Bu il şəhər üzrə 3 sinfin bütün məzunları ali məktəblərə qəbul olmuşlar
Mingəçevir Şəhər İcra Hakimiyyətində ümumtəhsil məktəblərinin məzunları, bu il 600-dən yuxarı bal toplayaraq ali məktəblərə qəbul olan tələbələrlə görüş keçirilib.
Görüşü açan ŞİH-in başçısı İlham İsmayılov şəhərin ümumtəhsil məktəblərinin yüksək bal toplayaraq ali məktəblərə qəbul olan məzunlarını və onların valideynlərini, müəllimləri təbrik edib. Qeyd edib ki, Azərbaycanda təhsil sahəsində aparılan islahatlar təhsil sahəsində uğurların artması, şagird və tələbələrin nailiyyətlərinin yüksəlməsi ilə müşayiət olunur: “Gənclər cəmiyyətin sabahının yaradıcılarıdır. Ümummilli Lider Heydər Əliyev gənclərin müasir dövrün tələblərinə uyğun formalaşmasına həmişə xüsusi diqqət verib. Ulu Öndərin Azərbaycana rəhbərliyi illərində yüzlərlə yeni məktəb binası, ali məktəblər üçün müasir korpuslar tikilərək istifadəyə verilib. Ulu Öndərin apardığı işlər bu gün Prezident İlham Əliyev tərəfindən uğurla davam etdirilir. İlbəil təhsilə, gəncliyə, onların təhsilinə qayğı və diqqət artır. Birinci vitse-prezident Mehriban xanım Əliyevanın təşəbbüsü və rəhbərliyi ilə Heydər Əliyev Fondu təhsil sahəsində müxtəlif layihə və proqramlar həyata keçirir. Təsadüfi deyil ki, fondun “Yeniləşən Azərbaycana yeni məktəb” proqramının əsas məqsədi təhsil sahəsində mövcud olan problemlərin həllinə kömək etmək, ölkə miqyasında müasir standartlara cavab verən təhsil kompleksləri yaratmaq, tədrisin səviyyəsinə bilavasitə təsir edən problemləri aradan qaldırmaqdır”.
Tədbirdə məlumat verildi ki, bu il Mingəçevir şəhəri üzrə XI sinifləri 1455 nəfər bitirmişdir. Onlardan 715 nəfəri ali məktəbə qəbul olmuşdur. 38 mingəçevirli məzun 600 baldan yuxarı nəticə əldə etmişdir. Onlardan bir nəfəri isə ölkə üzrə ən yüksək nəticə - 700 bal toplamışdır. 4 nömrəli tam orta məktəbin, Texniki və Humanitar Fənlər Liseyinin hər birində bir sinfin, Təbiət-Riyaziyyat Humanitar Fənlər Təmayüllü Liseyinin iki sinfinin bütün şagirdləri 100 faiz nəticə göstərərək ali məktəblərə qəbul olmuşlar.
Azərbaycan gənci təkcə təhsil və idmanda deyil, hər sahədə nümunə göstərir, milli-mənəvi dəyərlərimizə sadiqliyini nümayiş etdirir. Azərbaycan gəncləri Vətən torpaqlarının keşiyində durur, onu göz bəbəkləri kimi qoruyurlar. Birinci və İkinci Qarabağ müharibələrində, Aprel döyüşlərində, antiterror əməliyyatında Azərbaycan gəncləri fədakarlıq göstəriblər, canları, qanları ilə böyük Zəfəri qazanıblar. Yeri gəlmişkən qeyd edək ki, bu il ali məktəblərə qəbul olan mingəçevirlilər sırasında bir şəhid və iki qazi övladı da var.
Görüşdə çıxış edənlər Mərkəzi Aran Regional Təhsil İdarəsinin Mingəçevir Şəhər Təhsil sektorunun müdiri Rüstəm Aslanov, Təbiət-Riyaziyyat Humanitar Fənlər Təmayüllü Liseyin direktoru Aidə İsmayılova, 689 balla Tibb Universitetinə qəbul olan Nəzrin Abdullayevanın valideyni Günay Abdullayeva, Texniki Humanitar Fənlər Liseyinin müəllimi, rəhbərlik etdiyi sinfin bütün şagirdləri ali məktəbə qəbul olmuş Günay Əliyeva, Vətən müharibəsi qazisi Pərviz Məmmədov, Əməkdar müəllim Mayıl İsmayılov müəllimləri, valideynləri, gəncləri təbrik edərək xoş arzularını çatdırıblar.
Təbiət-Riyaziyyat Humanitar Fənlər Təmayüllü Liseyin məzunu, 675 bal toplayaraq Baki Dövlət Universitetinin Hüquqşünaslıq fakültəsinə daxil olan Cabbar Cabbarov əldə etdiyi nailiyyətlərə görə valideynlərinə və müəllimlərinə, xüsusən gənclərə dəstək olan, hər zaman diqqət və qayğı göstərən Prezident İlham Əliyevə minnətdarlığını ifadə edib, yüksək təhsili ilə buna cavab verəcəyini bildirib.
Tədbirin sonunda yüksək nəticə göstərmiş tələbələrə şəhər icra hakimiyyətinin xatirə hədiyyələri təqdim edilib.
Lazım QULİYEV,
“Azərbaycan”
