
O da bir acı reallıqdır ki, Heydər Əliyev SSRİ rəhbərliyində tutduğu vəzifələrdən kənarlaşdırılandan sonra ermənilər və Kremldəki havadarları fürsətdən istifadə edərək Azərbaycanın üzərinə səlib yürüşünə qalxdılar və Qarabağda məlum hadisələr, ardınca isə soydaşlarımızın tarixi torpaqlarımızdan sonuncu deportasiyası baş tutdu. Nəticə etibarı ilə torpaqlarımız işğal olundu, minlərlə şəhid verdik və böyük dəhşətlər yaşadıq. Amma faciələrimizin miqyası daha böyük ola bilərdi. Nə yaxşı ki Heydər Əliyevin 1993-cü ilin yayında Azərbaycan rəhbərliyinə ikinci qayıdışı oldu və gələcəkdə daha böyük itkilərin və faciələrin qarşısını aldı.
Bu, elə bir dövr idi ki, yenicə müstəqilliyini bərpa etmiş ölkə olaraq hərbi təcavüz və işğalın ağır nəticələrini önləmək, bir milyon qaçqın və məcburi köçkünün problemlərini həll etmək, birillik yarıtmaz idarəçilik səbəbi ilə yaranmış xaos və anarxiyanın qarşısını almaq, həmçinin daha ağır nəticələrə səbəb ola biləcək separatçılığa və xarici təhdidlərə qarşı mübarizə aparmaqla ölkəni iqtisadi-siyasi böhrandan çıxarmaq, vətəndaş müharibəsinin qarşısını almaq, düşmənə sinə gərmək, bütövlükdə Azərbaycan cəmiyyətini toparlamaq, xalqın inamını özünə qaytarmaq lazım idi. Bu isə əlbəttə ki, hər siyasətçinin və dövlət adamının öhdəsindən gələ biləcəyi görəv deyildi. Çox şükürlər olsun ki, bütün çətinliklərə baxmayaraq, Heydər Əliyev çətin olduğu qədər də məsuliyyətli və şərəfli olan bu vəzifənin öhdəsindən qətiyyətlə gəlməyi bacardı və Azərbaycanımızı düşdüyü ağır vəziyyətdən çıxardı.
Heydər Əliyev, həmçinin Azərbaycan Ordusunun yenidən qurulması üçün zaman qazanmağın vacibliyini bilərək 1994-cü ildə atəşkəsə nail oldu, qazanılmış vaxtdan istifadə edərək ölkə iqtisadiyyatını dirçəltmək istiqamətində əhəmiyyətli addımlar atılması üçün lazımi vaxt qazandı. Onu da xüsusi olaraq bildirək ki, Heydər Əliyev siyasi iradə nümayiş etdirərək müxtəlif beynəlxalq platformalarda Qarabağ məsələsində Azərbaycanın haqqını pozmağa imkan verə biləcək bir sənədə belə imza atmadı və bu, gələcəkdə Qarabağın işğaldan azad olunması üçün çox ciddi zəmin yaratdı. Bu mənada qürurla "Ata vəsiyyətini yerinə yetirdim" deyən Ali Baş Komandan İlham Əliyevin 44 günlük İkinci Qarabağ savaşını Zəfərlə başa çatdırmasının təməlində Heydər Əliyevin də əhəmiyyətli payı olduğu danılmazdır.
Məhz Heydər Əliyev ideyalarının və irsinin əsas davamçısı olan Prezident İlham Əliyevin yürütdüyü qətiyyətli xarici siyasət və davamlı şəkildə göstərdiyi siyasi iradə sayəsində nəinki torpaqlarımız işğaldan azad olundu, eyni zamanda suverenliyimiz və ərazi bütövlüyümüz tam bərpa edildi. Bu siyasətin nəticəsidir ki, hazırda regionda yeni reallıqlar formalaşmış və Azərbaycan regionun əsas söz və güc sahibinə çevrilməklə yeni hədəflərə doğru inamla addımlamaqdadır.
Bu gün hər birimiz Azərbaycan dövlətçiliyinin qorunub saxlanmasında müstəsna rolu olan Heydər Əliyevin xatirəsini hörmətlə anır, ona Allahdan rəhmət diləyirik. Əminəm ki, Heydər Əliyev Azərbaycanın ən görkəmli tarixi şəxsiyyətlərindən biri kimi hər zaman tarixdə, xatirələrdə və xalqımızın qəlbində yaşayacaq.
Arzuxan ƏLİZADƏ,
Milli Məclisin deputatı,
Milli İstiqlal Partiyasının sədri
