Amerika lideri Donald Tramp administrasiyası "yüksəkriskli" kimi təsnif edilən 19 ölkə vətəndaşları tərəfindən təqdim edilən bütün sığınacaq müraciətlərini və immiqrasiya yardımı tələblərini dayandırıb. Bu tədbirlərlə bağlı məlumat ABŞ Vətəndaşlıq və İmmiqrasiya Xidmətlərinin (USCIS) veb saytında dərc edilib.
Direktivə əsasən, agentlik işçilərinə "ərizəçinin vətəndaşlığından asılı olmayaraq, bütün I-589 formalarının (Sığınacaq üçün ərizə və çıxarılmanın qarşısının alınması) və əlaqəli yardım tələblərinin işlənməsini hərtərəfli araşdırma başa çatana qədər dayandırmaq" tapşırılıb.
Məlum olduğu kimi, D.Trampın iyunun 5-də imzaladığı sərəncama əsasən, Əfqanıstan, Myanma, Çad, Konqo Respublikası, Ekvatorial Qvineya, Eritreya, Haiti, İran, Liviya, Somali, Sudan və Yəmən vətəndaşları üçün ABŞ-yə giriş qadağan edilib.
Bundan əlavə, ABŞ Burundi, Kuba, Laos, Syerra-Leone, Toqo, Türkmənistan və Venesuela vətəndaşlarına səyahət məhdudiyyətləri tətbiq edib. Bu ölkələr tövsiyədə müəyyən edilmiş "19 yüksəkriskli ölkə" kateqoriyasına daxildir.
Xatırladaq ki, Vaşinqton Polis Departamenti noyabrın 26-da yerli vaxtla təxminən saat 14:15-də Ağ Evin yaxınlığında iki Milli Qvardiya əsgərinə atəş açıldığını və cinayətdə şübhəli atıcının saxlanıldığını bildirib. FTB direktoru Keş Patel təkbaşına hərəkət edən şübhəlinin saxlanıldığı barədə məlumat verib.
Kolumbiya Dairəsi üzrə prokuror JaninePirro şübhəlinin 29 yaşlı Əfqanıstan vətəndaşı Rəhmanulla Lakanval, hücuma məruz qalmış Milli Qvardiya əsgərlərinin isə 20 yaşlı Sara Bekstrom və 24 yaşlı Endryu Volf olduğunu müəyyən edib.
Pirro əlavə edib ki, Lakanval hədəf aldığı Sara Bekstromun ölümü ilə əlaqədar birinci dərəcəli qətldə ittiham olunacaq.
Amerika mediası Lakanvalın 15 yaşında Əfqanıstanda Mərkəzi Kəşfiyyat İdarəsi (MKİ) ilə əməkdaşlığa başladığını və xidmət etdiyi bölmənin hərəkətləri nəticəsində yaranan itkilərə görə "narahatlıq" yaşadığını bildirib.
ABŞ müdafiə naziri Pit Heqset Dominikan Respublikasına səfəri zamanı hücumdan sonra paytaxtda Milli Qvardiyanın sayının artırılacağını və prezident Donald Trampın göstərişi ilə Vaşinqtona əlavə 500 əsgərin göndəriləcəyini açıqlayıb.
Rizvan CƏFƏROV,
“Azərbaycan”
png_1765896393.png)
