Astana Beynəlxalq Forumu 2025 öz işinə başlayıb. COP29 Sədrliyi AIF 2025-də təmsil olunur.
AZƏRTAC xəbər verir ki, Qazaxıstanın paytaxtında keçirilən Forumda qlobal dialoq və əməkdaşlıq üçün geniş platforma yaradılıb. Forum hökumətlərdən, beynəlxalq təşkilatlardan, biznes və akademik qurumlardan aparıcı mütəxəssisləri bir araya gətirərək, qlobal miqyasda aktual problemlərə dair transformativ müzakirələr aparmaq və praktik həll yollarını inkişaf etdirmək məqsədi daşıyır.
AIF 2025-in builki müzakirə mövzuları arasında enerji təhlükəsizliyi, iqlimə dayanıqlı tədbirlər, geosiyasi əməkdaşlıq, beynəlxalq ticarət, texnoloji innovasiyalar və dayanıqlı inkişaf kimi məsələlər əhatə olunub. Bu da müasir dünyanın qarşılıqlı əlaqəli xarakterini və sektorlararası əməkdaşlığa ehtiyac olduğunu əks etdirir.
COP29 Sədrliyi də bu forumda iştirak edir. “COP30 və qlobal iqlim fəaliyyətinin gələcəyi” adlı panel sessiyasında çıxış edən Prezidentin iqlim məsələləri üzrə nümayəndəsi, COP29-un sədri Muxtar Babayev Bakı platformasının nailiyyətlərinə və Bakıdan Belemə gedən yolun əhəmiyyətinə diqqət çəkib.
“Hörmətli həmkarlar, Azərbaycanın COP29-a ev sahibi olacağı xəbərini aldıqda, biz bunun xüsusi bir məsuliyyət olduğunu dərk etdik.
Regionumuzda COP-a ev sahibliyi edən ilk ölkə kimi, öz iqlim missiyamızı və hədəflərimizi dünyaya tanıtmaq və təmsil etmək kimi öhdəliyimiz vardı. Qarşılaşdığımız çətinlikləri hər kəslə bölüşməli idik. COP29-a ev sahibliyindən öyrəndiyimiz ilk dərslərdən biri bütün diplomatik danışıqlar zamanı yaranan disbalansı aradan qaldırmağın vacib olması oldu. İqlim zirvəsi zamanı ən çətin danışıqlar bəlkə də aylarla davam edə bilərdi. Amma 2 həftə ərzində yüksək diplomatik təcrübəmizə əsaslanaraq, danışıqlar masasında hədəfə nail ola bildik. Diplomatlarımızın əldə etdiyi tarixi irəliləyişlər alqışa layiqdir. Paris Sazişinin 6-cı maddəsi - karbon bazarlarının idarə edilməsi, İtki və Zərərlərə Cavab Fondunun fəaliyyətə başlaması, eyni zamanda, BMT prosesi çərçivəsində tarixdə ilk dəfə bu qədər böyük maliyyə öhdəliyi götürüldü – Bakı Maliyyə Hədəfi ilə 2035-ci ilə qədər inkişaf etməkdə olan ölkələr üçün hər il azı 300 milyard dollar cəlb olunması hədəfləndi. Bundan başqa, daha bir əsas öhdəliyin yerinə yetirilməsi üçün səylə çalışırıq. COP29-un sonunda ölkələr Azərbaycan və Braziliyaya Bakıdan Beləmə İqlim Yolu Xəritəsi hazırlamaq tapşırığını verdilər. Bu sənəd iqlim maliyyəsini bütün mənbələrdən 1,3 trilyon dollara qədər artırmağın aydın yollarını və real imkanlarını təqdim edəcək. Biz ümid edirik ki, bu sənəd 2026-cı ildəki regional iqlim sammitində müzakirə və fəaliyyət üçün faydalı çərçivəyə çevriləcək”, - deyə M.Babayev əlavə edib.
“COP30 və qlobal iqlim fəaliyyətinin gələcəyi” adlı panel sessiyasında çıxış edən Prezidentin iqlim məsələləri üzrə nümayəndəsi Muxtar Babayev, həmçinin regionda mövcud olan iqlim dəyişikliyi problemlərinə, Xəzər dənizində su səviyyəsinin azalması, Qazaxıstan, Özbəkistan və Azərbaycan arasında Avropaya yaşıl enerji ötürülməsi üçün qurulan strateji tərəfdaşlıqdan da bəhs edərək, Qazaxıstanın 2026-cı ildə regional BMT iqlim sammitinə ev sahibliyi etməyə hazırlaşdığı bir vaxtda, COP29 Sədrliyi olaraq onlara dəstək verməyə hazır olduğunu bildirib.
jpg_1750967658.jpg)
