Fransanın Xarici İşlər Nazirliyi Konqodakı səfirliyin sosial şəbəkə hesabında yayımlanan və irqçi, müstəmləkəçi stereotipləri təbliğ etdiyi bildirilən videonu silib.
AZƏRTAC xəbər verir ki, “Le Canard enchaîné” nəşrinin üzə çıxardığı video iyun ayında səfirliyin “Instagram” hesabında paylaşılmışdı.
“Həqiqət vizası” (“Le Visa de la vérité”) adlı video Fransaya viza almaq istəyən konqolu gəncin “Vizama baxın” müraciəti ilə başlayır. Süjet boyunca viza müraciətlərinə dair tövsiyələr yumor adı altında təqdim edilir, lakin bəzi ifadələr sosial şəbəkə istifadəçiləri və media tərəfindən müstəmləkəçi və irqçi stereotipləri gücləndirən məzmun kimi qiymətləndirilib.
Videoda fransalı konsul konqolu müraciətçiyə viza üçün “möhkəm profil” tələb olunduğunu bildirir. O, guya bank hesabında böyük məbləğ göstərmək və ya sənədləri saxtalaşdırmaq kimi halların problem yarada biləcəyini deyir. Daha sonra “Fransa mehriban və səmimi insanları sevir” ifadəsi səsləndirilir.
Süjetin sonunda gənc müraciətçi səfirliyin tövsiyələrini anladığını nümayiş etdirərək, sənədlərinin “Photoshop üzrə mütəxəssis əmisi oğlu” tərəfindən hazırlanmadığından əmin olmaq lazım olduğunu bildirir. Konsul isə videonu “səmimilik, ciddilik və aydın layihə” çağırışı ilə yekunlaşdırır.
Video yayımdan götürülsə də, sosial şəbəkələrdə yayılmaqda davam edib və istifadəçilərin kəskin reaksiyasına səbəb olub. Bir sıra internet istifadəçiləri videonu “utancverici” və “irqçi ssenari” adlandıraraq, Fransanın müstəmləkəçilik irsi ilə bağlı stereotipləri tənqid ediblər.
“Le Canard enchaîné”nin məlumatına görə, video Xarici İşlər Nazirliyinin baş katibliyinin kommunikasiya və mətbuat departamentinin göstərişi ilə silinib. Nəşrin danışdığı diplomat bu addımı alçaldıcı adlandırıb və səfirliklərin sosial şəbəkələrdə istifadə etdiyi yeni, daha qeyri-standart yumor üslubunun yaranmasında nazirliyin kommunikasiya siyasətinin rolunu qeyd edib.
Fransanın Xarici İşlər Nazirliyi isə “Libération”a açıqlamasında videonun Konqodakı Fransa səfirliyi tərəfindən konqolu influenserlərlə əməkdaşlıq çərçivəsində hazırlandığını bildirib. Nazirlik videonun uyğun hesab edilmədiyi üçün silindiyini təsdiqləyib.
