BMT Təhlükəsizlik Şurası "Ukraynada sülhün və təhlükəsizliyin qorunması" mövzusunda iclas keçirib. Məlumata görə, BMT Ukraynada mülki itkilərin sayının artmasından narahatlığını bildirib.
BMT Baş katibinin müavini Ofisinin Avropa, Mərkəzi Asiya və Amerika şöbəsinin rəhbəri Kayoko Qoto bildirib ki, Ukraynadakı mülki şəxslər geniş yayılmış və intensivləşən hava hücumlarının əsas zərbələrinin ziyanını çəkməyə davam edirlər: "Ukraynada mülki itkilərin sayının həyəcanverici artmasından narahatıq. 2025-ci ilin yanvar-oktyabr ayları arasında ümumi rəqəm artıq bütün ötən ilin ümumi rəqəmini keçib".
O qeyd edib ki, 2025-ci ilin ilk on ayında mülki şəxslər arasında ölüm və yaralanmaların sayı 2024-cü ilin ümumi sayından çoxdur. BMT-nin İnsan Hüquqları üzrə Ali Komissarlığının (OHCHR) məlumatına görə, 2022-ci ilin fevral ayından bəri 745 uşaq da daxil olmaqla 14.534 mülki şəxs həlak olub, daha 38.472 nəfər isə yaralanıb ki, onlardan 2.375-i uşaqdır.
Qoto həmçinin Ukraynadakı münaqişənin Rusiya daxilindəki mülki şəxslərə də təsir etdiyini vurğulayaraq, hər iki tərəfi dinc əhaliyə və mülki infrastruktura qarşı hücumları dayandırmağa çağırıb.
Ukraynada münaqişənin başlanğıcından bəri təxminən 3,7 milyon insan evlərini tərk etmək məcburiyyətində qalıb.
İclasda BMT-nin Humanitar İşlər üzrə Baş Katibinin müavini və Təcili Yardım Koordinatoru Tom Fletçerin adından danışan Humanitar İşlərin Koordinasiyası Ofisinin (OCHA) rəhbəri Edem Vosornu Ukraynadakı humanitar vəziyyətə diqqət çəkib.
Vosornunun sözlərinə görə, təkcə bu il təxminən 122.000 insan didərgin düşüb ki, onların əksəriyyəti cəbhə bölgələrinin sakinləridir. Qeyd olunduğu kimi, onların arasında qadınlar, uşaqlar və yaşlılar üstünlük təşkil edir.
Vosornu, daxili köçkünlərin hazırda müvəqqəti kollektiv mərkəzlərdə və ya yarımçıq binalarda yaşadığını bildirib.
Onun bildirdiyinə görə, BMT və təşkilatın tərəfdaşları Ukraynada humanitar əməliyyatları davam etdirir və 2025-ci ilin yanvar-sentyabr ayları arasında 4,2 milyondan çox insana yardım göstəriblər.
Humanitar proqramların maliyyələşdirilməsindəki çatışmazlıqları qeyd edən Vosornu, 2025-ci ildə tələb olunan vəsaitin yalnız 2,63 milyard dollarının köçürüldüyünü bildirib. Bu isə ümümi məbləğin 46 faizini təşkil edir.
Rizvan CƏFƏROV,
“Azərbaycan”
jpg_1765706081.jpg)
