Dövlət statistika orqanlarının ötən ildəki fəaliyyəti və 2022-ci ildə qarşıda duran vəzifələrlə bağlı fevralın 11-də Dövlət Statistika Komitəsi aparatı şöbələrinin, Naxçıvan Muxtar Respublikası Dövlət Statistika Komitəsi, şəhər və rayon statistika idarələrinin rəhbərlərinin iştirakı ilə geniş kollegiya iclası keçirilib.
Komitədən AZƏRTAC-a bildirilib ki, iclasdan öncə “Dövlət qulluqçularının təltif edilməsi haqqında” Azərbaycan Respublikası Prezidentinin 2021-ci il 23 iyun tarixli Sərəncamına əsasən dövlət qulluğunda səmərəli fəaliyyətlərinə görə Dövlət Statistika Komitəsinin bir qrup əməkdaşına “Dövlət qulluğunda fərqlənməyə görə” medalının təqdim olunma mərasimi keçirilib. Dövlət Statistika Komitəsinin sədri Tahir Budaqov dövlət qulluqçularını yüksək dövlət təltifi münasibətilə təbrik edib, onlara çətin və şərəfli işlərində, gələcək fəaliyyətlərində uğurlar arzulayıb.
Təltif edilmiş şəxslərdən Cabbar Musayev və Hamlet Məmmədov söz alaraq fəaliyyətlərinə verilən yüksək qiymətə görə dövlət başçısına öz minnətdarlıqlarını bildirib, gələcəkdə də bu yüksək etimadın doğruldulması üçün bütün səy və bacarıqlarını əsirgəməyəcəklərini söyləyiblər.
Daha sonra Komitə sədri Tahir Budaqov Prezident İlham Əliyevin rəhbərliyi ilə ölkəmizdə 2021-ci ildə bütün sahələrdə sistemli və ardıcıl xarakterli islahatların həyata keçirildiyini, siyasi və iqtisadi idarəetmə metodlarının müasirləşdirildiyini, ölkəmizin dünyada artan nüfuzunun və inkişaf tempinin daha da gücləndiyini diqqətə çatdırıb.
Bildirib ki, dövlət başçısının həyata keçirdiyi uğurlu siyasətin nəticəsində 2021-ci ildə iqtisadi artım 5,6 faiz təşkil edib, qeyri-neft sektoru 7,2 faiz, kənd təsərrüfatı 3,4 faiz, sənaye istehsalı 5,2 faiz, qeyri-neft sənaye məhsulu 18,9 faiz, nəqliyyat sektorunda yük daşınması 2,8 faiz, sərnişin daşınması 3,1 faiz, informasiya və rabitə xidmətləri 6,1 faiz, pərakəndə ticarət dövriyyəsi 3,2 faiz, ödənişli xidmətlərin həcmi 4,8 faiz artıb, əsas kapitala 16,1 milyard manat investisiya qoyulub.
Tahir Budaqov Prezident İlham Əliyevin milli statistika sisteminin beynəlxalq standartlara uyğun təkmilləşdirilməsi ilə bağlı tapşırıqlarına uyğun olaraq komitə tərəfindən həyata keçirilən islahatlar və qurumun 2021-ci ildəki fəaliyyəti barədə ətraflı məlumat verib. Qeyd edib ki, 2021-ci ildə də Dövlət Statistika Komitəsi rəsmi statistika məlumatlarının müasir tələblərə uyğun hazırlanmasını, milli statistika sisteminin inkişafı məsələlərini diqqət mərkəzində saxlayıb və öz fəaliyyətini Azərbaycan Respublikasının Nazirlər Kabineti ilə razılaşdıraraq təsdiq edilmiş 2021-ci il üçün statistik işlər proqramı, metodoloji və məlumat istifadəçiləri ilə iş planı, iqtisadi təhlil üzrə rüblük iş planları əsasında qurub, Azərbaycanın Milli Statistika Sisteminin Qlobal Qiymətləndirilməsinin yekunlarından, Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş milli iqtisadiyyat və iqtisadiyyatın əsas sektorları üzrə strateji yol xəritələrindən, “2018-2025-ci illərdə Azərbaycan Respublikasında rəsmi statistikanın inkişafına dair Dövlət Proqramı”nın təsdiq edilməsi haqqında” 2018-ci il 14 fevral tarixli Sərəncamından, “Dünyamızın transformasiyası: 2030-cu ilədək dayanıqlı inkişaf sahəsində Gündəlik”dən və digər dövlət proqramlarından irəli gələn vəzifələrin yerinə yetirilməsinə yönəldib. “2018-2025-ci illərdə Azərbaycanda rəsmi statistikanın inkişafına dair Dövlət Proqramı” üzrə 2021-ci ildə 4 tədbirin icrası tam başa çatdırılaraq ümumilikdə 28 iş yerinə yetirilib, Komitənin digər dövlət proqramları üzrə icraçı kimi çıxış etdiyi tədbirlərin icrası təmin edilib.
