BMT Baş Assambleyasında çıxış edən ABŞ Prezidenti Beynəlxalq Cinayət Məhkəməsini (BCM) "nəzarətdən çıxmış bir qurum" adlandırıb və bütün üzv dövlətlərə təşkilatdan dərhal çıxmaq çağırışı edib.
Ağ Ev rəhbərinin dediyinə görə, Vaşinqton ABŞ hərbçilərinin "saxta, Amerika əleyhinə tribunal" qarşısında mühakimə olunmasına icazə verməyəcək. "BCM üzvü olan bütün ölkələri bu nəzarətdən çıxmış quruma üzvlüyünü dərhal və rəsmi olaraq dayandırmağa çağırıram", - deyə o bildirib.
Məlum olduğu kimi, avqustun 18-də ABŞ-nin dövlət katibi Marko Rubio BCM sədri və baş prokuroru Tomoko Akane və Abdulaye Seyeyə qarşı Amerika sanksiyalarının tətbiq olunduğunu elan edib. Rubio bildirib: "Bu şəxslər Beynəlxalq Cinayət Məhkəməsinin yurisdiksiyasını tanımayan dövlətlərin vəzifəli şəxslərinin araşdırılması, həbs edilməsi, saxlanılması və ya məhkəməyə verilməsi səylərində birbaşa iştirak ediblər".
BCM-i təsis edən beynəlxalq müqavilənin tərəfi olmayan ABŞ Rusiya və İsraillə birlikdə artıq bir neçə məhkəmə məmuruna qarşı sanksiyalar tətbiq edib. Bu tədbirlər onların Amerika maliyyə sistemi vasitəsilə əməliyyatlar aparmasını qadağan edir.
Bundan əlavə, iyulun 13-də Vaşinqton Haaqa məhkəməsini "ABŞ suverenliyinə qarşı qəbuledilməz təhdid" yaratmaqda ittiham edərək Beynəlxalq Cinayət Məhkəməsinə qarşı genişmiqyaslı kampaniya başlatdığını elan edib. Dövlət Departamenti bəyanatında qeyd edib ki, Beynəlxalq Cinayət Məhkəməsi Amerika hərbi və kəşfiyyat işçilərinə qarşı araşdırmalar açıb və "hesabatsız qlobal arbitr" olmağa çalışaraq bu işləri bağlamaqdan imtina edir.
BMT Baş Assambleyasındakı çıxışı zamanı Ukraynadakı müharibəyə toxunan Donald Tramp onun tezliklə bitəcəyini gözlədiyini bildirib. Ağ Ev rəhbəri vurğulayıb ki, ABŞ bu məsələdə Rusiya və Ukrayna rəhbərliyi ilə sıx əməkdaşlıq edir. "Bu münaqişə həll olunacaq və çoxlarının düşündüyündən daha tez", - deyə o əlavə edib. ABŞ Prezidenti Vaşinqtonun Moskvaya təzyiqi artırmağa hazır olduğunu bildirib. O, həmçinin ABŞ-nin Rusiyaya qarşı sanksiyaları genişləndirməsinə imkan verən Lindsi Qrem Qanunundan da bəhs edib. "Lazım gələrsə, bu sanksiyalardan istifadə edəcəyəm", - deyə Tramp söz verib.
Nyu Yorkda kürsüdən Kuba haqqında danışan Donald Tramp onu "tamamilə uğursuz dövlət" adlandırıb. "Kuba əvvəllər üzləşmədiyi uğursuzluğa düçar olur", - deyə bildirib. ABŞ Prezidentinin BMT Baş Assambleyasındakı çıxışının bitməsini gözləmədən Kuba nümayəndələri nümayişkaranə şəkildə zalı tərk ediblər.
Rizvan CƏFƏROV
jpg_1792681093.jpg)
