Suriyada radikal və sürətli hakimiyyət dəyişikliyi, Bəşər Əsədin xaricə qaçması bəzi ölkələrdə məyusluğa səbəb olub. Bunların arasında Ermənistan xüsusi yer tutur. Belə ki, ermənilər Suriyada Əsəd rejiminin devrilməsindən bərk narahatdırlar.

Suriyadakı sürətli hakimiyyət dəyişikliyindən həm dövlət olaraq Ermənistan, həm də erməni icması uduzub. Caliber.az yazır ki, müharibə başlayanda Suriyada 100 minə yaxın erməni yaşayırdı və onların da əksəriyyəti Hələbdə, Dəməşqdə, Latakiyada və digər ərazilərdə cəmləşmişdir. 

Tarixə ekskurs etsək, görərik ki, məhz Hələbdə doğulan Ermənistanın ilk prezidenti Levon Ter-Petrosyanın atası Akop Ter-Petrosyan Suriya və Livan Kommunist Partiyasının yaradıcılarından biri olub. Suriyada erməni terror partiyaları "Daşnaksütyun" və  "Hnçakyan"ın yerli qurumları da fəaliyyət göstərir. Bu partiyaların üzvləri dəfələrlə türk diplomatlarına qarşı terror aktları törədiblər. Avropanın müxtəlif şəhərlərində terror aktları dalğasının başında da məhz onlar dayanıb.  Bütün bunlara baxmayaraq, bu partiyalar Əsəd rejimində özlərini çox rahat hiss ediblər. Onların Suriya Xalq Şurasında (parlament) yer almaq üçün öz kvotaları olub.

Baş nazir Nikol  Paşinyanın Ermənistan hərbçilərini Hələbə göndərməsini də xatırlaya bilərik. O,  2019-cu ildə, guya ki, əraziləri  minalardan təmizləmək üçün Suriyaya 83 nəfərlik kontingent yola salmışdı. Əslində isə, hərbçilər  Əsədə dəstək üçün göndərilmişdi və  Suriya ordusunun əməliyyatlarında iştirak etmişdilər.

Devrilmiş Suriya diktatoru ilə yaxın münasibətdə olan tək Paşinyan deyildi. Ermənistanın üçüncü prezidenti Sarkisyanın da Əsədlə təkcə işgüzar əlaqələri yox, həm də dostluq, etimad münasibətləri olub.

Onu da xatırladaq ki, 2009-cu ildə Əsədin İrəvana səfəri zamanı bütün ermənilərin katolikosu II Qaregin ona erməni kilsəsinin ali mükafatı - Müqəddəs Georgi xaçını təqdim etmişdi. Eçmiədzindən verilən açıqlamaya görə, bu mükafat Suriya prezidentinə ermənilərə, Ermənistana dəstək və iki ölkə arasında əlaqələrin inkişafına görə verilib. Katolikos bəyan edib ki, erməni xalqı 1915-ci il hadisələri zamanı Suriyanın onlara göstərdiyi tarixi dəstəyi heç vaxt unutmayacaq.

Belə olan halda təəccüblü deyil ki, Əsədin Suriyası həmişə ermənipərəst mövqe tutub və Azərbaycana qarşı çıxıb...

Əsəd Azərbaycan və Türkiyəyə meydan oxuyaraq Kəşmir məsələsində Pakistanı deyil, Hindistanı dəstəkləyib. Suriya İslam Əməkdaşlıq Təşkilatı (İƏT) çərçivəsində Azərbaycanın maraqlarına qarşı çıxıb, Ermənistanla bağlı qətnamələrin qəbuluna mane olmağa çalışıb, qəbul edilən sənədlərə qoşulmayıb. 2008-ci il martın 14-də BMT Baş Assambleyasında Azərbaycanın təqdim etdiyi "Azərbaycanın işğal olunmuş ərazilərində vəziyyət haqqında" qətnamə üzrə səsvermə zamanı Dəməşq gizli taktika seçərək səsvermədən yayınıb, bununla da İrəvanın işğalçılıq siyasətini dəstəkləyib.

Bundan əlavə, Bəşər Əsəd 44 günlük Vətən müharibəsi zamanı Azərbaycana qarşı dezinformasiya kampaniyasında şəxsən iştirak edib. O, "Suriyadan olan silahlıların Azərbaycan tərəfində müharibədə iştirak etdiyini" iddia edib. Bu, primitiv yalan idi. Bəs Əsəd niyə yalan danışırdı? Çünki o, həmişə ermənipərəst olub. İş o yerə çatıb ki, o, ermənilərin primitiv anti-Azərbaycan yalanlarını təkrarlayıb.

Həqiqət budur ki, 2019-cu ildə yaradılmış və YPG terrorçusunun adını daşıyan  "Nubar Ozanyan Briqadası" Azərbaycan Ordusunun Qarabağda həyata keçirdiyi antiterror tədbirlərindən sonra ermənilərə dəstək bəyanatı yayıb. Suriya və Ermənistanın xüsusi xidmət orqanları ilə əlaqəli olan bu qrup Azərbaycanı hədələyərək, ölkəmizə qarşı sərt və barışmaz davranacağını bəyan edib. Yeri gəlmişkən, Ozanyanın özü 2015-ci ilin iyulunda Suriyadakı "Beynəlxalq Azadlıq Batalyonu"nun (IFB) aparıcı kadrlarından biri olub. O, IFB-nin üzvü olan erməni, ərəb, fələstinli, yunan, kanadalı, belçikalı və fransız terrorçulara təlim keçib. 1991-1992-ci illərdə Ozanyan Qarabağda olub, Azərbaycana qarşı terror müharibəsində iştirak edib.

Butün bunlara isə ölkəsini talan edib xaricə qaçan Bəşər Əsəd himayədarlıq edib. Suriyadakı müharibə illərində rəsmi İrəvan və dünyadakı erməni lobbisi Əsəd rejiminə siyasi və hərbi dəstək verib. Amma bu, Əsədi  xalqın qəzəbindən xilas edə bilməyib...

Rizvan CƏFƏROV,

"Azərbaycan"