Azərbaycanda 16 yaşadək uşaqların sosial şəbəkələrdə hesab açmasının məhdudlaşdırılması və 16-18 yaş aralığında onların sosial mediadan istifadəsinə valideyn nəzarətinin tətbiqi uşaqların rəqəmsal mühitdə təhlükəsizliyinin təmin edilməsi baxımından mühüm addımdır.
Milli Məclisin deputatı Ceyhun Məmmədov AZƏRTAC-a açıqlamasında bildirib ki, son dövrlərdə Azərbaycan qanunvericiliyində azyaşlıların sosial mediadan istifadəsi ilə bağlı mühüm dəyişikliklər həyata keçirilib.
Deputat qeyd edib ki, Prezidentin rəqəmsal mühitdə uşaq və yeniyetmələrin zərərli məzmun və təsirlərdən qorunmasına yönəlmiş Sərəncamı bu istiqamətdə atılan mühüm addımlardan biridir.
“Bu, çox vacib və mühüm qərardır. Çox sevindirici haldır ki, Azərbaycan bu məsələdə öndə gedən dövlətlərdən biri oldu. Yaşı 16-dək olan uşaqların sosial şəbəkələrdən sərbəst istifadəsinin məhdudlaşdırılması gələcəkdə onların rastlaşa biləcəyi bir sıra ciddi problemlərin qarşısının alınmasına xidmət edəcək”, – deyə C.Məmmədov vurğulayıb. Yaşı 16-18 arasında olan şəxslərin sosial şəbəkələrdən istifadəsində valideyn nəzarətinin nəzərdə tutulmasının da uşaqların təhlükəsizliyinin təmin olunması baxımından əhəmiyyətli olduğunu bildirən deputat qeyd edib ki, bu yanaşma valideynlərin övladlarının rəqəmsal davranışına daha yaxından nəzarət etməsinə imkan yaradacaq. Sosial şəbəkələr uşaqların informasiya əldə etməsi və ünsiyyət qurması üçün geniş imkanlar yaratsa da, burada onların psixoloji inkişafına, dünyagörüşünə və davranışlarına mənfi təsir göstərə biləcək məzmunlarla qarşılaşması riski mövcuddur. Bu səbəbdən uşaqların rəqəmsal savadlılığının artırılması, onlara internetdən təhlükəsiz və düzgün istifadə qaydalarının öyrədilməsi xüsusi əhəmiyyət daşıyır.
Deputat vurğulayıb ki, yalnız qanunvericilik tədbirləri deyil, ailə, məktəb və cəmiyyət tərəfindən aparılan maarifləndirmə işi də bu prosesin mühüm tərkib hissəsidir. Müasir dövrdə uşaqlar və yeniyetmələr sosial şəbəkələr vasitəsilə müxtəlif zərərli məzmun və təsirlərlə üzləşə bilirlər. Bu baxımdan onların rəqəmsal mühitdə müdafiəsinin gücləndirilməsi həm valideynlər, həm də dövlət qarşısında mühüm vəzifələr qoyur.
“Hazırda dünyada ağır proseslərin getdiyi bir dövrdə belə bir addımın atılması və qərarın qəbul edilməsi, hesab edirəm ki, gənclərin qorunması, onların zərərli təsir və məzmunların qurbanına çevrilməməsi baxımından xüsusi əhəmiyyət daşıyır. Əsas məqsəd uşaqların sağlam inkişafını təmin etmək və onları rəqəmsal mühitin yarada biləcəyi təhlükələrdən qorumaqdır”, - deyə deputat əlavə edib. C.Məmmədov bildirib ki, uşaqların təhlükəsiz rəqəmsal mühitdə böyüməsi gələcək nəslin sağlam formalaşması baxımından mühüm amillərdən biridir. Bu istiqamətdə görülən tədbirlərin əsas məqsədi uşaqların hüquq və maraqlarını qorumaq, onların zərərli məzmunların təsirinə məruz qalmasının qarşısını almaq və rəqəmsal texnologiyalardan daha təhlükəsiz şəkildə faydalanmalarına şərait yaratmaqdır.
