Dünya dərin və çoxşaxəli dəyişikliklər dövrünü yaşayır. Bu proseslər beynəlxalq siyasətə, iqtisadi sistemlərə və ictimai nizamın formalaşmasına ciddi təsir göstərir. Dünya əhalisinin təxminən 60 faizinin yaşadığı Asiya qitəsi qədim sivilizasiyaların beşiyi olmaqla yanaşı, müxtəlif xalqların tarixini, dilini, mədəniyyətini və ənənələrini özündə birləşdirən unikal resurslara malikdir. Bu zənginlik Asiyanın qlobal və regional problemlərin həllindəki rolunu daha da artırır.
AZƏRTAC xəbər verir ki, bu sözləri İran İslam Şurası Məclisinin sədri Məhəmməd Baqir Qalibaf Bakıda keçirilən Asiya Parlament Assambleyasının (APA) 15-ci plenar sessiyasında çıxışı zamanı söyləyib.
O qeyd edib ki, regional münaqişələr, terror təhdidləri, pandemiyalar, iqlim dəyişikliyi, qeyri-qanuni fəaliyyətlər və hegemonluq siyasəti təkcə lokal deyil, qlobal sabitlik üçün də ciddi təhlükə yaradır. Belə bir şəraitdə çoxtərəfli diplomatiya və beynəlxalq əməkdaşlıq zərurətə çevrilir. İnsan hüquqlarını qorumaq, hər bir fərdin səsinin eşidilməsini təmin etmək üçün qətiyyətli mövqe sərgiləməliyik.
“Dünya yeni bir sülh, təhlükəsizlik və çoxtərəfli əməkdaşlıq erasına ehtiyac duyur. Asiya qitəsi bu yeni mərhələnin əsas təşəbbüskarlarından biri olmalıdır. Bu məqsədə nail olmaq üçün ticarət maneələrinin aradan qaldırılması və iqtisadi əməkdaşlıq mexanizmlərinin inkişafı, Asiya ölkələri arasında parlamentlər səviyyəsində iqtisadi əlaqələrin genişləndirilməsi, elmi, mədəni və texnoloji sahələrdə inteqrasiyanın gücləndirilməsi, Asiya regionunun sülhün və sabitliyinin qorunmasına dair vahid strategiyanın formalaşdırılması zəruridir. Asiya xalqlarının həmrəyliyi və birgə səyləri regionun daha təhlükəsiz və firavan gələcəyinə mühüm töhfə verəcək”, - deyə İran İslam Şurası Məclisinin sədri əlavə edib.
jpg_1775472819.jpg)
