Sənəd qəbulu onlayn qaydada Elm və Təhsil Nazirliyinin “portal.edu.az” platforması vasitəsilə 19 may 2026-cı il tarixindən başlayaraq 8 iyun 2026-cı il saat 18:00-dək həyata keçiriləcəkdir.
Namizədlər doktorantura və ya dissertanturaya qəbul üçün aşağıdakı sənədləri elektron qaydada portala daxil etməlidirlər:
* ərizə (doktoranturanın fəaliyyət göstərdiyi müəssisənin və yaxud təşkilatın rəhbərinin adına);
* kadrların şəxsi-qeydiyyat vərəqi;
* tərcümeyi-hal;
* 2 ədəd fotoşəkil (3x4 sm ölçüdə);
* iş yerindən xasiyyətnamə;
* iş stajı olanlar üçün Azərbaycan Respublikası Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sisteminin “Əmək və məşğulluq” altsistemindən əmək müqavilələrinə dair çıxarış, Azərbaycan Respublikası Əmək Məcəlləsinin 7-ci maddəsinin 2-1-ci hissəsi ilə müəyyən edilmiş hallarda, eləcə də 2014-cü il iyulun 1-dək xitam verilmiş əmək müqavilələrinə münasibətdə isə əmək kitabçasından çıxarış;
* çap olunmuş elmi işlərin siyahısı və ya seçilmiş ixtisas üzrə referat;
* ali təhsil müəssisəsini bitirmək haqqında diplomun müvafiq qaydada təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);
* şəxsiyyəti təsdiq edən sənədin surəti.
Fəlsəfə doktoru proqramı üzrə doktoranturaya ali təhsil pilləsinin magistratura səviyyəsini bitirən (magistr dissertasiyasını müdafiə edən), yaxud təhsili ona bərabər tutulan Azərbaycan Respublikasının vətəndaşları müsabiqə əsasında qəbul olunurlar. Fəlsəfə doktoru proqramı üzrə doktoranturaya qəbul olmaq istəyənlər 2025-ci ilin iyun ayında (İELTS, TOEFL, Cambridge English Qualifications, TestDaf, DELF, DALF, STANAG-a malik olanlar xarici dil üzrə qəbul imtahanından azad olunurlar) “Xarici dil” fənnindən keçid balını toplayan şəxslər “Fəlsəfə” fənni üzrə imtahana buraxılırlar. “Fəlsəfə” fənni üzrə imtahanda “məqbul” qiymət almış şəxslər “İxtisas” fənni üzrə imtahana buraxılırlar. Fəlsəfə və ixtisas fənni üzrə imtahanlar sentyabr ayında keçiriləcəkdir.
Əlavə suallar yarandığı təqdirdə www.esri.gov.az saytından və ya İqtisadi Elmi Tədqiqat İnstitutunun Elmi katibliyindən məlumat almaq olar.
Rəhbərlik
