Gəncə Dövlət Universitetində (GDU) 2023-2024-cü tədris ilinin yaz semestr imtahanlarına hazırlıqla bağlı tələbələrlə görüş keçirilmişdir.
 Görüşdə universitetin rektoru professor Yusif Yusibov çıxış edərək diqqətə çatdırmışdır ki, imtahanqabağı ənənə halını alan görüşün keçirilməsində əsas məqsəd tələbələrin imtahanlara hazırlıq səviyyəsini öyrənmək, imtahanlarla bağlı çətinlik və problemlərini dinləmək, imtahanlara hazırlıq prosesində qarşıya çıxa biləcək çətinliklərin operativ həllinə nail olmaqdır.  
Sonra  universitetin tədris məsələləri üzrə prorektoru Şahin Xurşudov çıxış edərək imtahanların keçirilmə qaydaları barədə ətraflı məlumat vermişdir.  Prorektor bildirmişdir ki, universitetdə imtahan sessiyasının mövcud əsasnaməyə uyğun keçirilməsi üçün lazımi şərait və imtahanların gedişinə operativ nəzarəti, tələbələrin biliyinin qiymətləndirilməsində şəffaflığı təmin etmək üçün imtahan qərargahı və apellyasiya komissiyası yaradılmışdır. O da diqqətə çatdırılmşdır ki, imtahanlar yazılı test üsulu ilə, pilot layihə olaraq biologiya müəllimliyi ixtisasında şifahi, yaradıcılıq tələb edən ixtisaslarda isə qabiliyyət imtahanı formasında keçiriləcək. Sessiya zamanı üzürlü səbəbdən imtahanda iştirak etməyən və akademik borcu yaranmış tələbələrə təkrar imtahan vermək üçün şəraitin yaradılması nəzərdə tutulmuşdur.
Görüşdə rektor tələbələrin imtahanlarla bağlı təkliflərini dinləmiş və tələbələrin müraciəti əsasında bir sıra  güzəştlərin tətbiq olunacağını qeyd etmişdir. 

Sabir ƏLİYEV,
"Azərbaycan"