Azərbaycan ilə Ermənistan arasında bu ilin martında sülh müqaviləsinin mətninin razılaşdırılmasından sonra regionda dayanıqlı sabitliyin təmin edilməsi imkanı yaranıb. Rəsmi İrəvan sülh sazişini imzalamağa hazır olduğunu bəyan etsə də, bunun üçün məlum şərtləri yerinə yetirmir. Görünən odur ki, erməni tərəfi yenə də spekulyasiya etməklə məşğuldur. Əgər belə olmasaydı, özünü "sülh göyərçini" kimi təqdim edən Ermənistan sazişi imzalamaq üçün praktiki addımlar atardı, şərti dövlət sərhədində davamlı olaraq hərbi təxribatlar törətməzdi.
Milli Məclisin deputatı Sevinc Fətəliyeva qəzetimizə açıqlamasında bildirib ki, rəsmi İrəvan Cənubi Qafqazda sülhün əldə edilməsinə maraqlı olmadığını nümayiş etdirir: "Ermənistanın baş naziri Nikol Paşinyan da çıxışları zamanı faktları və reallıqları inkar etməklə bu mövqeyini ortaya qoyur. Paşinyan çıxışlarında regional proseslərə dair yanlış və əsassız yanaşma ifadə edir. O, yenə də Ermənistan konstitusiyasında Azərbaycana qarşı ərazi iddialarının olduğunu inkar etməyə çalışır. Nazir məsələni Ermənistan Konstitusiya Məhkəməsinin üzərinə atmaqla məsələdən yayınır. Amma faktdır ki, bu ölkənin Konstitusiyasında və digər hüquqi sənədlərdə ölkəmizə qarşı ərazi iddiaları hələ də qüvvədə qalır. Ermənistan Konstitusiyasının istinad etdiyi Müstəqillik Bəyannaməsində Azərbaycanın Qarabağ bölgəsinə açıq-aşkar iddia mövcuddur. Doğrudur, Paşinyan yeni Konstitusiyada Müstəqillik Bəyannaməsinə istinad olunmasının tərəfdarı olmadığını deyib. Amma bu sənəddə də ölkəmizə qarşı ərazi iddialarının olması qəbuledilməzdir. Eləcə də 1980-ci illərin sonlarında Ermənistan Ali Soveti Qarabağın Ermənistan SSR-ə birləşdirilməsi haqqında sənəd qəbul edib. Bütün bu sənədlər ləğv olunmalıdır".
Deputat qeyd edib ki, Azərbaycan bununla bağlı dəfələrlə rəsmi xəbərdarlıq edib. Paşinyan çıxışlarında Azərbaycanın ərazi bütövlüyünün tanınmasına dair 1991-ci ildə imzalanmış Alma-Ata Bəyannaməsinə istinad edir. Lakin məhz 1991-ci il Alma-Ata Bəyannaməsinin imzalanmasından sonra Ermənistan Azərbaycana qarşı genişmiqyaslı işğalçılıq siyasəti həyata keçirib. Təkcə bu fakt rəsmi İrəvanın Azərbaycanın ərazi bütövlüyünü tanınması ilə bağlı qeyri-səmimi olduğunu təsdiqləyir. Əgər Ermənistan rəsmiləri həqiqətən səmimidirlərsə, o zaman konstitusiyalarında və digər qanunlardan ölkəmizə qarşı ərazi iddialarını ehtiva edən müddəaları çıxarmalıdırlar. Əks halda kimlərinsə dediyi sözün hər hansı hüquqi qüvvəsi yoxdur. Belə sənədlərin qüvvədə qalması gələcəkdə Azərbaycana qarşı ərazi iddiası üçün istifadə oluna bilər. Ona görə də Azərbaycanın bu şərti mütləq yerinə yetirilməlidir.
Deputat bildirib ki, Paşinyan hakimiyyəti ATƏT-in Minsk qrupu məsələsində də manipulyasiya etməyə çalışır: "Erməni baş nazir sülh sazişinin imzalanması ilə Minsk qrupunun buraxılmasının eyni vaxtda reallaşdırılmasını "məntiqli" hesab edərək belə bir variant təklif edib. Bu təklifin də heç bir əsası yoxdur. Nəzərə alaq ki, de-fakto Minsk qrupu mövcud deyil. Yəni Azərbaycan öz ərazi bütövlüyünü və suverenliyini bərpa etdikdən sonra qurum heç bir fəaliyyət göstərmir. Çünki Azərbaycan ərazi bütövlüyünü təmin etdikdən sonra Minsk qrupuna heç bir ehtiyac yoxdur. Sadəcə bu məsələni rəsmiləşdirmək lazımdır. Lakin görünən odur ki, rəsmi İrəvan bu məsələlərdə "manevrlər" edib, prosesi uzatmağa çalışır. Yəni burada konkretlik yox, hansısa qeyri-müəyyən təşəbbüslərdən söhbət gedir ki, bu da gerçək sülhün əldə olunmasını istisna edir".
S.Fətəliyeva xatırladıb ki, Prezident İlham Əliyev Macarıstana səfəri zamanı iki ölkə arasında sülh perspektivləri barədə fikirlərini bildirib: "Ermənistan Konstitusiyasında bu günə qədər Azərbaycana qarşı ərazi iddiası vardır. Bu, dəyişdirilməlidir. İkincisi isə Qarabağ münaqişəsini həll etmək üçün yaradılmış ATƏT-in Minsk qrupu ləğv edilməlidir. Bu, artıq de-fakto fəaliyyət göstərmir, de-yure bunun ləğvi zəruridir. Əfsuslar olsun ki, Ermənistan tərəfi hələ ki, bu iki şərtimizi qəbul etmək istəmir. Ancaq son illərin hadisələri və proseslərin gedişatı onu göstərir ki, gec-tez onlar bizim təklifimizlə razılaşmağa məcbur olacaqlar. Çünki bu təkliflərdə qeyri-adi heç bir məsələ yoxdur".
Deputat bildirib ki, rəsmi İrəvan bir tərəfdən özünü sülh tərəfdarı kimi təqdim edir, digər tərəfdən isə silahlanma ilə məşğul olur. Bu, onlar üçün yaxşı heç nə vəd etmir. Ermənistan üçün ən doğru seçim Azərbaycanın haqlı şərtlərini qəbul etməkdir.
Əsmər QARDAŞXANOVA,
"Azərbaycan"
