Bu münasibətlə festivalın təntənəli açılış mərasimi olub. Festival rayon icra hakimiyyəti, Lənkəran-Astara Regional Təhsil İdarəsi, Masallı Dövlət Regional Kolleci və “Regional hüquqi və iqtisadi maarifləndirmə” İctimai Birliyinin birgə təşkilatçılığı ilə, həmçinin bir sıra yerli təşkilat və media tərəfdaşlarının dəstəyi ilə reallaşıb.
Tədbir müasir Azərbaycanın memarı Heydər Əliyevin kitaba, təhsilə və ziyalılığa verdiyi yüksək dəyərin rəmzi olaraq təşkil edilib. Festivalın açılış günündə Mərkəzi Rayon Kitabxanası xüsusi kitab stendi təqdim edərək Ulu Öndərin zəngin ömür yolu və siyasi irsinə diqqət çəkib. Masallı RİH-in başçısı Araz Əhmədov çıxış edərək, mütaliənin rayonun mədəni həyatında əvəzsiz rol oynadığını vurğulayıb. O, gənc nəslin dünyagörüşünün formalaşmasında bu cür festivalların əhəmiyyətini qeyd edərək, rayon sakinlərini üçgünlük bilik bayramında fəal iştirak etməyə çağırıb.
Tədbirdə iştirak edən millət vəkilləri Cavanşir Paşazadə və Məşhur Məmmədov kitabın cəmiyyətin mənəvi inkişafında oynadığı roldan danışıblar. Məşhur Məmmədov rəqəmsallaşmanın sürətinə baxmayaraq, klassik kitabın əvəzsizliyini vurğulayıb. Cavanşir Paşazadə isə festivalın rayonun intellektual potensialını göstərdiyini qeyd edib. Şair Rüstəm Behrudi çıxışı zamanı kitabın insanı öz köklərinə və tarixinə bağlayan mühüm vasitə olduğunu vurğulayıb, səsləndirdiyi təsirli poeziya nümunəsi ilə tədbir iştirakçılarına duyğulu anlar yaşadıb. Tanınmış alim Füzuli Bayat isə mütaliənin və elmi araşdırmaların xalqın mədəni yaddaşını qoruduğunu, türk ruhunun qədim kodlarının kitablarda əks olunduğunu diqqətə çatdırıb.
“Regional hüquqi və iqtisadi maarifləndirmə” İctimai Birliyinin sədri Arzu Bağırova bu cür təşəbbüslərin gənclərin həm mənəvi, həm də hüquqi və iqtisadi biliklərinin artırılmasına xidmət etdiyini bildirib. Masallı Dövlət Regional Kollecinin direktoru Rövşən Qurbanov isə kollecin müəllim və tələbə heyətinin festivalda fəal iştirakının təhsil müəssisəsinin maarifləndirmə missiyasının əhəmiyyətini göstərdiyini qeyd edib.
Festival sabah da davam edəcək. Proqram çərçivəsində panel müzakirələr və tanınmış yazarlarla görüşlər, o cümlədən imza saatları nəzərdə tutulub. Festival iştirakçıları Varis, Rövşən Abdullaoğlu, Amin Oruc, Günel Əkbər, Elgüsel, Əziz Yaqubzadə, Əli Fərəcov, Samir Turan, Mail Yaqub, Mürçid Mehdi və Müşfiq Xan kimi yazarlarla ünsiyyət imkanı əldə edəcəklər.
Seyran CAVADOV,
“Azərbaycan”
