- Küçədə təsadüfən bir hadisənin şahidi oldum və məni şahid kimi çağırıblar. Getmək məcburidirmi?
Sahib Samiroğlu,
Sumqayıt şəhəri
- Əgər şahid olduğunuz hadisə cinayət əməli ilə bağlıdırsa, siz cinayət prosesini həyata keçirən orqan tərəfindən şahid qismində çağırıla bilərsiniz və bu halda həmin orqanın çağırışı üzrə ifadə vermək üçün həmin orqana getməyiniz sizin vəzifənizdir. Belə ki, Azərbaycan Respublikası Cinayət-Prosessual Məcəlləsinin 95.4.1-ci maddəsinə əsasən, cinayət prosesini həyata keçirən orqanın çağırışı ilə istintaq və ya digər prosessual hərəkətlərdə iştirak etmək üçün gəlmək və dindirmədə ona məlum olan bütün hallar üzrə suallara tam və düzgün cavab vermək şahidin vəzifəsidir. Şahidin öz vəzifələrini icra etməməsi Azərbaycan Respublikasının qanunvericiliyi ilə nəzərdə tutulmuş məsuliyyətə səbəb olur. Bununla belə dindirmə zamanı şahidin hansı cinayət işi üzrə çağrıldığını bilmək özünə və yaxın qohumlarına qarşı ifadələrin verilməsindən, materialların və məlumatların təqdim olunmasından imtina etmək; cinayət prosesi zamanı sərf etdiyi xərclərin ödənilməsinə və cinayət təqibini həyata keçirən orqanın qanunsuz hərəkətləri nəticəsində ona vurulmuş ziyana görə kompensasiya almaq və digər hüquqları mövcuddur.
- Azyaşlı övladımın adını dəyişdirmək istəyirəm. Bu mümkündürmü? Əgər mümkündürsə, bunun üçün hansı hüquqi prosedurlar tələb olunur?
Jasmin HƏSƏNİ,
Masazır qəsəbəsi
- Azərbaycan Respublikası Ailə Məcəlləsinin 53.2-ci maddəsinə və Azərbaycan Respublikası Nazirlər Kabinetinin 12.05.2011-ci il tarixli 79 nömrəli qərarı ilə təsdiq edilmiş "Adın, ata adının və soyadın verilməsi və dəyişdirilməsi Qaydaları"nın 2.1-ci bəndinə əsasən, uşağa ad valideynlərin razılığı ilə verilir. Eyni zamanda qaydaların 6-cı maddəsinə uyğun olaraq, adın növbəti dəfə dəyişdirilməsinə valideyinlərin razılığı, uşağın marağı nəzərə alınmaqla yol verilir. Bundan başqa, nəzərə almaq lazımdır ki, qaydaların 1.4-cü bəndinə görə uşağın mənafeyinə xələl gətirə biləcək, habelə şəxsin cinsinə uyğun gəlməyən və ya gülünc adın verilməsinə yol verilmir. Bu müddəa uşağın adının dəyişdirilməsi halına da aiddir. Adın dəyişdirilməsi haqqında ərizə vətəndaşın seçdiyi yer üzrə Azərbaycan Respublikası Ədliyyə Nazirliyinin rayon (şəhər) qeydiyyat şöbəsinə verilir. Ərizə iki nüsxədə təqdim olunur. Nüsxələrdən birinin üzərində ərizənin qəbul edilməsinə dair qeyd aparılır və o, ərizə verən şəxsə qaytarılır. Ərizəyə aşağıdakı sənədlər əlavə edilir: yetkinlik yaşına çatmayanın doğum haqqında şəhadətnaməsinin surəti; yetkinlik yaşına çatmayanın 10 yaşı varsa, razılıq ərizəsi; valideynlərin rəsmi nikahda yaşamasını təsdiq edən şəhadətnamənin surəti (boşanma varsa, nikahın ləğv edilməsi haqqında, valideynlərdən biri vəfat edibsə, ölümü haqqında şəhadətnamənin surəti); ərizəçilərin şəxsiyyətlərini təsdiq edən sənədlərin surətləri; yaşayış yerindən arayış; valideynlərin notariat qaydasında təsdiq olunmuş birgə ərizəsi.
Valideynlər arasında uşağın adına münasibətdə razılıq olmadıqda, yaranan fikir ayrılığı yerli icra hakimiyyətlərinin qəyyumluq və himayə orqanları tərəfindən adıçəkilən qaydaların müddəaları nəzərə alınmaqla həll edilir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
