Aprelin 24-də Mingəçevir Dövlət Universiteti, Psixologiya Elmi-Tədqiqat İnstitutu və “Müasir Azərbaycan Psixoloqları” İctimai Birliyinin birgə təşkilatçılığı ilə “Psixologiyada multidisiplinar elmi tədqiqatlar” konfransı öz işinə başlayıb. Mingəçevirdə Heydər Əliyev Mərkəzində keçirilən tədbir regionda psixologiya elminin müxtəlif istiqamətlərini bir araya gətirən ilk genişmiqyaslı elmi platforma kimi əhəmiyyət daşıyır.
Tədbir iştirakçıları əvvəlcə Ümummilli lider Heydər Əliyevin abidəsini ziyarət edərək xatirəsini ehtiramla yad edib, abidə önünə gül dəstələri düzüblər. Daha sonra Ulu Öndərin və şəhidlərin xatirəsi bir dəqiqəlik sükutla anılıb, Azərbaycan Respublikasının Dövlət Himni səsləndirilib.
Açılış nitqi ilə çıxış edən Mingəçevir Şəhər İcra Hakimiyyətinin başçısı İlham İsmayılov regionlarda elmi konfransların keçirilməsinin əhəmiyyətini vurğulayaraq bildirib ki, psixoloji rifahın gücləndirilməsi, ailə institutunun möhkəmləndirilməsi və cəmiyyətin dayanıqlı inkişafı baxımından psixologiya elminin rolu getdikcə artır. O, qeyd edib ki, bu kimi platformalar elmi biliklərin praktik tətbiqinə və ictimai maarifləndirməyə mühüm töhfə verir.
Mingəçevir Dövlət Universitetinin rektoru Anar Eminov konfransın təşkilini universitetin elmi-tədqiqat fəaliyyətinin genişləndirilməsi və beynəlxalq elmi əməkdaşlıqların gücləndirilməsi istiqamətində mühüm addım kimi dəyərləndirib. O bildirib ki, konfransa 27 müəssisə və təşkilatdan ümumilikdə 265 elmi məqalə təqdim olunub.
Elmi platformanın psixologiya üzrə yeni tədqiqat istiqamətlərinin formalaşmasındakı rolunu vurğulayan rektor, konfransın təşkilinə verdiyi yüksək dəstəyə görə Psixologiya Elmi-Tədqiqat İnstitutunun sədri Elnur Rüstəmova xüsusi minnətdarlığını ifadə edib.
Bakı Slavyan Universitetinin rektoru Anar Nağıyev çıxışında göstərilən qonaqpərvərliyə görə təşəkkür edərək qeyd edib ki, bu cür konfranslar ali təhsil müəssisələri arasında elmi dialoqun inkişafına, təcrübə mübadiləsinin genişlənməsinə və birgə tədqiqatların formalaşmasına mühüm töhfə verir. O, psixologiyanın müasir dövrün aktual çağırışlarına cavab verən aparıcı elmi sahələrdən biri olduğunu vurğulayıb və tədbirin yüksək səviyyədə təşkilini təqdir edib.
Narınc Psixologiya Mərkəzinin təsisçisi, klinik psixoloq Narınc Rüstəmova isə çıxışında psixologiya elminin müasir cəmiyyət üçün artan əhəmiyyətindən danışaraq, multidisiplinar yanaşmanın real problemlərin həllində daha effektiv nəticələr verdiyini qeyd edib.
Tədbirdə Türkiyənin Bahçeşehir Universitetinin prorektoru professor doktor Tunç Bozbura və Özbəkistanın Səmərqənd Dövlət Universitetinin prorektoru doktor Akmal Akhatovun videotəbrikləri nümayiş olunub. Çıxışlarda konfransın beynəlxalq elmi əməkdaşlıq baxımından əhəmiyyəti vurğulanıb və təşkilatçılara uğurlar arzulanıb.
Tədbirin bədii hissəsində universitetin müəllim və tələbələrinin ifasında milli musiqi nümunələri və vətənpərvərlik ruhlu kompozisiyalar təqdim olunub. Bu çıxışlar iştirakçılar tərəfindən böyük maraq və alqışla qarşılanıb.
Konfrans proqramına uyğun olaraq “Ailə münasibətlərində dəyişən rollar və nəticələr” mövzusunda panel müzakirələr təşkil olunub. Müzakirələrdə ailə institutunun psixoloji transformasiyası, ailənin inkişaf mərhələlərində baş verən dəyişikliklər, qloballaşan cəmiyyətin ailə strukturlarına təsiri və evlilik münasibətlərində davranışların qavranılması kimi aktual mövzular üzrə elmi yanaşmalar təqdim edilib.
Konfrans çərçivəsində Psixologiya Elmi-Tədqiqat İnstitutunun Klinik Psixologiya şöbəsinin müdir müavini, uzman klinik psixoloq Narınc Rüstəmova tərəfindən “Dərmansız yanaşma: depressiya və təşvişdə neyropsixoloji əsaslı neyrotənzimləmə” mövzusunda workshop keçirilib.
Konfrans işini sabah davam etdirəcək; müxtəlif elmi istiqamətlər üzrə məruzələr dinləniləcək və müzakirələr aparılacaq.
"Azərbaycan"
jpg_1777040030.jpg)