2021-ci ildə Dövlət Statistika Komitəsinin əsas fəaliyyət istiqamətlərindən biri də metodoloji bazanın möhkəmləndirilməsi olub, BMT, Avrostat, BVF, İƏİT, BƏT və digər beynəlxalq təşkilatların metodologiyalarına uyğunlaşdırılmaqla 51 metodoloji material hazırlanıb. Statistika məlumatlarının keyfiyyətinin beynəlxalq tələblərə uyğunlaşdırılması məqsədilə statistik hesabat formalarının təkmilləşdirilməsi işi davam etdirilib.
Komitənin veb-səhifəsi (www.stat.gov.az) istifadəçilərin maraqlarının təmin edilməsi baxımından müntəzəm olaraq təkmilləşdirilib və yenilənib, məlumat bazaları əsas sosial-iqtisadi göstəricilər üzrə çoxsaylı cədvəlləri, təhlil və metodoloji materialları əhatə edib. 2021-ci ildə internet səhifəsindən 91,4 faizi ölkə ərazisindən, 8,6 faizi isə xarici ölkələrdən olmaqla hər gün orta hesabla 10 min 46 və ya 2020-ci illə müqayisədə 20 faiz çox istifadəçi bəhrələnib. Dövlət Statistika Komitəsi tərəfindən göstərilən elektron xidmətlərin “Elektron hökumət” portalı vasitəsilə təqdimatına dair vətəndaşlar arasında ictimai maarifləndirmə tədbirlərinin həyata keçirilməsi məqsədilə komitənin internet səhifəsinin “E-xidmətlər” bölməsində bu xidmətlər haqqında ətraflı məlumatlar yerləşdirilib, “Feysbuk”, “Yutub”, “Tviter” və “İnstaqram” sosial şəbəkələrində Dövlət Statistika Komitəsinin səhifəsinin aktiv fəaliyyəti təmin edilib. Görmə qüsuru olan şəxslərin də Dövlət Statistika Komitəsinin internet səhifəsindən istifadə etməsini təmin etmək məqsədilə “WCAG” (Web Content Accessibility Guidline) beynəlxalq standartına uyğun olaraq 2020-ci ildə yaradılmış “Görmə qüsurlu şəxslər üçün” adlı yeni səhifədə 2021-ci ildə “Elektron xidmətlər” bölməsi hazırlanıb, Koreya Statistika Komitəsi ilə birgə həyata keçirilmiş “Azərbaycan Respublikasında Statistik Potensialın Gücləndirilməsi” layihəsi çərçivəsində hazırlanmış “Azərbaycanın Statistik İnformasiya Xidməti - ASİS”in məlumat bazası təkmilləşdirilib, yeni bölmələr, o cümlədən “Mənim səhifəm” bölməsi, habelə yeni funksiyalar yaradılıb.
Statistika məlumatlarının toplanması, emalı və yayımlanmasında istifadə olunan informasiya texnologiyalarının tətbiqi imkanlarının genişləndirilməsi, statistik informasiya sisteminin inkişaf etdirilməsi üçün bir sıra işlər görülüb, respondentlərin yerli statistika orqanlarına gəlmədən hesabat məlumatlarını elektron formada təqdim etmələri üçün zəruri tədbirlər həyata keçirilib və nəticədə statistika hesabatlarının onlayn rejimdə elektron formada qəbulu 95 faizi ötüb, bununla da vətəndaş-məmur təmaslarının səviyyəsi minimuma endirilib, eyni zamanda statistik məlumatların işlənməsi və təhlili imkanları yüksəlib.
Daha sonra 2021-ci ildə də statistika sistemində aparılmış sistemli islahatlar, hesabat intizamı, metodologiyaların hazırlanması, statistik vahidlər və istifadəçilərlə işlərin təşkili, inzibati məlumatlardan istifadə, statistika məlumatlarının toplanmasında, emalında və yayılmasında informasiya texnologiyalarının tətbiqi, məlumatların keyfiyyətinin artırılması istiqamətində statistika orqanları tərəfindən görülmüş əsas işlər barədə hesabat müzakirə edilib, əldə olunan nailiyyətlərlə, həmçinin yol verilmiş nöqsan və çatışmazlıqlarla bağlı Dövlət Statistika Komitəsi aparatının şöbə müdirlərinin və yerli statistika orqanlarının rəhbərlərinin çıxışları dinlənilib, müvafiq qərar qəbul edilib.
Sonda kollegiya iclasına yekun vuran Dövlət Statistika Komitəsinin sədri Tahir Budaqov qarşıda duran vəzifələrin vaxtında və keyfiyyətlə icrası üçün qurumun müvafiq strukturlarına konkret tapşırıqlar verib.
jpeg_1765975443.jpeg)
