“Bloomberg News”un adları açıqlanmayan nümayəndələrə istinadla verdiyi məlumata görə, OPEC hələlik heç bir fəaliyyət planı barədə qərar verməyib və ya martın 1-də keçirilməsi nəzərdə tutulan görüşdən əvvəl rəsmi müzakirələrə başlamayıb. Məlumata görə, nümayəndələrdən biri son qərarın ABŞ Prezidenti Donald Trampın OPEC üzvü olan İrana qarşı hərbi əməliyyatlara başlayıb-başlamamasından və ya İranla nüvə razılaşmasına nail olub-olmamasından asılı ola biləcəyini bildirib.
AZƏRTAC “Bloomberg” agentliyinə istinadla xəbər verir ki, bir neçə aparıcı neft treyderi qiymətlərin əsas bazarlardakı gərginliyin dəstəklədiyini qeyd edib. Treyderlərin sözlərinə görə, artıq neftin böyük bir hissəsinin Rusiya və İran kimi sanksiyalı istehsalçılardan gəlməsi və buna görə də daha geniş alıcı bazasına çatmaması bazarı təəccüblü dərəcədə davamlı edib.
“Brent” markalı neftin fyuçersləri bu il 11 faiz artıb. Yaxın Şərqdə münaqişənin baş verə biləcəyi ilə bağlı narahatlıqlar fonunda yanvar ayının sonunda neftin qiymətləri altı ayın ən yüksək səviyyəsinə, yəni bir bareli 72 dollara çatıb.
Ötən ilin aprel ayında Səudiyyə Ərəbistanı OPEC+ alyansını 2023-cü ildən bəri dayandırılmış hasilatı sürətlə yenidən başlatmağa vadar edərək xam neft treyderlərini təəccübləndirib. Bəzi OPEC+ nümayəndələri bildiriblər ki, strategiyadakı dəyişiklik illərdir istehsalın azalması fonunda ABŞ şist qazı istehsalçıları kimi rəqiblərinə itirilən bazar payını geri qaytarmaq məqsədi daşıyır. Analitiklər, həmçinin Ər-Riyadın OPEC-dən yanacaq qiymətlərinin aşağı salınmasına kömək etməsini istəyən Trampı razı salmağa çalışdığını ehtimal edirlər.
OPEC+ alyansının səkkiz əsas üzv ölkəsi ötən il dayandırılan gündəlik hasilatı təxminən 2,6 milyon barel artırmaq barədə razılığa gəlmişdi, lakin sonradan ilk rübdə istehsalı təxminən 1,2 milyon barel səviyyəsində saxlamağı planlaşdırıblar. Dördüncü rübdə aylıq hasilat artımı orta səviyyədə olub və gündəlik cəmi 137.000 barel təşkil edib.
jpg_1771227661.jpg)
