Astara Rayon İcra Hakimiyyətinin başçısı Qəzənfər Ağayev rayonun ucqar dağ kəndlərindən olan Asxanakəran kənd inzibati ərazi dairəsi üzrə nümayəndəliyinin Bəlbay kəndində səyyar qəbul-görüş keçirib.
İcra başçısı bildirib ki, yerlərdə əhali ilə görüşlərin ümumi işimizə faydası böyükdür. "Ötən dövrdə bizim müşahidələrimiz və verdiyiniz təkliflər əsasında nümayəndəlik ərazisində xeyli iş görülmüşdür. Azaru və Anbuba kəndlərinin avtomobil yolları asfaltlaşdırılıb, Bəlbay kəndinin yolu genişləndirilərək yerli materialdan daş-çınqıl döşənib, yüksəkgərginlikli elektrik xətləri tamamilə yenilənib, sürətli internet şəbəkəsi yaradılıb. Hazırda Şıxımpeştə kəndinə gedən yola çınqıl döşənir. Bu işlərin görülməsində kənd əhalisinin işgüzarlığını xüsusi qeyd edirəm. Çünki müəyyən işlər kənd sakinlərinin birliyi və iştirakı ilə görülüb. Buna görə hər birinizə təşəkkürümü bildirirəm. Ümumilikdə götürəndə son illər nümayəndəliyin ərazisində daha böyük işlər görülüb. Taxtanəkəran-Toradi avtomobil yolunun asfaltlaşdırılması, Asxanakəran, Motalayataq, Anbuba və Azaru kəndlərində yeni məktəb binalarının tikintisi buna misaldır. Hazırda ən vacib problem kəndə qaz xəttinin çəkilməsidir. Bir az vaxt tələb edən bu məsələ də yaxın illərdə həllini tapacaqdır".
İcra başçısı daha sonra bunları əlavə edib: "Bu abadlıq işlərinin görülməsi ilə dağ kəndləri xeyli inkişaf edib. Əsasən yol infrastrukturu yaxşılaşdıqca yeni turizm marşrutları açılır ki, rayonumuza gələn qonaq və turistlər gözəl təbiətə malik bu yerləri rahat şəkildə gəzə bilsinlər. Ən ucqar yaşayış məntəqələrində sosial problemlərin həlli böyük inkişaf yolunda olan ölkəmizin gücünü göstərir.
Prezident İlham Əliyevin sədrliyi ilə may ayında keçirilən kənd təsərrüfatı məsələlərinə həsr olunmuş müşavirədən, təsdiq edilmiş dövlət proqramının mahiyyətindən bəhs olunub: "Bütün əkinəyararlı torpaq sahələri əkin dövriyyəsinə qaytarılmalı, ölkədə məhsul bolluğunun yaradılması, əhalinin məşğulluğunun təmin edilməsi üçün əlimizdən gələni etməliyik. Dağ kəndlərimizin torpaqları dəmyə torpaqlar olduğundan buna uyğun kənd təsərrüfatı bitkilərinin yetişdirilməsinə, eyni zamanda heyvandarlıq və arıçılığın inkişafına diqqəti artırmalıyıq".
Kənd sakinləri çıxış edərək ölkə Prezidenti İlham Əliyevin rəhbərliyi ilə respublikada həyata keçirilən qlobal layihələrin icrası ilə müstəqil Azərbaycanımızın daha da çiçəkləndiyini, əhalinin rifahının gündən-günə yaxşılaşdığını qeyd edib, bu diqqət və qayğıya görə ölkə rəhbərinə hədsiz minnətdarlıqlarını ifadə ediblər. Qaldırılan problemlərin həllinə həssaslıqla yanaşdığına görə icra başçısına dərin təşəkkürlərini bildirən sakinlər Asxanakəran kənd tam orta məktəbinin dam örtüyünün təmiri, içməli suyun çəkilməsi, məktəb yolunun asfaltlaşdırılması, yolda piyada zolağının çəkilməsi, Bəlbay kəndində qəzalı vəziyyətdə olan elektrik dirəkləri və naqillərin dəyişdirilməsi, kəndə gedən yolun asfaltlaşdırılması, Bəlbay və Şümrüd kəndlərini birləşdirəcək 800 metrlik yolun çəkilməsi, məşğulluğun artırılması üçün fermer assosiasiyalarının yaradılması və aqrar sahənin inkişafına köməklik göstərilməsini xahiş ediblər.
İcra başçısı vətəndaşlar tərəfindən verilən təklif və qaldırılan məsələlərin həlli ilə əlaqədar müvafiq tədbirlərin görüləcəyini bildirib.
Seyran CAVADOV,
"Azərbaycan"
