Fransada 2027-ci il prezident seçkiləri yaxınlaşdıqca, baş örtüyü ilə bağlı siyasi müzakirələr sosial mediaya da daşınıb. İfrat sağçı "Milli Birlik" (RN) partiyasının ictimai yerlərdə baş örtüyünü qadağan etmək və buna əməl etməyənləri cərimələmək planına qarşı çıxan qadınlar özünəməxsus etiraz üsulu seçiblər.
Müsəlman qadınlarla həmrəylik nümayiş etdirmək istəyən bir çox fransız qadın baş örtüyü taxdıqları fotoları TikTok, Instagram və X hesablarında paylaşırlar. hətta bu hərəkata bəzi kişilər də qoşulub.
“Le Parisien” qəzeti bu hərəkatı Fransada getdikcə genişlənən bir həmrəylik dalğası kimi təsvir edib. Qadınlar paylaşımlarında qadağaya qarşı olduqlarını bildirir və baş örtüyü taxan müsəlman qadınların əsassız şəkildə hədəf alındığına dair fikirlərini ifadə edirlər.
Bəzi istifadəçilər mesajlarında qeyd ediblər ki, əgər qadağa tətbiq olunarsa, qeyri müsəlman qadınlar belə, özləri də baş örtüyü taxacaqlar. Sosial media istifadəçilərindən biri bildirib ki, 2027-ci ildə baş örtüyü taxmaqla qadağanın icrasını çətinləşdirəcəklər; digəri isə daha çox qadının başını örtəcəyini qeyd edib.
Müzakirələr RN (Milli Birlik) partiyasının deputatı Jan-Filip Tanginin bəyanatları ilə alovlandı. Tangi bildirdi ki, əgər onun partiyası 2027-ci ildə hakimiyyətə gələrsə, ictimai yerlərdə baş örtüyü qadağasına əməl etməyən qadınlara cərimələr tətbiq olunacaq.
Marin Le Pen ictimai yerlərdə baş örtüyünün qadağan edilməsini nəzərdə tutan bu tədbiri referendum yolu ilə Fransa xalqının müzakirəsinə çıxarmaq planlarını açıqladı. Le Penin təklifi Fransada həm hüquqi cəhətdən həyata keçirilə bilməsi, həm də dini azadlıqlar baxımından doğuracağı nəticələr nöqteyi-nəzərindən müzakirə olunur.
Hazırda Fransa sosial şəbəkələrində "Əgər bu qanun qəbul edilərsə, mən də baş örtüyü taxacağam" fikrini ifadə edən paylaşımlar geniş yer tutur.
jpg_1790976482.jpg)
