Ölkədə işsizlərin və eyni zamanda işləyən yoxsulların sayı dayanmadan yüksəlir

Müharibədə məğlubiyyətə uğramasından 5 il keçməsinə baxmayaraq, sülh müqaviləsinin imzalanmasını hələ də uzatması Ermənistanın bir dövlət olaraq tənəzzülünü davam etdirməkdə, onun üzləşdiyi problemlərin miqyasını daha da artırmaqdadır. Baş nazir Nikol Paşinyanın  vəziyyəti dəyişdirəcəyinə ümid edən sadə ermənilər isə hansısa yeniliklərin olmamasından getdikcə daha açıq formada narazılıq edirlər.  

Belə vəziyyətdə Paşinyanın reytinqinin sürətlə aşağı düşməsi müşahidə olunur və hətta belə fikirlər səslənir ki, bu gedişlə onun və komandasının hakimiyyətdən devriləcəyi istisna edilmir.

Sosial-iqtisadi vəziyyətin təhlili də göstərir ki, ölkədə inflyasiya böyük sürətlə dərinləşdiyi halda, əhalinin maddi gəlirlərində hansısa artım yoxdur. Yaranan fərq nisbəti insanların durumunun daha da ağırlaşmasına, onların ifrat yoxsulluq həddində yaşamasına səbəb olur. Rəsmi dairələr də inflyasiya prosesinin nəzarətdən çıxdığını, əhalinin vəziyyətinin ağırlaşdığını etiraf edirlər.

Məsələ bundadır ki, ölkədə ötən il də sosial-iqtisadi vəziyyətdə yaxşıya doğru dəyişiklik olmayıb. Əhalinin maddi gəlirlərində artım qeydə alınmayıb. Qiymətlərdə isə yüksəliş davam edib. Bu da vətəndaşların sosial vəziyyətinin daha da ağırlaşmasına, onların ifrat yoxsulluq həddində yaşamasına səbəb olmaqdadır. Rəsmi dairələr də inflyasiya prosesinin nəzarətdən çıxdığını, vəziyyətin daha da ağırlaşdığını etiraf edirlər.

Bu ərəfədə Dünya Bankı Qrupunun İcraçı Direktorlar Şurası Ermənistan üçün yeni beşillik tərəfdaşlıq çərçivəsini təsdiqləyib. Ermənistanın "Past" nəşri yazıb ki, proqramın məqsədi yoxsulluğu azaltmaq və iş yerlərinin yaradılmasına, sabitliyin artırılmasına töhfə verməkdir. Vurğulanıb ki, Ermənistanda dövlət borcu artacaq. Bununla belə, Dünya Bankı bu ölkəyə pul ayırmağı vəd edib: "Ermənistanda infrastruktur boşluqları, yerli və xarici investisiyaların aşağı səviyyəsi və yüksək işsizlik artım üçün əsas problemlər olaraq qalır. Ermənistanda qeyri-bərabər təhsil və səhiyyə nəticələri məşğulluq və məhsuldarlığa məhdudiyyətlər yaradır. Sosial müdafiə sistemi böhran zamanı həssas qrupları daha yaxşı müəyyən etmək və dəstəkləmək üçün islahatlar tələb edir. Ermənistan da zəlzələlərdən ciddi risklərlə üzləşir və iqlim dəyişikliyinin təsirlərinə qarşı daha həssas olur. Dünya Bankının yeni strategiyası yeni, yüksəkkeyfiyyətli iş yerlərinin yaradılması, keyfiyyətli səhiyyə sisteminə çıxış imkanlarını genişləndirməklə, insan kapitalının gücləndirilməsi və sosial müdafiənin yaxşılaşdırılması məqsədi daşıyır". 

Bildirilib ki, Beynəlxalq Yenidənqurma və İnkişaf Bankı növbəti beş il ərzində təqribən 1 milyard dollar, Beynəlxalq Maliyyə Korporasiyası isə 700 milyon dollara qədər maliyyə vəsaiti ayırmağı planlaşdırır. Üstəlik, beynəlxalq təşkilatlar və Ermənistanın hazırkı hakimiyyət orqanları bunu qeyd etməsələr də, bu vəsaitlər qrant və ya güzəştli kredit kimi deyil, Ermənistanın dövlət borcunu artıran normal şərtlərlə kredit kimi formalaşacaq. 

Paşinyanın hakimiyyətdə olduğu 7 il ərzində Ermənistanın dövlət borcu iki dəfə artaraq, 13 milyard dollara yaxın olub. Beynəlxalq maliyyə korporasiyaları isə borcu bilərəkdən artırır, Ermənistanı daha böyük iqtisadi və siyasi asılılığa salırlar.

Bu gün statistik rəqəmlər ölkədə işsizlərin və eyni zamanda işləyən yoxsulların sayının dayanmadan artdığını göstərir. Nikol Paşinyanın hakimiyyətə gələndə verdiyi vədlərdən biri də ölkədəki işsizliyi minimum həddə çatdırmaq olsa da, son illərdə bunun əksi müşahidə edilib. Hakim partiyanın səriştəsizliyi və qəbul etdiyi səhv qərarlar nəticəsində işsizlik və yoxsulluq artıq pik həddə çatıb. Səlahiyyətli şəxslər minlərlə yeni iş yerinin açıldığını bəyan etsələr də, digər tərəfdən, rəsmi statistikada işləyənlərin sayında minlərlə azalma qeydə alınıb. 

Göründüyü kimi, Ermənistanda vəziyyət sürətlə pisləşir. Demək olar ki, ölkə fəlakətə yuvarlanır. Hakimiyyət sülh müqaviləsinin imzalanmasını yubatdıqca, İrəvan sonu görünməyən böhrana sürüklənəcək. 

Elçin CƏFƏROV,

"Azərbaycan"