Azərbaycanın Qara Dəniz İqtisadi Əməkdaşlıq Təşkilatının Parlament Assambleyasının (QDİƏT PA) plenar iclasına ev sahibliyi etməsi region ölkələri ilə əməkdaşlığa verdiyi önəmin bariz nümunəsidir. Azərbaycan hər zaman əməkdaşlığı, dialoqu və qarşılıqlı hörməti öz xarici siyasətinin prioritet istiqamətlərindən biri kimi qəbul edib. Azərbaycan yalnız regional deyil, həm də beynəlxalq müstəvidə sülhü, inkişafa çağırışı və bərabər imkanlar prinsipini dəstəkləyən ölkədir. Bütün bu uğurlar, Prezident İlham Əliyevin qətiyyətli və uzaqgörən siyasətinin nəticəsidir.
AZƏRTAC xəbər verir ki, bu fikirləri Milli Məclisin sədri, QDİƏT PA-nın sədri Sahibə Qafarova Qara Dəniz İqtisadi Əməkdaşlıq Təşkilatının Parlament Assambleyasının (QDİƏT PA) 65-ci plenar sessiyasının açılış mərasimində deyib.
O qeyd edib ki, təşkilata üzv ölkələri birləşdirən ortaq tarix, mədəniyyət, sülh arzusu və bərabərlik istəyi əməkdaşlığın əsasını təşkil edir. Demokratiya, qarşılıqlı hörmət və etimad bu assambleyanın və təşkilatın təməl prinsipləridir.
“Parlamentlərarası əlaqələrin gücləndirilməsi demokratiyanın möhkəmləndirilməsi baxımından vacib əhəmiyyət daşıyır. Xüsusi diqqət dayanıqlı inkişaf məqsədlərinə yönəldilməlidir. Bu sessiya çərçivəsində qəbul olunacaq qərarlar həm operativ, həm də həlledici olmalı, real nəticələrə gətirib çıxarmalıdır. Əməkdaşlığımızın yeni formaları – tələbə mübadiləsi, birgə mədəni layihələr, tədqiqat proqramları və digər sahələr üzrə təcrübə paylaşımı bizi daha da yaxınlaşdıracaq. Biz insan hüquqlarının müdafiəsini davam etdirməli, assambleyanı regionda sülhün və əməkdaşlığın simvoluna çevirməliyik. Unutmayaq ki, parlamentlər xalqların səsini ifadə edən, onların maraqlarına xidmət edən qurumlardır”, - deyə S.Qafarova bildirib.
Onun sözlərinə görə, Azərbaycanın təşəbbüsü ilə reallaşan enerji və nəqliyyat layihələri regionun iqtisadi inteqrasiyasına və sabitliyinə mühüm töhfə verir. Orta Dəhliz boyunca etibarlı tərəfdaş kimi Azərbaycanın rolu günbəgün artır və ölkəmiz mühüm nəqliyyat-logistika qovşağına çevrilib.
“Tədbir çərçivəsində siz işğaldan azad olunmuş ərazilərimizə səfər edəcək, Ermənistanın həmin ərazilərə vurduğu dağıntıların miqyasını öz gözlərinizlə görəcək və eyni zamanda aparılan genişmiqyaslı bərpa-quruculuq işlərinin şahidi olacaqsınız. Bu proses, Azərbaycanın gələcəyə olan inamla, sülh və inkişaf yolu ilə irəlilədiyini göstərir”, - deyə Milli Məclisin sədri əlavə edib.
