“Qaz təchizatı haqqında” qanun layihəsinin hazırlanması müasir dövrün çağırışlarına və sektorun normativ-hüquqi tənzimlənməsində mövcud olan boşluqların aradan qaldırılmasına xidmət edir.
AZƏRTAC xəbər verir ki, bu sözləri energetika nazirinin müavini Samir Vəliyev Milli Məclisin Təbii ehtiyatlar, energetika və ekologiya komitəsinin bugünkü iclasında çıxışı zamanı söyləyib.
Nazir müavini bildirib ki, son illərdə enerji effektivliyi, istilik təchizatı və s. sahələrdə bir sıra mühüm qanun layihələri hazırlanaraq qəbul olunub və bu sənədlər enerji sektorunun inkişafı üçün ciddi hüquqi baza formalaşdırıb. “Qaz təchizatı haqqında” qanun layihəsi isə bu ardıcıllığın növbəti mərhələsi olmaqla, enerji təhlükəsizliyinin təmin edilməsi, infrastrukturun müasirləşdirilməsi və xidmət keyfiyyətinin artırılması məqsədi daşıyır.
S.Vəliyev qeyd edib ki, yeni qanun layihəsində qaz təchizatı sahəsində fəaliyyət göstərən tərəflərin hüquq və vəzifələri, istehlakçılarla münasibətlərin tənzimlənməsi, təhlükəsizlik və texniki tələblər, habelə dövlət nəzarətinin mexanizmləri dəqiq şəkildə əks olunacaq. Layihə, həmçinin yaşıl enerji keçidi və dayanıqlı enerji siyasəti çərçivəsində qaz sektorunun strateji əhəmiyyətini nəzərə alaraq hazırlanıb.
“Mövcud şəraitdə qaz təchizatı ilə bağlı münasibətlərin hüquqi tənzimlənməsi zəruridir. Bu qanun layihəsi yalnız texniki tələbləri deyil, həm də sosial və iqtisadi amilləri əhatə edir. Eyni zamanda, beynəlxalq təcrübə və innovativ yanaşmalar da nəzərə alınıb”, - deyə S.Vəliyev əlavə edib.
