Azərbaycanın müasir tarixində elə məqamlar var ki, həmin anlar yalnız bir səfər, bir görüş və ya bir tədbir çərçivəsində qiymətləndirilməməlidir. Bu məqamlar dövlətçilik tarixinin bütöv bir səhifəsinə çevrilir. Müzəffər Ali Baş Komandan, Prezident İlham Əliyevin Naxçıvana hər səfəri də məhz belə siyasi və mənəvi məna daşıyır. Naxçıvan Azərbaycan dövlətçiliyinin ayrılmaz parçası, milli yaddaşımızın mühüm ünvanı və Azərbaycanın geosiyasi xəritəsində xüsusi strateji əhəmiyyətə malik qədim torpaqdır. Bu məkana Prezident səviyyəsində göstərilən xüsusi diqqət isə təsadüfi deyil. Çünki Naxçıvan Azərbaycanın həm tarixini, həm bu gününü, həm də gələcəyə hesablanmış strateji baxışını özündə birləşdirən məkanlardan biridir.
Bu fikirləri AZƏRTAC-a açıqlamasında politoloq Əfəndi İbrahimli səsləndirib.
Onun sözlərinə görə, Müzəffər Ali Baş Komandanın Naxçıvana səfərləri fonunda bir həqiqət xüsusilə aydın görünür: Azərbaycan artıq yalnız öz ərazi bütövlüyünü bərpa edən dövlət deyil, qazandığı Zəfəri uzunmüddətli siyasi, iqtisadi, nəqliyyat və təhlükəsizlik strategiyasına çevirən ölkədir.
“Bu gün Naxçıvana baxarkən yalnız keçmiş görünmür. Naxçıvan həm də gələcəyin Azərbaycanında mühüm rol oynayacaq strateji mərkəz kimi dəyərləndirilməlidir. Zəngəzur dəhlizinin reallaşması istiqamətində atılan addımlar, Azərbaycanın Şərq-Qərb və Şimal-Cənub nəqliyyat bağlantılarında artan rolu Naxçıvanın geosiyasi əhəmiyyətini daha da artırır. Prezident İlham Əliyevin Türküstanda Türk Dövlətləri Təşkilatının qeyri-rəsmi Zirvə Görüşündə çıxışı zamanı da Zəngəzur dəhlizinin Orta Dəhlizin əsas seqmentlərindən birinə çevriləcəyini vurğulaması Azərbaycanın bu məsələyə strateji baxışını ortaya qoydu.
Burada diqqət çəkən mühüm məqam ondan ibarətdir ki, Naxçıvan məsələsi artıq yalnız regional məsələ deyil. Naxçıvan Türk dünyasının Qərbə açılan mühüm qapılarından biridir. Azərbaycanı Türkiyə və daha geniş mənada Türk dünyası ilə birləşdirən coğrafi xəttin gələcək inkişafında Naxçıvanın rolu xüsusi əhəmiyyət daşıyır. Bu baxımdan, Prezident İlham Əliyevin Naxçıvana səfərlərini yalnız bölgəyə dövlətimizin başçısının növbəti səfəri kimi təqdim etmək doğru olmaz. Bu səfərlər dövlət siyasətinin yerində nümayişidir. Prezidentin bölgələrə səfərləri Azərbaycan dövlətinin ərazi bütövlüyü ilə yanaşı, hər bir bölgənin inkişafını, təhlükəsizliyini və gələcək potensialını diqqət mərkəzində saxladığını göstərir”, - deyə politoloq əlavə edib.
Ə.İbrahimli bildirib ki, Naxçıvanın tarixi də, coğrafiyası da, insanları da Azərbaycan dövlətçiliyinin möhkəm sütunlarından biridir. Ulu Öndər Heydər Əliyevin siyasi fəaliyyətində xüsusi yer tutan bu qədim diyar bu gün Prezident İlham Əliyevin rəhbərliyi ilə yeni inkişaf mərhələsinə qədəm qoyur. Bu gün Azərbaycan öz gücünü yalnız hərbi meydanda deyil, diplomatiyada, iqtisadiyyatda, nəqliyyatda, enerji siyasətində və beynəlxalq münasibətlər sistemində də nümayiş etdirir. Naxçıvan isə bu böyük strategiyanın mühüm halqalarından biridir. Bu qədim diyar bu gün dünənin xatirəsi deyil. Naxçıvan Azərbaycanın gələcəyinin mühüm ünvanlarından biridir və bu sabahın əsasını isə güclü dövlət, milli birlik, qətiyyətli siyasi iradə və Zəfərdən doğan yeni reallıqlar təşkil edir.
677jpg_1790033437.jpg)
