İki il öncə - 14 fevral 2024-cü ildə Prezident İlham Əliyev Milli Məclisdə and içərkən Azərbaycanın qarşısında duran hədəf və məqsədləri çox aydın, korrekt və sistemli halda diqqətə çatdırdı. İlk növbədə seçicilərin böyük etimad və dəstəyini qazanması münasibətilə Azərbaycan xalqına öz təşəkkürünü bildirməsi bir liderin xalqa arxalanmasından və onun güvənini qazanıb güc almasından xəbər verir.
2024-cü ilin 7 fevral tarixi Azərbaycan xalqı üçün sadə bir prezident seçkisi deyildi. Bu seçkilər Azərbaycan xalqının liderinə məhəbbətinin, sədaqətinin, etimadının ən ali forması idi. Çünki cənab İlham Əliyev xalqına tarixi Zəfər yaşatmış liderdir.
Hələ 2018-ci ildə dövlət başçımız Milli Məclis kürsüsündə andiçmə mərasimi zamanı bildirmişdi ki, Ermənistan-Azərbaycan münaqişəsi yalnız və yalnız Azərbaycanın ərazi bütövlüyü çərçivəsində həllini tapmalıdır. Azərbaycan xalqı heç bir zaman öz tarixi torpaqlarında ikinci erməni dövlətinin yaradılmasına imkan verməyəcək. O gündən az bir zaman keçməsinə baxmayaraq, Azərbaycan xalqı birlik nümayiş etdirərək Vətən müharibəsini Zəfərlə başa vurdu. Mərd oğullarımız qan tökərək, torpaqlarımız uğrunda canlarından keçərək tarix ədaləti bərpa etdilər.
İkinci Qarabağ müharibəsi Azərbaycanın şanlı tarixidir. Bu savaş həm də dünya tarixinə yazılan bir müharibədir. Azərbaycanın döyüş qabiliyyəti, əsgərlərimizin, zabitlərimizin göstərdiyi qəhrəmanlıq dünyanın nüfuzlu hərbi məktəbləri tərəfindən də bu gün öyrənilir. Bu istiqamətdə fundamental araşdırmalar aparılır. Azərbaycanın uğurunu təmin edən digər amillərdən biri ondan ibarətdir ki, xalqımız müdriklik və təmkin göstərdi, liderinə güvəndi. Cənab Prezident İlham Əliyev hər bir kürsüdən Azərbaycanın haqq səsini çatdırdı və bütün platformalarda bildirirdi ki, artıq tarixə qovuşmuş hərbi rejim Azərbaycan xalqına qarşı o cinayətləri törətməyi təkbaşına bacarmazdı. Direktivlər birbaşa Ermənistan rəhbərliyi tərəfindən gəlirdi, qondarma qurum Ermənistan tərəfindən idarə olunurdu.
44 günlük Vətən müharibəsində Azərbaycan əsgəri, zabiti görünməmiş qəhrəmanlıq göstərdi. Ermənistan tərəfində isə 12 mindən çox fərari var idi. Döyüşən əsgərlərimiz qan tökərək 5-6 müdafiə xəttini aşaraq sübut etdilər ki, torpaq uğrunda ölmək nə deməkdir. 44 gün ərzində tarixi və strateji vəzifələr yerinə yetirildi və Azərbaycan Ermənistanı kapitulyasiya aktına imza atmağa məcbur etdi. Təbii ki, müharibədən sonrakı dövr də asan deyildi. Azərbaycana qarşı siyasi təzyiqlər, təhdidlər davam edir, bunların ardı-arası kəsilmirdi. Ermənistan kapitulyasiya aktında ehtiva edilən məsələlərin icrasını bilərəkdən gecikdirirdi. Azərbaycanın əsas hissəsi ilə onun Naxçıvan Muxtar Respublikası arasında yol bağlantılarının təmin edilməsi ilə bağlı Ermənistanın öhdəliyi var idi. Lakin bununla bağlı İrəvan nə bir siyasi iradə ortaya qoyurdu, nə də texniki əsaslandırma işinə başlayırdı. O zaman dünyada baş verən hadisələr də təbii ki, Cənubi Qafqaza təsirsiz ötüşmür. Odur ki, Azərbaycan diplomatiyanın fərqli üsul və metodlarına əl atırdı.
İkinci Qarabağ müharibəsindən sonra lokal xarakterli antiterror əməliyyatları ilə ölkəmiz demək olar ki, bütün təhlükələri Qarabağdan uzaqlaşdırdı. 2023-cü ilin 20 sentyabr tarixində qondarma rejim məhv edildi.
Azərbaycan Cənubi Qafqaza sülh gətirib. Azərbaycan bütün gücünü səfərbər edib ki, Cənubi Qafqaz regionunda sabitlik bərqərar olsun.
Qarşıda dayanan əsas məsələ Qarabağ və Şərqi Zəngəzurun bərpasıdır. Hazırda Böyük qayıdış proqramı uğurla icra edilir. Qarabağ və Şərqi Zəngəzurda geniş quruculuq işləri həyata keçirilir. Bu gün dövlət büdcəmizdə ən büyük vəsait hərbi xərclərə yönəldilib. Digər tərəfdən, Azərbaycan güclü hərbi sənaye kompleksi yaradır. Müdafiə sənayemiz yerli istehsal baxımından inkişaf etdir, dünyanın böyük dövlətləri ilə müqavilələr imzalanır. Dövlətimizin başçısı bildirir ki, regional sabitlik bizim üçün əsas faktordur. Cənubi Qafqazın artıq münaqişə və müharibələrdən uzaqlaşması son dərəcə labüddür.
Ölkəmiz iqtisadi cəhətdən də güclənir. Azərbaycanın valyuta ehtiyatları tarixi rekord həddə çatıb. Belə ki, bu ehtiyatlar 80 milyard dollardan artıqdır. Xarici borcumuz isə aşağı düşüb. Bu, ümumdaxili məhsulumuzun cəmi 6,3 faizini təşkil edir. Bir çox inkişaf etmiş ölkələrdə bu rəqəm 100 faizdir. Valyuta ehtiyatlarımız xarici borcumuzu 16 dəfə üstələyir.
Azərbaycan ABŞ ilə münasibətlərini tamamilə yeni bir mərhələdə inkişaf etdirir. 8 avqust tarixində Vaşinqtonda əldə edilmiş razılaşmalar sadəcə Ermənistan və Azərbaycan arasında sülh müqaviləsinin imzalanmasına xidmət etmir, həm də münasibətlərin müəyyənləşdirilməsi və önə aparılması baxımından yol xəritəsi oldu. Bu həm də ABŞ investisiyasının regiona gəlməsi demək idi. Cənubi Qafqazdakı bu reallıqların əsasını qoyan tərəf Azərbaycandır.
Azərbaycan Mərkəzi Asiyanın tamhüquqlu üzvünə çevrilib. Mərkəzi Asiyanın resursları uğrunda gedən mübarizədə Azərbaycan uzlaşdırma mövqeyində dayanır, aktorlar arasında körpü rolunu oynayır. Bu körpü sadəcə coğrafi mövqe baxımından deyil, həm də diplomatiya üzərindən dəyərləndirilir. Bunların hər biri tarixi hadisələrdir. Vaxtilə bunlar xəyal kimi görünsə də, indi reallıqdır. Bu reallığı təmin edən isə Müzəffər Liderimiz cənab İlham Əliyevdir.
Azər BADAMOV,
Milli Məclisin deputatı
