BMT-yə üzv dövlətlər İspaniyanın Sevilya şəhərində keçiriləcək sammitdə rəsmi olaraq qəbul ediləcək inkişaf üçün maliyyələşdirmə üzrə dördüncü beynəlxalq konfransın yekun sənədi ilə bağlı razılığa gəliblər. ABŞ bu danışıqlarda və qarşıdakı konfransda iştirak etməyəcəyini bəyan edib.
AZƏRTAC təşkilatın məlumatına istinadla xəbər verir ki, iyunun 18-də BMT-nin baş qərargahında toplaşan üzv dövlətlər aylarla davam edən intensiv hökumətlərarası danışıqlardan sonra “Sevilya öhdəliyi” kimi tanınan yekun sənədi təsdiq ediblər. O, davamlı inkişafın maliyyələşdirilməsi üçün yenilənmiş qlobal çərçivənin təməl daşı kimi nəzərdə tutulub və hazırda inkişaf etməkdə olan ölkələrin üzləşdiyi illik 4 trilyon dollarlıq maliyyə çatışmazlığı fonunda daha aktualdır.
Sənədinin həmmüəllifləri olan Meksika, Nepal, Zambiya və Norveç bu sazişi BMT-yə üzvlükdə geniş dəstək bazasını əks etdirən iddialı və balanslaşdırılmış kompromis kimi qiymətləndirib.
BMT İqtisadi və Sosial Şurasında ABŞ nümayəndəsinin səlahiyyətlərini icra edən Conatan Şrayer bildirib ki, Birləşmiş Ştatlar bu mətnin konsensusa aparan yol təqdim etməməsindən təəssüflənir. O qeyd edib ki, layihədə beynəlxalq maliyyə institutlarının idarəçiliyinə müdaxilə edilir, təkrar mexanizmlər tətbiq olunur, ticarət, vergi və innovasiya ilə bağlı Vaşinqtonun prioritetləri ilə uzlaşmayan müddəalar yer alır.
BMT Baş katibinin iqtisadi və sosial məsələlər üzrə müavini Li Junhua sənədin təsdiq edilməsini alqışlayıb və vurğulayıb ki, bu, “çoxtərəfliliyin hamı üçün faydalı olduğunu göstərən kompromisdir”. O əlavə edib: “FFD4 konfransı çoxtərəfliliyin nəzərəçarpacaq nəticələr verə biləcəyini sübut etmək üçün nadir fürsət təqdim edir. Uğurlu və güclü nəticə yenilənmiş maliyyələşdirmə çərçivəsini formalaşdırmaqla çoxtərəfli sistemdə inam və etimadı bərpa etməyə təkan verəcək”.
İyunun 30-dan iyulun 3-dək keçiriləcək Sevilya konfransı Monterrey (2002), Doha (2008) və Əddis-Əbəbədən (2015) sonra BMT-nin inkişafın maliyyələşdirilməsi üzrə dördüncü böyük tədbiri olacaq. Onun Dayanıqlı İnkişaf Məqsədlərinin (SDGs) 2030-cu ilədək və sonrakı müddətdə yerinə yetirilməsi üzrə konkret öhdəliklər hazırlaması və beynəlxalq maliyyə əməkdaşlığına rəhbərlik etməsi gözlənilir.
