İran Prezidenti böhran şəraitində davamlı iqtisadi siyasətə və sosial dəstəyin artırılmasına ehtiyac olduğunu bildirib. O, ABŞ və İsrailin zərbələri nəticəsində başlayan müharibənin yaratdığı iqtisadi və sosial problemlərin müvəqqəti tədbirlərlə həll edilə bilməyəcəyini, bunun uzunmüddətli və struktur siyasət həllərini tələb etdiyini deyib.
IRNA agentliyinin məlumatına görə, Əmək və Sosial Rifah Nazirliyinin nümayəndələri ilə görüşdə Pezeşkian müharibənin nəticələrinin hədəf proqramlar vasitəsilə idarə olunmasının, davamlı məşğulluğun genişləndirilməsinin və sosial dəstək mexanizmlərinin gücləndirilməsinin vacibliyini vurğulayıb.
Görüşdə işçilərin əmək haqqı, təqaüdçülərin gəlirləri, əmək bazarının vəziyyəti və işsizlik müavinətləri barədə hesabatlar təqdim edilib. Nazirliyin nümayəndələri müharibə şəraiti səbəbindən bir sıra istehsal və xidmət sektorlarında itkilər barədə məlumat veriblər və işçilərə, qulluqçulara və aztəminatlı qruplara dəstək tədbirləri təqdim ediblər.
Hesabatları şərh edən Pezeşkian bildirib: "Müharibənin nəticələrini aradan qaldırmaq üçün ehtiyatlı, sistemli və uzunmüddətli yanaşma ilə hərəkət etməliyik." O, təkcə müvəqqəti iqtisadi tədbirlərin yetərli olmadığını vurğulayıb: "Bəzi mövcud tədbirlər zəruri olsa da, onlar sadəcə müvəqqəti yardımdır. İqtisadi və sosial problemlərin əsas səbəblərini aradan qaldırmaq üçün struktur və davamlı planlar lazımdır."
İran Prezidenti həmçinin müharibə nəticəsində didərgin düşmüş insanlar üçün daimi iş yerlərinin yaradılmasının vacibliyini vurğulayaraq planlaşdırmanın işsizlik müavinətləri ilə məhdudlaşmamalı, həm də davamlı iş yerlərinin yaradılmasına yönəlməli olduğunu bildirib. O, dövlət qurumlarında istehlak vərdişlərinin yenidən nəzərdən keçirilməsinə çağırıb və tullantıların azaldılmasının vacibliyini vurğulayıb. Pezeşkian həmçinin əhalini su, elektrik enerjisi, qaz və yanacağa qənaət etməyə, ictimai nəqliyyatdan istifadəni artırmağa və inzibati xərclərin azaldılmasına çağırıb. Prezident həmçinin aşağı gəlirli vətəndaşlar üçün elektron qida paylama sisteminin davam etdirilməsini dəstəkləyib və yardımın əhalinin ən həssas təbəqələrinə yönəldilməli olduğunu bildirib.
Sonda Məsud Pezeşkian müvafiq strukturlara, iqtisadi və sosial göstəricilərin müntəzəm monitorinqinin keçirilməsi və departamentlər arasında koordinasiyanın gücləndirilməsi barədə tapşırıqlar verib.
Rizvan CƏFƏROV,
“Azərbaycan”
png_1779181581.png)
