“Euronews” Bakıda keçirilən cüdo üzrə dünya çempionatının ilk yarış günü və Əhməd Yusifovun qızıl medal qazanması barədə məqalə dərc edib.
Cüdo Federasiyasından AZƏRTAC-a bildirilib ki, yazıda cüdoçumuzun doğma azarkeşlər qarşısında qazandığı qələbə mundialın ən yaddaqalan anlarından biri kimi qiymətləndirilib.
Bildirilib ki, Bakıdakı dünya çempionatında yeni əfsanələr doğulacaq, dünya çempionluğunun rəmzi olan qırmızı kürək nişanları sahiblərini tapacaq.
“60 kiloqram çəki dərəcəsində mübarizə aparan Əhməd Yusifov doğma ölkəsində karyerasında ilk dəfə dünya çempionatının finalına yüksəldi. Qırmızı bel nişanını qazanmağı hədəfləyən, yerli azarkeşlərin sevimlisi olan cüdoçu üçün bu, mühüm nailiyyət idi. Bakı tamaşaçılarının güclü dəstəyini arxasına alan Yusifovu doğma arenada böyük final gözləyirdi. Onun rəqibi də ilk dəfə dünya çempionatının finalına yüksələn qazaxıstanlı Şerzod Davlatov idi. Görəsən, Davlatov adını tarixə yazdıra biləcəkdimi? Qazaxıstanlı cüdoçu gün ərzində təmkinli çıxışı ilə seçilmiş və rəqibləri üçün ciddi təhlükə yaratmışdı. Yusifov doğma azarkeşlərin coşqulu dəstəyi ilə bu sınaqdan qalib ayrıldı. Gərginliyin ən yüksək həddə çatdığı final görüşündə hesabda geri düşməsinə baxmayaraq, dönüş yaradaraq qələbə qazandı. Arenada böyük coşqu ilə qarşılanan bu qələbə, şübhəsiz, dünya çempionatının ən yaddaqalan anlarından biri olacaq”, - deyə məqalədə qeyd edilib.
Medalların Beynəlxalq Cüdo Federasiyasının İcraiyyə Komitəsinin üzvü Timur Kemell tərəfindən təqdim edildiyi vurğulanıb.
Məqalədə Əhməd Yusifovun fikirlərinə də yer verilib: “Hər zaman müsbət düşünürəm. Buradakı azarkeşlərin qarşısında məğlub ola bilməzdim. İndi özümü çox yaxşı hiss edirəm”.
Qeyd edək ki, Milli Gimnastika Arenasında keçirilən dünya çempionatına oktyabrın 11-də yekun vurulacaq.
