Dünya Meteorologiya Təşkilatı yaxın aylarda güclü “El-Ninyo” hava şəraitinin başvermə ehtimalının çox yüksək olduğunu elan edib.
BMT-nin hava agentliyinin hesabatına görə, iyun-avqust ayları arasında bu təbiət hadisəsinin yaşanma ehtimalı 80 faiz, onun noyabr ayına qədər davam etmə ehtimalı isə 90 faizdən çoxdur.
“El-Ninyo” Sakit okeanın mərkəzi və şərqində suyun temperaturunun vaxtaşırı isinməsidir. Bu hadisə qlobal temperaturu artırır, dünyanın bəzi bölgələrində güclü yağışlara və qasırğalara, bəzi yerlərində isə kəskin quraqlığa səbəb olur.
Dünya Meteorologiya Təşkilatının Baş katibi Seleste Saulo bildirib ki, “El-Ninyo” həm quruda, həm də okeanlarda anomal istilərə yol açacaq. Bu da ağcaqanadlar vasitəsilə yayılan xəstəliklərin artmasına, su və qida qıtlığına, xüsusilə kakao kimi kənd təsərrüfatı məhsullarının məhv olmasına səbəb ola bilər.
BMT-nin Baş katibi Antonio Quterreş xəbərdarlıq edib ki, “El-Ninyo” onsuz da isinməkdə olan planetimizin alovuna yanacaq tökəcək və onun dağıdıcı təsirləri sərhəd tanımadan çox sürətlə yayılacaq. O, qalıq yanacaqlardan imtina etməyi və yaşıl enerjiyə keçidi sürətləndirməyi tələb edib. Bu xəbərdarlıq mayın sonlarında Fransa və Böyük Britaniya kimi Qərb ölkələrində rekord istilərin qeydə alınması, həmçinin Hindistan və Çində anomal hava şəraitinin yaşandığı bir vaxta təsadüf edir. Okean sularının temperaturu artıq normadan 6 dərəcə yüksəkdir.
Meteoroloqlar xəbərdarlıq edir ki, 2026-cı ilin iyun-avqust aylarında demək olar ki, bütün dünyada temperatur normadan yüksək olacaq. Sonuncu belə güclü “El-Ninyo” dövrü 2024-cü ilin tarixin ən isti ili olmasına səbəb olmuşdu.
Təhminə VERDİYEVA,
“Azərbaycan”
