44 günlük savaş Azərbaycanın dövlətçilik tarixinə qızıl hərflərlə yazılmışdır. Müzəffər Ali Baş Komandan İlham Əliyevin qüdrətli sərkərdə məharəti və Azərbaycan əsgərinin qəhrəmanlığı sayəsində Ermənistan silahlı qüvvələri darmadağın edildi, düşmən diz çökdürüldü.
Ərazilərimizin 20 faizini 30 il işğal altında saxlayan, cənnət ərazilərimizi odlara qalayıb xarabaya çevirən Ermənistan silahlı qüvvələri sonuncu əsgərinədək ölkəmizdən qovuldu.
Bu müqəddəs savaşda çox sayda igid oğullarımız sinələrini düşmən gülləsinə sipər edib həlak oldu, şəhidlik zirvəsinə ucaldı. Neçə-neçə cəsur övladımız döyüşlərdə yaralanıb sağlamlığını itirdi. Vətən sevdalı oğulların canı, qanı bahasına şanlı qələbə qazanıldı.
Beləcə barıt qoxulu Qarabağa və Şərqi Zəngəzura azadlıq günəşi doğdu. İnsanlığın üz qarası olan erməni vandallarının daş üstə daş qoymadığı yaşayış məntəqələrimiz indi bərpa və quruculuq dövrünü yaşayır. Kəndlər, şəhərlər min bir həvəslə yenidən qurulur. Doğma ocağa ata-baba yurduna qovuşan insanların sevinci hədsizdir.
Tarixi qələbənin, möhtəşəm quruculuğun baş memarı Prezident İlham Əliyevin imzaladığı "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" bu gün uğurla həyata keçirilir. Proqramda bütün incəliklər nəzərə alınmışdır. Dövlət doğma yurda qayıdan hər bir gəncin müəyyən peşəyə sahiblənməsinə, quruculuq və bərpa işlərində yaxından iştirakının təmin olunmasına böyük önəm verir. Elə həmin məqsədlə də peşə təhsili mərkəzlərinin qarşısına konkret vəzifələr qoyulur. Bu istiqamətdə əldə edilən ilk nəticələr fərəhlidir. Ölkədə fəaliyyət göstərən 8 peşə təhsili müəssisəsində 42 ixtisas üzrə təlimlər keçirilir. Keçən il 215, bu il isə 526 nəfər təlimlərə cəlb olunub.
Bərdə Dövlət Peşə Təhsil Mərkəzi öz uğurları ilə hər zaman diqqət çəkib. Bu günlər təhsil mərkəzində maraqlı tədbir reallaşıb. "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" çərçivəsində Bərdə Dövlət Peşə Təhsil Mərkəzində qisamüddətli təlimləri uğurla başa vuran müdavimlərlə görüş keçirilib. Görüşdə çıxış edən Peşə Təhsili üzrə Dövlət Agentliyinin direktoru Ceyhun Kərəmov müvafiq Dövlət Proqramının əhəmiyyətini vurğulayıb, yeni peşələrə yiyələnmiş gənclərə uğurlar arzulayıb.
Görüşdə çıxış edən Milli Məclisin deputatı Fatma Yıldırım bu gün Qarabağ və Şərqi Zəngəzurda vüsət alan tikinti, abadlıq, bərpa-quruculuq işlərindən ətraflı danışıb. Natiq yeni peşə vərdişləri qazanmış gəncləri Qarabağın və Şərqi Zəngəzurun yenidən qurulması prosesində fəal iştirak etməyə çağırıb, bunun dövlətimiz üçün xüsusi əhəmiyyət daşıdığını vurğulayıb.
Bərdə Dövlət Peşə Təhsili Mərkəzinin direktoru Samir Nəcəfov isə söhbət zamanı deyib ki, bizim mərkəzdə güclü maddi-texniki baza yaradılmışdır: "Bütün gücümüzü, imkanlarımızı səfərbər edərək çalışırıq ki, qarşıya qoyulan vəzifələrin layiqincə yerinə yetirilməsinə nail olaq. Qısamüddətli təlimlərin növbəti mərhələsi uğurla başa çatıb. Aqronom-texnik, qazanxana maşinisti, aşpaz və bərbər ixtisasları üzrə təlimləri uğurla başa vuran 61 müdavimə sertifikatlar təqdim olunub".
Samir müəllimin söhbətindən onu da öyrəndik ki, Bərdə Dövlət Peşə Təhsil Mərkəzində aqronom-texnik, aşpaz, avtomobil diaqnostikası və təmiri ustası, baytar köməkçisi, bərbər, elektrik-qaz qaynaqçısı, geniş profilli traktorçu, mühasib, qazanxana maşinisti, bağban-dekorator, isitmə-soyutma havalandırma sistemləri və avadanlıqları üzrə qısamüddətli təlimlər keçirilir. Cari ildə Bərdə şəhərində keçmiş məcburi köçkünlər də bu təlimlərə cəlb ediliblər. Təlimlərin müddəti proqramlara uyğun olaraq 1 aydan 3 ayadək müəyyən olunur.
Bərdə Dövlət Peşə Təhsil Mərkəzində baş tutan görüş maraqlı bir sonluqla yekunlaşıb. "Qarabağa peşənlə qayıt" videoçarxının təqdimatı tədbir iştirakçılarına xoş ovqat bəxş edib. Videoçarxın qəhrəmanı - elektrik avadanlıqlarının quraşdırılması və istismarı ixtisası üzrə təhsil almış və hazırda Qarabağda elektrik kimi fəaliyyət göstərən Toğrul Dadaşzadə qazandığı uğurlardan aldığı sevinci gənc həmkarları ilə paylaşıb.
Lazım QULİYEV,
"Azərbaycan"
jpg_1765410473.jpg)
jpg_1765188547.jpg)
