Türkiyə parlamenti "Milli birliyin və sosial inteqrasiyanın gücləndirilməsi haqqında" qanun qəbul edib
"Terrorsuz Türkiyə" prosesinin bir hissəsi olaraq qəbul edilən qanunda Kürdüstan Fəhlə Partiyasının (PKK) üzvləri üçün məhdud əfv nəzərdə tutulur. Sənəd on minlərlə insanın həyatını alan kürd terrorçuları ilə 40 ildir davam edən münaqişəyə son qoymaq üçün atılan ilk qanunvericilik addımıdır.
Qanun PKK-nın uzun illərdir həbsdə olan qurucusu Abdullah Öcalanın tərəfdarlarını partiyanı buraxmağa və silahlarını yerə qoymağa çağırmasından təxminən bir il yarım sonra qəbul edilib. “Anadolu” Agentliyinin məlumatına görə, qanun layihəsi parlamentdə təxminən 12 saatlıq müzakirələrdən sonra təsdiqlənib: 600 deputatdan 468-i lehinə, 88-i əleyhinə səs verib, 6-sı isə tərəfsiz qalıb. Sənəd Türkiyə Prezidenti Rəcəb Tayyib Ərdoğanın hakim Ədalət və İnkişaf Partiyası (AKP), onun ifrat sağçı Milliyyətçi Hərəkat Partiyasındakı (MHP) müttəfiqləri və kürdpərəst müxalifət Türkiyə Demokrat Partiyası (KXDR) tərəfindən dəstəklənib.
"Financial Times" qəzetinin məlumatına görə, qanun 12 maddədən ibarətdir və minlərlə PKK üzvünün tərksilah olunması və yenidən inteqrasiyası üçün prosedurlar müəyyən edir. Sənəd müəyyən cəzaları təxirə salır və iddia edilən cinayətin ağırlığından asılı olaraq davam edən istintaqları 5 və ya 10 il müddətinə dondurur. Bu güzəştləri alanlar başqa cinayətlər törətməsələr, onların cinayət işləri xitam olunacaq və mövcud cəzaları ləğv ediləcək.
Lakin əfv qəsdən adam öldürməkdə ittiham olunan PKK üzvlərinə və ya 2005-ci ildən əvvəl ömürlük həbs cəzasına məhkum edilənlərə şamil olunmayacaq. Bu məhdudiyyət Abdullah Öcalana və digər yüksək çinli PKK üzvlərinə də aiddir.
Bu, Türkiyə ilə PKK arasında sülhə nail olmaq üçün ilk cəhd deyil. Lakin hələlik 1984-cü ildə başlayan silahlı münaqişəyə son qoymaq üçün ən böyük ümidverici addımdır. PKK terror fəaliyyətinə başlayandan bəri Türkiyədə təxminən 40 min insan həlak olub. O üzdən PKK Türkiyə, ABŞ, Avropa İttifaqı və Böyük Britaniya tərəfindən terror təşkilatı elan edilib.
Rizvan CƏFƏROV,
"Azərbaycan"
